Read ngakarimojong Ŋikiru. 7 Bible Online

Ŋikiru. 7 - ngakarimojong bible

Ŋikiru. 7

¹Okoe Ekapolon Akuj kaŋ, neni kon iŋes aiunor ayoŋ, toiunae ka tolakunae ayoŋ aneni a daadaŋ a ŋulu ekemanito ayoŋ;

²anerae epedorete ikes anyilinyiliyar ayoŋ lopite ŋolo enyilinyiliyarya eŋatuny etyaŋ; epedorete ikes arikor ayoŋ nariet todaun ituŋanan akaiuni.

³Okoe Ekapolon Akuj kaŋ, ani ketiyat ŋakiro nu: Ani ketiyat ŋuna aronok a ŋakan kaŋ,

⁴ani ketiyat ŋuna aronok neni a ŋini ikiriit ka ayoŋ, kori kademunit ŋimoe kaŋ ibore pa esecito,

⁵kimyek ŋimoe kaŋ ekewuap ayoŋ okoditasi, kimyek ikes okoara ayoŋ ekemyekis aperi alokwap, kidoŋ akuwan kaŋ napuwa.

⁶Okoe Ekapolon, kitoodiu kare ca aŋoit kon; kitoodiu aŋoit kon aŋuna ka aryenyeo a ŋimoe kaŋ. Okoe Akuj kaŋ, bua kiŋarakinae ayoŋ, totub ŋakiro anakiyookino lopite ŋolo icamitor iyoŋ.

⁷Kimyek atukot a ŋituŋa tocunakin ikirimokis iyoŋ kidiŋ, ido kipuka iyoŋ ikes anakuj.

⁸Erae Ekapolon etubokini ŋituŋa; okoe Ekapolon totubokinae ayoŋ alopite a ŋolo ka akiyookino kaŋ ka alopite a ŋolo emamukar aronis etiyat ayoŋ.

⁹Okoe Akuj ŋina iyookino, iyoŋ isyemeonori ŋakiro ŋuna eya natameta ka lotai, kitasalu aryenyeo a ŋulu aronok, ido kiterereŋ ŋulu iyookino.

¹⁰Erae Akuj aupal kaŋ, iŋes eiuni ŋulu iyookino alotai kec.

¹¹Erae Ekapolon ekatubon ŋolo iyookino, eŋoit iŋes a ŋinakoloŋit a ŋuna a ŋulu itiyaete aronis.

¹²Ani pa keki ituŋanan, ipenari Akuj ekileŋ keŋ; irikini iŋes akau a ŋikaleŋeleŋe keŋ ecamit akigum.

¹³Adau Akuj akitemokin ŋiboro keŋ ŋulu aarak; etemok iŋes ŋikaleŋeleŋe keŋ ŋulu ipenen.

¹⁴Kiŋolikisi epite ŋolo etamyata ŋituŋa ŋuna aronok, eyeete ikes ŋican, ido irworosi ŋuna ka amodiyo.

¹⁵Ebokete ikes ŋapanya ŋuna ekutut nooi aŋuna a ŋuluce, nai ikes pei imasanakin napanya kec.

¹⁶Eboŋokini aronis kec ikes pei; ewani ikes aryenyeo kec pei.

¹⁷Alakar ayoŋ neni ke Ekapolon aŋuna ka akiyookino keŋ, ido aeikini ayoŋ ŋieosyo ŋulu ka akipuro neni ke Ekapolon a ŋolo alokidiama nooi.