Read ngakarimojong Ŋikiru. 33 Bible Online

Ŋikiru. 33 - ngakarimojong bible

Ŋikiru. 33

¹Iyes ŋulu iyookino, tolelyana aŋuna adau Ekapolon akitiya, emaikina iyes ŋulu iyookino kipuro iŋes.

²Kipuro Ekapolon iramete agita; toeikisi eete ejok iramete aduŋgu ŋina eyakasi ŋiunoi ŋitomon.

³Toeikisi eete ŋolokitete neni ke Ekapolon, torama ŋaduŋgui ka aosou, toeos nooi ilelyanete.

⁴anerae iyookino akirot ke Ekapolon, ikinyoma ŋiticisyo keŋ daadaŋ.

⁵Emina Ekapolon akiyookino ka akitub ŋakiro anakiyookino, ileleba amina ke Ekapolon ŋina nyiryaŋiryaŋa nakwap.

⁶Abu Ekapolon tosub nakuj a akirot a ŋina alimuni iŋes. abu Ekapolon tosub ibore daadaŋ ŋini eyai kidiama a ŋakiro a ŋuna alimuni iŋes.

⁷Abu iŋes kiwuak ŋakipi a ŋanamyo iwapei lopite ŋolo iwuakinere ŋakipi namot; ecunanakini iŋes ŋakipi ŋuna alalak loburin a ŋanamyo.

⁸Emaikina ŋisubuna daadaŋ kitopoloosi Ekapolon; emaikina ŋituŋa ŋulu iboiyete anakwap daadaŋ, kiboiyete itopoloorito Ekapolon;

⁹anerae abu iŋes kirworik, ido abu akwap toyakaun; abu iŋes tolimu ŋakiro, ido abu ŋinibore toyakaun.

¹⁰Ituruwonori Ekapolon ŋakiro ŋuna aronok, ŋuna etukete ŋakwapin ŋacaryo; nyisiyoonokini Ekapolon ŋakiro ŋuna aronok ŋuna etukete ŋituŋa.

¹¹Nai ŋakiro ŋuna eye Ekapolon erubakinete jik ŋikaru ka ŋikaru. erubakinete ananyameta a daadaŋ ŋakiro ŋuna eye iŋes alotau keŋ.

¹²Erereŋ akwap ŋina erae Akuj Ekapolon keŋ erereŋ ŋituŋa ŋulu aseu Ekapolon aruwor ŋituŋa keŋ.

¹³Iŋoliunit Ekapolon kwap anakuj; ite ŋituŋa daadaŋ.

¹⁴Ite iŋes ŋituŋa alokicoloŋ keŋ a ŋolo ipukator; ite iŋes ŋituŋa daadaŋ ŋulu iboiyete anakwap.

¹⁵Ekapolon iŋes asubuni ŋitai a ŋituŋa a daadaŋ. Ekapolon iŋes eyeni ŋiticisyo daadaŋ ŋulu itiyaete ŋituŋa.

¹⁶Emam erwosit eiun aŋuna elalaketa ŋasigarya keŋ; emam ekajion elakun aŋuna ka agogoŋu keŋ.

¹⁷Acaryoit akigeno atemar iun alojie a aŋole, tari kegogoŋ aŋole nooi, nyepedori aiun.

¹⁸Kire jik, ite Ekapolon ŋulu itopoloorito iŋes, ite Ekapolon ŋulu iwuakinito akigeno kec namina keŋ ŋina nyiryaŋiryaŋa.

¹⁹Eiunit Ekapolon ikes anatwanare, iyoki Ekapolon ikes ikotere nyetwaka ŋapakio ŋuna ka akoro.

²⁰Ikidarit isua anakigeno Ekapolon, iŋes erae akiŋarakino kosi ka aiuno kosi.

²¹Elelyanete ŋitai kosi aŋuna keŋ, anerae ikikinyomit isua ekiro keŋ ŋolo asegan.

²²Okoe Ekapolon, ikilipi toyakaun amina kon ŋina nyiryaŋiryaŋa neni kosi, ikwapei tokona ikigenor isua iyoŋ.