Read ngakarimojong Ŋikiru. 40 Bible Online

Ŋikiru. 40 - ngakarimojong bible

Ŋikiru. 40

¹(Ekiruk a Daudi neni a ŋolo apolokinit aeore) Abu ayoŋ edar Ekapolon, atitinyikinit; abu iŋes okopupok ayoŋ, ido kiira akigworo kaŋ.

²Abu iŋes okoiu ayoŋ alocan a ŋulu abu oryamu nooi, abu iŋes okoiu ayoŋ nyaloma nakibois a ŋikatwak; abu eketowo ayoŋ aiuna, ayai tokona ayoŋ emam pa akuryana.

³Abu eketeeik ayoŋ eete ŋolokitete, eete ŋolokipuret Akuj yok. Iŋolikinete ŋikalalak apolou a Ekapolon, ido kitopoloosi iŋes.

⁴Erereŋ ŋulu ikinyomito Ekapolon ŋulu nyemisito ŋakiro a ŋiketurok, ŋulu nyiwuapito ŋuna koŋinae.

⁵Elalak nooi, okoe Ekapolon Akuj kaŋ, ŋaumonokineta ŋuna idau iyoŋ akitiya aŋuna kosi. Emam ituŋanan epedori alimunun ŋuna idau iyoŋ ayere aŋuna kosi; kerae opedori ayoŋ alimunun ikes kelalak nooi, pa kepedor akimarun.

⁶Nyicamit iyoŋ ŋamuronisya ka ŋainakineta, nai ikiinak ayoŋ ŋaki ŋuna eŋaara eirarya ŋakiro kon ewuap. Nyiitana iyoŋ ŋainakineta ŋuna epeyo ka ŋainakineta ŋuna ka asecit.

⁷Abu nai ayoŋ otema, “Ayai ayoŋ ne; igiritae aŋuna kaŋ lokitaabo ŋolo a ŋikisila ebe.

⁸‘Alakara ayoŋ akitiya ŋuna icamit iyoŋ, okoe Akuj kaŋ, ewuakinit ayoŋ ŋikisila kon lotau kaŋ.’”

⁹Eserae ayoŋ aŋuna aŋakiro ka alakara anatukot a ŋituŋa a ŋulu ecunakina akilip; nyililiŋa ayoŋ akirworo ŋuna ka aiuno kon, ikwapei iyenia iyoŋ okoe Ekapolon.

¹⁰Nyemunoni ayoŋ ŋakiro ŋuna ka aiuno kon alotau kaŋ; erworo ayoŋ ŋuna ka akikinyoma kon ka ŋuna ka aiuno kon. Nyimunono ayoŋ ŋakiro ŋuna ka amina kon a ŋina nyiryaŋiryaŋa ka ŋuna ka akikinyoma kon anatukot a ŋituŋa a ŋulu ecunakina akilip.

¹¹Nyiwou akisyon ayoŋ, okoe Ekapolon; elipi ikiu iyoŋ ayoŋ jwi jwi aŋuna ka amina kon ka aŋuna ka akikinyoma kon;

¹²anerae ekeloŋiyasi ayoŋ ŋican ŋulu nyimarun; eketapapanut ayoŋ ŋasecisya nyapedorit akidaŋidaŋ ikes, elalak nooi akilo tari ŋitim anakou kaŋ, ido adaun akigeno aneni kaŋ.

¹³Tolakar okoe Ekapolon, itolaku ayoŋ. Okoe Ekapolon, kiwonyu atipei ikiŋarak ayoŋ.

¹⁴Kimyek daadaŋ ŋulu iwarito alemar akiyar kaŋ kisurumae ŋileec ka ŋibiler; kimyek daadaŋ ŋulu elakara aŋuna a ŋican kaŋ kiritarae ekadakinit.

¹⁵Kimyek ŋulu akakyenatar ayoŋ, kiruma ŋileec aŋuna elounere ikes jik.

¹⁶Nai kimyek daadaŋ ŋulu ikiwarito iyoŋ tolelyana ka tolakaros aneni kon; kimyek ŋulu elakara aŋuna ka aiuno kec tobaakasi jwi jwi, “Epol Akuj nooi!”

¹⁷Ani eruworayoŋ, arae ekulyakit ka ekaŋican, elipi Ekapolon okotamunite ayoŋ, irae iyoŋ ekeŋarakinan kaŋ ka ekalakunan kaŋ; okoe Akuj kaŋ nyidid abunore akiŋarakin ayoŋ.