Read ngakarimojong Ŋikiru. 69 Bible Online

Ŋikiru. 69 - ngakarimojong bible

Ŋikiru. 69

¹Okoe Akuj, toiunae ayoŋ, anerae alalata ŋakipi, adolut lodokole kaŋ.

²Ekeliko ayoŋ ecoto ŋolo alalan, emam neni eonit alokwap; ayai tokona ayoŋ nakipi ŋuna ecukul akanukia ayoŋ akalele.

³Apapanu ayoŋ anakigworo eŋita akiŋarakinio, aono edokole kaŋ. Amuumu ŋakonyen kaŋ edarit akiŋarakino aneni ka Akuj kaŋ.

⁴Elalak nooi ŋituŋa ŋulu akaremokino ayoŋ koŋin edeparit ekimar kec tari ŋitim ŋulu ka akou kaŋ; elalak nooi ŋimoe kaŋ ŋulu ekemanito, ŋulu iwarito alemar akiyar kaŋ koŋin. Akareikinito ayoŋ akitac ibore ŋini pa akokoiyarit.

⁵Okoe Akuj, iyeni iyoŋ abaŋao kaŋ; iyeni iyoŋ ŋasecisya kaŋ.

⁶Nyicamak ŋulu igenosi neni kon isurumyo ŋileec aŋuna kaŋ, okoe Ekapolon, Akuj ŋina aŋajoresyo; nyicamak ŋulu ikiwarito iyoŋ ejamuwaryo aŋuna kaŋ okoe Akuj a Isirael.

⁷Erae aŋuna kon iŋes eketeŋeriyoritere ayoŋ, iŋes elelebunotor ŋileec loreet kaŋ.

⁸Aruwor ayoŋ igelaanot aloyeneta kaŋ, aruwor ayoŋ igelaanot alodwe a toto kaŋ;

⁹anerae amina kaŋ Akai kon enepi alotau kaŋ ikwa akim, apotu neni kaŋ ŋiyany ŋulu ikiyanyata ikes iyoŋ Akuj.

¹⁰Ani etiditeun ayoŋ bon eredak akiron, apotu ŋituŋa ekeyanya ayoŋ a ŋun.

¹¹Ani anapi ayoŋ ŋilowi ŋulukigworyet, apotu ŋituŋa ekerworotor ayoŋ akajamuwarito.

¹²Ayoŋ ekerworotor ŋituŋa ŋinibore iboiyoto; alotemwan alodiyete ŋipukei, ido akaeotor ayoŋ ŋikamerak.

¹³Nai ani eruwor ayoŋ, elipi neni kon, okoe Ekapolon. Toboŋokinoe ayoŋ Akuj, anapaki a ŋina iseuni iyoŋ. Toboŋokinoe ayoŋ aŋuna ka amina kon a ŋina nyiryaŋiryaŋa, anerae iricit iyoŋ akiikinet kon ŋina ka aiun ŋulu ikikinyomito iyoŋ.

¹⁴Toiunae ayoŋ anatwanare; kiyokoi ayoŋ ejok alomoe kaŋ, toiunae ayoŋ nyaloma nakibois a ŋikatwak.

¹⁵Nyicamak akalele akarapuwari ayoŋ, kori neni ecukul ekelikori ayoŋ kori akipany eketoŋopiyari ayoŋ.

¹⁶Okoe Ekapolon, toboŋokinoe ayoŋ, anerae ejok amina kon ŋina nyiryaŋiryaŋa; alotooma akisyon kon ŋina apolon nooi, kiŋarakinae ayoŋ.

¹⁷Nyiwua ereet kon aneni a eketiyan kon; toboŋokinoe kare ca ayoŋ atipei, anerae ayai ayoŋ locan.

¹⁸Toapu neni kaŋ, tolakunae ayoŋ; tolakunae ayoŋ alomoe kaŋ.

¹⁹Iyeni iyoŋ epite ŋolo ekeyanyere ayoŋ, iyeni iyoŋ ŋileec kaŋ ka ajamuwaro ayoŋ; iyeni iyoŋ ŋimoe kaŋ daadaŋ.

²⁰Esiyaloloŋiyosi ŋiyany etau kaŋ, aŋun, apapanu ayoŋ. abu ayoŋ eitan akisyonio, nai mam ipei daŋ ŋini abu ekesyon; abu ayoŋ eitan ikesirworiunan, nai mam ipei daŋ ŋini abu ekesirworiu.

²¹Apotu ŋituŋa okoinakis ayoŋ ekitoe ŋolo aaran akilo akimuj, ani akanyami ayoŋ akure, apotu okoinakis epiini ŋolo adadaŋan akimat.

²²Kimyek ŋasuban kec yaut amunyaro nenipei kec; kimyek ŋasuban ŋuna a ŋitalyo kec yaut atwakiyar nenipei kec.

²³Kimyek ikes tomudukana, ikotere tojoŋoto akitere, kimyek ŋigurae kec tokudos.

²⁴Tonyunyurikin ikes anaŋoit kon; kimyek anyunyura ŋina ka aŋoit kon todolok ikes.

²⁵Kimyek alomari kec toruwor ŋauyoŋoroto; nyicamak ituŋanan kec idio idoŋi kiboi aloeemae kec,

²⁶anerae isicanete ŋituŋa ŋul ŋituŋa ŋulu idau iyoŋ akisican; irworotor ikes ŋican a ŋituŋa a ŋulu idau iyoŋ akiwan.

²⁷Kiric ŋasecisya daadaŋ ŋuna itiyato ikes, nyicamak ikes elomunete nakiyookino kon.

²⁸Kikisa ikes alokitaabo a ŋolo ka akiyar, nyemaikina ikes igiritae kaapei ka ŋulu iyookino.

²⁹Nai ayai ayoŋ naryebo ka locan; okoe Akuj, toiunae ayoŋ, kiwuakinae neni eboiyo emam ŋace.

³⁰Epuri ayoŋ ekiro ŋolo ka Akuj a eete; etopoloori ayoŋ iŋes a alakara.

³¹Italakari nen Ekapolon akilo ŋainakineta ŋuna erae ŋibaren, akilo tari ainakin neni ka Akuj emoŋ ŋolo apolon erae amuronot ŋina epeyo.

³²Kimyek ŋulu a ŋican kiŋolikis ŋun, ido tolakaros; iyes ŋulu iwarito Akuj, kimyekisi ŋitai kus tomukyaketa,

³³anerae epupi Ekapolon ŋulu eyakatar akiitanit, ido nyejamuwarit iŋes ŋituŋa keŋ ŋulu ikamanaritae.

³⁴Okoe nakuj ka akwap, kipuro Akuj, iyes ŋanamyo ka ŋisubuna daadaŋ ŋulu eya tooma kec, kipuro Akuj;

³⁵anerae eiuni Akuj Sion, edukokinio nabo ŋitaunio ŋulu a Yudaya; ido iboikinosi ŋituŋa keŋ nen, toruwor akwap ŋin ŋina kec;

³⁶eruwor akwap ŋin ŋina a ŋidwe a ŋituŋa keŋ, ido iboiyete a nen daadaŋ ŋulu eminasi iŋes.