Read ngakarimojong Ŋikiru. 48 Bible Online

Ŋikiru. 48 - ngakarimojong bible

Ŋikiru. 48

¹Epol nooi Ekapolon, ido emaikina kipuroe iŋes nooi alotooma etaun ŋolo ka Akuj yok, alomukura keŋ a ŋolo asegan.

²Ibus nooi aoyau a Sion a emukura a ŋolo, ke Ekapolon, erae iŋes alelyanu a ŋituŋa ka akwap a daadaŋ. Eyai lomukura Sion etaun ŋolo ke Erwosit a ŋolo apolon nooi.

³Etoodiu Akuj atemar eiun ŋituŋa a nen, aneni eyai iŋes;

⁴Apaki ŋina acunakinotor ŋirwosi, kimorikis ŋajiorei kec, aŋuna ka akitijikin ŋituŋa a Sion,

⁵apotu kiŋolikis Sion edukuk nooi; tomaranikis ka tobwaŋas.

⁶Abu tobul ikes nooi a nen, toryebakinos nooi ikwa aberu ŋina eapi akidoun.

⁷Ibu iyoŋ tomunya ikes lopite ŋolo emunaarya ekuwuam ŋolo ekutununui alo Kide ŋameeli ŋuna a Tarisis.

⁸Ikwapei aponere isua kiirarae, ikidau isua akiŋolikin ŋuna etiya Akuj; alotaun a ŋolo ke Ekapolon a ŋolo a ŋajoresyo, alotaun a ŋolo ka Akuj kosi a ŋolo erae Akuj iyokit ŋikaru ka ŋikaru.

⁹Alotooma Akai kon, okoe Akuj, ikitamatamae isua amina kon ŋina nyiryaŋiryaŋa.

¹⁰Ikipurosi iyoŋ, okoe Akuj ŋituŋa ka akwap a daadaŋ, edolit arwonu kon nakwapin daadaŋ. Ipukat iyoŋ alotooma akiyookino.

¹¹Emaikina ŋituŋa ŋulu iboiyete alomukura Sion tolakaros, emaikina ŋituŋa ŋulu iboiyete alotaunio a Yudaya tolakaros, anerae itubi iyoŋ ŋakiro anakiyookino.

¹²Iyes Ŋisirael, toloto kirimokis Sion, kirimokisi Sion daadaŋ, kimara ŋaduketa keŋ ŋuna aoyak,

¹³kisyemeto ejok ŋarwatatain keŋ ka ŋaduketa ŋuna kirereet alotooma keŋ, ikotere ipedorete alimokin ŋanyameta ŋuna eponito,

¹⁴atemar Akuj yok na ŋina a ŋikaru ka ŋikaru, iŋes erae ŋina ikiuryarit iwon ŋikaru ka ŋikaru.