Read ngakarimojong Ŋikiru. 51 Bible Online

Ŋikiru. 51 - ngakarimojong bible

Ŋikiru. 51

¹Okoe Akuj, kisyoni ayoŋ, alotooma amina kon ŋina nyiryaŋiryaŋa; aŋuna ka akisyon kon a ŋina alalan, kikisa ŋasecisya kaŋ.

²kilota aronis kaŋ jik, ido kitesegunae ayoŋ anasecit kaŋ.

³Ayeni ayoŋ ŋadyakanareta kaŋ, ido etakani asecit kaŋ a ŋinapaki.

⁴Asecit ayoŋ aneni kon, neni kon bon asecitor ayoŋ; adau ayoŋ akitiya aronis alokiŋaren kon, aŋun, iyookino iyoŋ anakiro a ŋuna irworo; ido iyookinit iyoŋ ikitubokinit ayoŋ akisicanio.

⁵Kire jik, arae ayoŋ ikasecan ŋinapei anakidouno kaŋ, ikasecan ŋinapei akapotiunio ayoŋ toto kaŋ.

⁶Kire jik, icamit iyoŋ akiyookino ŋina eyai lotau a ituŋanan. Aŋun, kilelebik aosou kon natameta kaŋ.

⁷Kitesegunae ayoŋ oruwor ŋini aseg; kilotarae ayoŋ tokwaŋiar etau kya.

⁸Kimyekinae ayoŋ oryamu alelyanu ka alakara; tari daŋ kikisicanit iyoŋ ayoŋ nooi kapapanunit, aryamuni ayoŋ alakara nabo.

⁹Kisyoni ayoŋ ŋasecisya kaŋ, kikisa aronis kaŋ daadaŋ.

¹⁰Kiwuak tooma kaŋ etau ŋolo asegan, okoe Akuj, kikiteteu alotooma kaŋ etau ŋolo ikikinyomit iyoŋ

¹¹Nyikirita ayoŋ aneni kon, kori nyilema aneni kaŋ etau kon ŋolo Asegan.

¹²Kinyakakinae ayoŋ alelyanu ŋina ka aiuno a ŋina aryamuni ayoŋ aneni kon, inakinae ayoŋ etau ŋolo iwuapit ŋakiro kon.

¹³Kimyekinae ayoŋ etatam ŋikasecak ŋuna icamit iyoŋ kiwuapae, ido eboŋunete ŋikasecak neni kon.

¹⁴Okoe Akuj, akaiunan kaŋ nyikimyek ayoŋ oruwor ekaaran, okoe Akuj ŋina irae aiuno kaŋ, aeikini ayoŋ ŋuna ka akiyookino kon.

¹⁵Okoe Ekapolon, toŋaa ŋipon kaŋ, ikotere esera ayoŋ ŋakiro ŋuna ka akipuro iyoŋ.

¹⁶Nyilakara iyoŋ aŋuna a ŋamuronisya, ani kerae tolakara, kayau ayoŋ ikes; nyilakara iyoŋ aŋuna a ŋainakineta a ŋuna epeyo.

¹⁷Ŋamuronisya ŋuna ecamit Akuj, ikes ŋuna a ŋituŋa a ŋulu itiditeuna alotai kec. Okoe Akuj, nyiŋeri iyoŋ ŋituŋa ŋulu itiditeuna ka ekiito alotai kec.

¹⁸Analakari kon ka alope, kitiya ŋuna ajokak Sion; todukok nabo ŋarwatatain a Yerusalem.

¹⁹Ikiponi nai isua ainakin iyoŋ ŋamuronisya ŋuna iyookino ŋuna ikitalakarete iyoŋ ka ŋainakineta ŋuna epeyo ŋuna ikitalakarete iyoŋ; ido earyo isua ŋimoŋin namuroet kon erae amuronot.