Read ngakarimojong Ŋikiru. 21 Bible Online

Ŋikiru. 21 - ngakarimojong bible

Ŋikiru. 21

¹Okoe Ekapolon, elelyani erwosit anagogoŋu a ŋina ibu iyoŋ inak iŋes. Elelyani iŋes nooi aŋuna a akiloun a ŋina iinak iyoŋ iŋes.

²Iinak iyoŋ iŋes ŋuna ecamit etau keŋ, ibu iyoŋ toboŋok ŋuna eŋita iŋes,

³anerae ibu iyoŋ kisiryam iŋes inak ebari; ibu iyoŋ kiwuak ebokot ŋolo ke egolid nakou keŋ.

⁴Abu iŋes kiŋit akiyar aneni kon, ido ibu iyoŋ inak iŋes; ibu iyoŋ inak iŋes ŋiletok torubakis ipukato ŋikaru ka ŋikaru.

⁵Alotooma akilounun ŋina ibu iyoŋ inak iŋes, aruwor apolou keŋ ŋina epol nooi; iinak iyoŋ iŋes arwonu ka apolou ŋina ailiilon.

⁶Iinak iyoŋ iŋes ŋarereŋisyo ŋuna a ŋikaru ka ŋikaru; ituruwo iyoŋ iŋes ŋolo elelyani aŋuna irukitotor iyoŋ ka iŋes,

⁷anerae ikinyomit erwosit Ekapolon, ido aŋuna ka amina a ŋina nyiryaŋiryaŋa a ŋina ka Akuj a ŋina alokidiama nooi, erubakini erwosit iboi emam ŋace.

⁸Ikamuni iyoŋ ŋimoe kon daadaŋ; ikamuni iyoŋ a apedor kon ŋulu ikimanito iyoŋ.

⁹Ani edoli apaki ŋina itakanunia iyoŋ, imunyari iyoŋ ikes ka akim a ŋina amwanan pe; imunyari iyoŋ ikes aŋuna iŋoitor, imunyari iyoŋ ikes ka akim.

¹⁰Imunyari iyoŋ ŋiletok kec daadaŋ, imunyari iyoŋ ŋidwe kec alotuŋa.

¹¹Ani keyeta ikes ŋuna aronok aŋuna kon, ani ketuko ikes akiwan iyoŋ, nyitiyakin ŋuna etukete ikes akitiya;

¹²anerae ibwaŋi iyoŋ ikes; igumari iyoŋ ŋikaleŋeleŋe kon neni kec.

¹³Ikipuri isua iyoŋ okoe Ekapolon, aŋuna ka agogoŋu kon a ŋina apolon nooi; ikieikini ka ikipuri isua apedor kon.