Read ngakarimojong Ŋikiru. 63 Bible Online

Ŋikiru. 63 - ngakarimojong bible

Ŋikiru. 63

¹Okoe Akuj, irae iyoŋ Akuj kaŋ, ekeitanit ayoŋ iyoŋ, ekeburit ayoŋ nooi aanyun iyoŋ, alilimiyo akuwan kaŋ aŋuna ka akiitanit iyoŋ, alilimiyo lopite ŋolo iyakar nakwap ŋina aonon ka ŋina acaryoonon ŋina emam ŋakipi.

²Kimyekinae ayoŋ ekeŋolik iyoŋ anakibois a ŋina asegan, kimyekinae ayoŋ eŋolik epite ŋolo iyakar iyoŋ apedor ka apolou;

³anerae ejok nooi amina kon ŋina nyiryaŋiryaŋa, iloit akiyar, aŋun, ekepuri ayoŋ iyoŋ.

⁴Ekepuri ayoŋ iyoŋ ŋirwa daadaŋ ŋulu ka akiyar kaŋ, ido ekyaari ayoŋ ŋakan kaŋ elip anyarit ekiro kon.

⁵Emwoni ayoŋ lopite ŋolo imwonia ituŋanan anasuban, ekepuri ayoŋ iyoŋ alelyani.

⁶Ani akatamuni ayoŋ iyoŋ alokitaada kaŋ, atamatamae ayoŋ ŋuna kon ŋisaae ŋulu ka akuwar daadaŋ;

⁷anerae irubak iyoŋ irae akeŋarakinan kaŋ, aeo ayoŋ alelyani aŋuna ka aiuna aneni kon.

⁸Ekekinyomit ayoŋ iyoŋ nooi; ikiyok iyoŋ ayoŋ a apedor kon.

⁹Nai ikes ŋulu iwarito alemar akiyar kaŋ, elomarete nakibois a ŋikatwak;

¹⁰ipotoryo ikes toarae alojie, enyamete ŋikweei ŋawat kec.

¹¹Nai elelyani erwosit aneni ka Akuj; ikes daadaŋ ŋulu ikoŋete alokiro ka Akuj, eryamunete alelyanu, anerae isililiŋio ŋulu alyokonok.