Read ngakarimojong Ŋikiru. 44 Bible Online

Ŋikiru. 44 - ngakarimojong bible

Ŋikiru. 44

¹Okoe Akuj ikidau isua akiirar a ŋaki kosi, adaut atapapaa kosi alimokin isua ŋuna kibu iyoŋ kitiya alorwa kec, alorwa a ŋulu koloŋ.

²Kibu iyoŋ anapedor kon kirita ŋituŋa a ŋakwapin, ido kiwuak atapapaa kosi nakwapin kec; kibu iyoŋ kisican ŋituŋa a ŋakwapin, ido kitobar atapapaa kosi.

³Pa apotu ikes kikamasi akwap aŋuna ka ajionu kec, meere tari aŋuna ka agogoŋu kec aponiata ikes kilouniata; nai arae aŋuna ka apedor ka agogoŋu kon ka arae aŋuna iteyenikinitor iyoŋ ikes atemar iyai iyoŋ ka ikes, anerae imina iyoŋ ikes.

⁴Irae iyoŋ erwosit kaŋ ka Akuj kaŋ, iinanakini iyoŋ ŋituŋa kon akiloun ŋimoe kec.

⁵Napedor kon iŋes ikibwaŋia isua ŋimoe kosi; napedor kon iŋes ikimunyarya isua ŋimoe kosi.

⁶Nyekinyomit ayoŋ akau a ŋikaleŋeleŋe kaŋ ka ŋikaleŋeleŋe kaŋ, kori atemar akaiuni ayoŋ ekileŋ kaŋ alomoe,

⁷nai iyoŋ ikiinakini isua akiloun ŋimoe kosi, iyoŋ isurumenene ŋimoe kosi ŋileec.

⁸Ikituro isua aŋuna kon Akuj ŋirwa daadaŋ, ido ikipuri iyoŋ ŋikaru ka ŋikaru.

⁹Nai tokona ikiŋer iyoŋ isua, ikimyek ikilounio nyeriŋa iyoŋ iyai kaapei ka ŋajiorei kosi.

¹⁰Ibu iyoŋ ikiinak isua abwaŋa alokiŋaren ŋimoe kosi, ido apotu ŋimoe toŋatasi ŋiboro kosi.

¹¹Ibu iyoŋ ikimyek isua ikiŋolyo ikwa ŋamesekin, ido ikiela isua nakwapin.

¹²Igyela iyoŋ ŋituŋa kon a egyelit a ŋolo edit, mam ibore iryamu iyoŋ anagyelar ikes.

¹³Ikituruwo iyoŋ isua ŋulu ikikyenatar ŋikidunyet kosi, ikituruwo iyoŋ isua ŋulu ikijamuwarito ka ikikyenatar ŋikidunyet kosi.

¹⁴Ikituruwo iyoŋ isua ŋulu ikirworotor ŋituŋa a ŋakwapin ka ŋulu ikikyenare.

¹⁵Ekerumito ayoŋ ŋileec apaaran jwii, ido erapuwarito ŋileec ereet kaŋ

¹⁶aŋuna a ŋajutuyanareta ka ŋiyany a ŋimoe kaŋ ka ŋuna a ŋulu ekemanito ayoŋ.

¹⁷Etiyakinosi ŋakiro nu daadaŋ neni kosi, tari daŋ keriŋa isua ikitamunit iyoŋ, kori pa kikiŋerit akiwuap acamunet kon ka isua.

¹⁸Nyeŋero isua iyoŋ alotai kosi; nyeŋero isua akiwuapit ŋakiciketa kon.

¹⁹Nai ikiesik iyoŋ isua ikwa ŋamesekin ŋuna imyekinitae aneni eya ŋikweei, ikiesik iyoŋ isua anakiryonut a ŋina iryono cuc.

²⁰Ani kerae ikimuryakinite isua akilip neni ka Akuj kosi, kori kikyaaritetei isua ŋakan kosi ikilipi neni ka Akuj ka ace,

²¹pa mono keyenunit Akuj ŋun a? Anerae eyeni iŋes ŋuna imunono alotai.

²²Nai aŋuna kon, ikiapikinit isua atwanare ŋinapaki daadaŋ; ikitiŋito ŋituŋa nalya ikwa ŋamesekin ŋuna emyearyo akiŋol.

²³Tonyou, okoe ekapolon! Kaanukiro ijotoo iyoŋ? Tonyou! Nyikiŋer isua ŋikaru kaŋikaru.

²⁴Kaanukiro iwounitor iyoŋ akiŋarakin isua, ido ikimuryakinito ŋican kosi ka akisicanio kosi?

²⁵Ikituruwor isua ŋikoŋinae, ikiboikin napuwa, anerae ikiloun.

²⁶Bua kiŋarakinae isua, aŋuna ka amina kon a ŋina nyiryaŋiryaŋa, tolakunae isua.