Read ngakarimojong Ŋikiru. 27 Bible Online

Ŋikiru. 27 - ngakarimojong bible

Ŋikiru. 27

¹Ekapolon iŋes akica kaŋ ka aiuno kaŋ, ŋae nai akeri ayoŋ? Neni ke Ekapolon iŋes ayakaun ayoŋ aiuna; ŋae nai akuryaniaror ayoŋ?

²Ani kekerikaut ayoŋ ŋulu aronok ka ŋimoe kaŋ iwarito akiar, emaranikinete ikes nyepedosi akitiya ŋuna ecamito.

³Tari daŋ kekerikaut ayoŋ ŋimoe, nyekuryaniar etau kaŋ jik; tari daŋ kakadoloki ayoŋ ejie, arubakini ayoŋ ekinyomit Akuj.

⁴Ibore ipei ŋini eitanit ayoŋ, ŋini adau ayoŋ akiŋit Ekapolon; iŋes akiboi alo Kai ke Ekapolon ŋirwa daadaŋ ŋulu ka akiyar kaŋ, arubakini ete akibuses ŋina ke Ekapolon ka akiwar acamit keŋ alo Kai keŋ.

⁵Akaiuni iŋes ayoŋ apaki ŋina a ŋican; ekedari iŋes ayoŋ anakibois a ŋina eyai iŋes ka ekesiboikini iŋes ayoŋ nakibois ŋina aiunor.

⁶Aŋun, elouni ayoŋ ŋimoe kaŋ ŋulu ekerikaunito ayoŋ. Anaeo a ŋina ka alelyanu, aai ayoŋ ŋamuronisya Kai ke Ekapolon, aeikini ka epuri ayoŋ Ekapolon.

⁷Okoe Ekapolon, kiirarae ayoŋ ŋina ekalounio neni kon eworoe nooi, kisyoni ayoŋ ka toboŋokinoe ayoŋ.

⁸Ebala etau kaŋ neni kaŋ, “Bua, kilip neni ke Ekapolon!” Okoe Ekapolon elipi ayoŋ neni kon.

⁹Nyikiesik ayoŋ, nyikiesik ayoŋ eketiyan kon aŋuna ka aŋoit kon, iyoŋ ibu toruwor ekeŋarakiniton kaŋ. Nyikiŋer ayoŋ, nyikimyek ayoŋ, okoe Akuj kaŋ, akaiunan kaŋ!

¹⁰Tari daŋ kakaŋero ayoŋ papa kaŋ ka toto kaŋ, ekeuryari ayoŋ Ekapolon.

¹¹Okoe Ekapolon, kitatamae ayoŋ ŋuna icamit iyoŋ ayoŋ ewuap, kisiwuapae ayoŋ ŋuna iyookino alokiŋaren kon, anerae elalak ŋimoe kaŋ.

¹²Nyikipotok ayoŋ nacamit ŋina a ŋimoe kaŋ, anerae apotu neni kaŋ ŋisuudae ŋulu alyokonok, ekemanito ka akaryenyaanikinito ikes ayoŋ.

¹³Anupit ayoŋ atemar eŋolikini ajokis ŋina ke Ekapolon, anakwap a na a ŋina eyakae isua.

¹⁴Kidar Ekapolon! Togogoŋ ka kimyek etau kon tomukyaan, kidar Ekapolon!