Read ngakarimojong Ŋikiru. 37 Bible Online

Ŋikiru. 37 - ngakarimojong bible

Ŋikiru. 37

¹Nyikibul aŋuna a ŋulu aronok; tocoito nyikimuwa iyes ŋuna itiyaete ŋulu itiyaete aronis,

²anerae eŋopiyarete ikes atipei ikwa ŋinya ŋulu arinyiyosi, etwakete ikes atipei ikwa ŋikito ŋulu sek alibak ŋulu ainiyasi.

³Kikinyoma Ekapolon ka kitiyata ŋuna ajokak; ikotere iboiyete iyes anakwap ka emam ŋace.

⁴Kikinyoma Ekapolon, ido ikiinakini iŋes iyes ŋuna iitanito ŋitai kus.

⁵Kiwuakisi akiyar kus neni ke Ekapolon; kikinyoma iŋes ikiŋarakini iŋes iyes.

⁶Isileereuni iŋes akiyookino kus, kileereu ikwa akica, isileereuni iŋes akiyookino ŋina itubioto ŋakiro kileereu ikwa akica ŋina akidiŋ apaaran.

⁷Nyiŋayaŋayata anakikinyomit Ekapolon, kidara iŋes alotooma atitinyikinit ikiŋarak iyes; tocoito nyenepu ekibure aneni kus, iŋolikinete ŋituŋa ebarete anakitiya ŋuna aronok; nyenepu ekibure aneni kus iŋolikinete ŋituŋa itiyaete ŋuna aronok ŋuna eyeto ikes akitiya.

⁸Nyiruworosi ŋulu iŋoaka ka toŋero anyunyura, nyiruworosi ŋulu enepi ekibure, ikirikori ekibure ŋol naronis;

⁹anerae emunyar ŋulu aronok, nai ikes ŋulu ikinyomito Ekapolon, eruwor akwap ŋina kec.

¹⁰Idoŋit apaki ŋina euruwuana todaunos ŋulu aronok; tari kiwar iyes ikes, mam nyiryamunete.

¹¹Nai eruwor akwap ŋina a ŋulu iapara ka eryamunete ikes ebari ka eyakaunosi lokisil.

¹²Etukete ŋulu aronok akitiya aronis neni a ŋulu iyookino, ido eryanyaanikinito ikes imanito,

¹³nai ite Ekapolon ŋulu aronok erae ŋikoŋinae, anerae eyeni atemar ebunit akoloŋit ŋina emunyarere ikes.

¹⁴Iriyete ŋulu aronok ŋileŋia kec anakuraroi, ido ikesete ŋakausinei a ŋikaleŋeleŋe ecamito akiar ŋikulyak ka ŋulu aŋican, ka ecamito akiar ŋulu iyookino.

¹⁵Nai eari Akuj ikes a ŋileŋia kec pei, ido ebilibiliyar ŋakausinei a nyikaleŋeleŋe kec.

¹⁶Ejok ibore ŋini eyakar ituŋanan ŋini iyookino tari kedit ibore ŋin, akilo ebari ŋolo alalan ŋolo aronok a daadaŋ,

¹⁷anerae elemaryo apedor a ŋulu aronok, nai eiuni Ekapolon ŋulu iyookino.

¹⁸Iyoki Ekapolon ŋulu emam ŋuna itoronitere, ido erubakini akwap erae ŋina kec ŋikaru ka ŋikaru.

¹⁹Nyeryamunete ikes ŋican alorwa a ŋulu aronok, eyakaunotor ikes akimuj ŋina alalan alorwa a ŋulu ke eron.

²⁰Nai emunyarosi ŋulu aronok, ikwaan ŋulu erae ŋimoe a Ekapolon ka akibuses ŋina a ŋinya; eŋopiyarete ikes ikwa apuru.

²¹Eminasi ŋulu aronok akiden, ido nyetaceneneete, nai ipotonorete ŋulu iyookino ŋiboro kec, ido erubakinito ipotonorete;

²²anerae ikes ŋulu iterereŋit Ekapolon, eruwor akwap ŋina kec. nai ikes ŋulu icenen aneni ke Ekapolon, emunyaryo aneni a ŋuluce.

²³Ikiyoki Ekapolon iwon anakiyar yok a daadaŋ, erae elakara iŋes aŋuna ikitiyae iwon,

²⁴tari daŋ kikidoikinito iwon ŋican, nyikitwaki iwon, anerae ikiyoki Ekapolon iwon.

²⁵Adit ayoŋ paaran, ido amojoŋ tokona, nai nyiŋolikina ayoŋ imyekini Ekapolon ŋulu iyookino, kori ŋidwe kec ilipanar atap.

²⁶Ipotonokinete ka idenionokinete ŋuluce ŋiboro kec jwi jwi, eruwor ŋidwe arereŋu kec.

²⁷Toŋero aronis, kitiyata ajokis; ido erubakinete ŋiletok kus iboiyete anakwap kus,

²⁸anerae emina Ekapolon ŋulu iyookino, ido nyimyekini ŋulu ikinyomito iŋes. Iyokiyo ŋulu iyookino ŋikaru ka ŋikaru, nai emunyaryo ŋidwe a ŋulu aronok.

²⁹Eruwor akwap ŋina a ŋulu iyookino, ido iboiyete ikes anakwap a ŋin ŋikaru ka ŋikaru.

³⁰Irworosi ŋulu iyookino ŋuna ka aosou, ka irworosi ikes ŋuna ka akiyookino,

³¹eya ŋikisila ŋulu ka Akuj kec lotai kec; iwuapito ikes ŋikisila ŋulu ka Akuj.

³²Eminasi ŋulu aronok adapit ŋulu iyookino, iwarito akiar ikes.

³³Nai nyimyekini Ekapolon ŋulu iyookino anapedor a ŋulu aronok, kori nyimyekini ikes isicanio apaki ŋina eyaunere loikiiko.

³⁴Kikinyoma Ekapolon ka kiwuapa ŋakiro keŋ, ido ikitalakari iŋes iyes, ikiinakini akwap toruwor ŋina kus; iŋolikinete iyes emunyaryo ŋulu aronok.

³⁵Adau ayoŋ akiŋolikin ŋulu aronok etiŋito ŋuluce erono, ka ebutur ikwa ŋikito a Cedar alo Lebanon.

³⁶Ani etoruni ayoŋ neni sek aya ŋulu aronok, abu ayoŋ nyeŋolik tari epei daŋ, abu ayoŋ ewar ikes nai abu nyaryamu jik.

³⁷Toyenutu ka kiwuapa ŋuna a ŋulu emam ŋuna itoronitere ka kiteto ŋuna a ŋulu iyookino, anerae epote ŋulu eminasi ekisil akiboi emam ŋace.

³⁸nai emunyaryo ŋikasecak daadaŋ; emunyaryo ŋulu aronok tojoŋoto ayakau.

³⁹Eiuni Ekapolon ŋulu iyookino ka iyoki ikes anapakio a ŋuna a ŋican.

⁴⁰Iŋarakini Ekapolon ka elakununui ŋulu iyookino; elakununui ikes aneni a ŋulu aronok, ido eiununui ikes, anerae erae neni ke Ekapolon eloseneneete ikes aiunor.