Read ngakarimojong Ŋikiru. 22 Bible Online

Ŋikiru. 22 - ngakarimojong bible

Ŋikiru. 22

¹Akuj kaŋ, Akuj kaŋ, kaanukiro ikiesikinia iyoŋ ayoŋ? Kaanukiro ilwania iyoŋ aneni kaŋ akiŋarakin ayoŋ, kori akiirar ŋakiro ŋuna ekegworonokinio ayoŋ iyoŋ?

²Okoe Akuj kaŋ, egworo ayoŋ a ŋinapaaran, nai nyeboŋokino iyoŋ ŋakiro kaŋ; egworo ayoŋ a ŋinakoloŋit nakwaare, nai mam akieŋar eliliŋ.

³Torae bo iyoŋ Akuj ŋina iseg, ŋina itopoloorito Ŋisirael anakilip kec.

⁴Arae iyoŋ apotu atapapa kosi ikikinyoma; apotu ikes ikikinyoma iyoŋ, ido ibu iyoŋ toiu ikes.

⁵Apotu ikes ikikaloikis iyoŋ, ido ibu iyoŋ toiu ikes; apotu ikes ikikinyoma iyoŋ, ido aponi nyisirumi ikes ŋileec.

⁶Aŋun nyeriŋa ayoŋ atakani alotuŋa arae ituŋanan, nai atakani asibit ekurut; eketeete ŋituŋa ŋuluce ayoŋ arae ekoŋinait ka akajamuwarito ikes ayoŋ.

⁷Akajamuwanarete ayoŋ daadaŋ ŋulu ekeŋolikinete; akajamuwanarete kimuŋumuŋete ŋakyes kec,

⁸ebasi, “Ikinyomit iŋes Ekapolon; kimyekisi Ekapolon toiu iŋes; kimyekisi Ekapolon tolaku iŋes, anerae emina Ekapolon iŋes.”

⁹Ekapolon, iyoŋ ibu ikitolomu ayoŋ anakook a toto kaŋ; iyoŋ ibu ikiinak ayoŋ akikinyom iyoŋ tari anapaki a ŋina ariŋaakar ayoŋ anaki.

¹⁰Ŋinapei anakidounet aponi ayoŋ ekewuakin neni kon; ŋinapei eriŋa ayoŋ ayai nakook a toto kaŋ irae iyoŋ Akuj kaŋ.

¹¹Nyilwana aneni kaŋ, anerae eapiyete ŋican, ido mam ŋini ekeŋarakini ayoŋ.

¹²Ekerimokinito ayoŋ ŋimoe ŋulu alalak; ekerimokinito ayoŋ ŋimoe ŋulu agogoŋok, ŋulu ikote egogoŋ ŋimaaniko ŋulu a Basan.

¹³Eŋaarito ikes ŋakitukwa kec nooi neni kaŋ; ikwaan ikes ka ŋiŋatunyo ŋulu irurumaete enyamete ibore ŋini ikamunito.

¹⁴Apapanu ayoŋ ka acaryoon ikwa ŋakipi ŋuna ebukoryo, nyeriŋa ŋakoyo kaŋ daadaŋ erucokina neni sek eruconokina; ali etau kaŋ ekwaanikin ka amanok ŋina elii imadakinio nakim;

¹⁵aono akituk kaŋ deu ikwa amot ŋina emam ŋakipi, aoniki a ŋajep kaŋ nakituk kaŋ, ikimyek iyoŋ ayoŋ eridi anapuwa.

¹⁶Ekerikaut ayoŋ ŋimoe kaŋ, ekerikau ayoŋ ajore a ŋituŋa a ŋulu aronok. ecumucumasi ikes ŋakan ka ŋakejen kaŋ.

¹⁷Ileerete tokona ŋakoyo kaŋ anakuwan kaŋ epedor akimarun, eketeete ayoŋ ŋimoe kaŋ akamisiyarito nooi.

¹⁸akorakinosi ikes make ŋilowi kaŋ, ilamilamete atedor ŋini eai.

¹⁹Nai iyoŋ Ekapolon, nyisetar kare ca aneni kaŋ; iyoŋ ŋolo irae ekeŋarakinan kaŋ, bua atipei ikiŋarak ayoŋ.

²⁰Toiu akiyar kaŋ alomoe kaŋ, toiu akiyar kaŋ ŋina amina ayoŋ aloŋokwo a ŋul,

²¹toiunae ayoŋ aloŋatunyo a ŋul, toiunae ayoŋ alomoŋin a ŋuludedeŋ a ŋul.

²²Alimokini ayoŋ ŋikaitotoi ka ŋakaitotoi kaŋ ŋuna itiya iyoŋ; ekepuri ayoŋ iyoŋ aneni ilipyata ŋituŋa.

²³Iyes ŋulu itopoloorito Ekapolon, kipuro iŋes! Iyes ŋiletok a Yakob daadaŋ, kitopoloosi iŋes! Iyes ŋiletok a Isirael daadaŋ kilipa neni keŋ!

²⁴Nyimyekina iŋes ŋituŋa ŋulu isicanitae, kori nyeŋero iŋes amitakin ŋican kec; nyewouna iŋes akiŋarakin ŋini daadaŋ esicanitae. nai abu kiira akigoro kec aŋuna ka akiŋarakino.

²⁵Iyoŋ ikiinakinit ayoŋ akipuro iyoŋ aneni ilipyata ŋituŋa. Esiyookini ayoŋ ŋakikoŋeta kaŋ alokiŋaren ŋulu ikitopoloorito iyoŋ.

²⁶Imujete ŋulu a ŋican kimwoko; ipurete Ekapolon ŋulu itopoloorito iŋes, elipi inak Akuj ikes alakara anakiyar kec a daadaŋ

²⁷Etamunete ŋituŋa daadaŋ Ekapolon toboŋut neni keŋ; eryedikete alokiŋaren Ekapolon, ŋituŋa a ŋikabilae a daadaŋ;

²⁸anerae erae Ekapolon erwosit, ipukat iŋes ŋakwapin.

²⁹Ilipete neni keŋ ŋikabarak daadaŋ anakwap, ilipete alokiŋaren keŋ daadaŋ ŋulu iridete nai arubakini ayoŋ ayari aŋuna ka Akuj.

³⁰Itiyanakinete iŋes ŋanyameta daadaŋ ŋuna eponito, elimonokinio ŋanyameta daadaŋ ŋuna eponito ŋakiro ke Ekapolon.

³¹Elimonokinio ŋituŋa ŋulu eriŋa nyidouno tokona, atemar abu Ekapolon toiu ŋituŋa keŋ, etemarete adau Ekapolon akitiya ŋun.