Read ngakarimojong Ŋikiru. 73 Bible Online

Ŋikiru. 73 - ngakarimojong bible

Ŋikiru. 73

¹Kire jik, ejok Akuj aneni a ŋulu iyookino ka aneni a ŋulu einakina neni ka Akuj alotai kec a daadaŋ.

²Nai ani eruwor ayoŋ, adikino ajamakini akikinyomit Akuj ka adikino ajoŋoe anupit neni ka Akuj,

³anerae abu ayoŋ orakaan aŋuna a ŋulu eturok, apaki ŋina eŋolikinia ŋulu aronok emam ŋican eryamunito.

⁴Emam ŋatyokisyo eyakatar ikes, etumito ikes ka egogoŋ.

⁵Nyeryamunito ikes ŋican ŋulu eryamunito ŋituŋa ŋuluce, emamukatar ikes ŋican ŋulu eyakatar ŋituŋa ŋuluce.

⁶Aŋun, ileere akituro kec ikwa aciloit ŋina ke edokole, ileere aryenyeo kec ikwa ekaaso enapitae.

⁷Ebukunun aronis alotai kec, eyeete ikes a ŋinapaki akitiya ŋuna aronok.

⁸Ekyenatar ikes ŋituŋa ŋuluce ka irworosi ikes ŋakiro ŋuna aronok; iturosi ikes, ido etukete ŋakiro ŋunakisicanet ŋuluce.

⁹Irworosi ikes ŋakiro ŋuna aronok neni ka Akuj a ŋina eyai nakuj, ido irworosi ŋakiro ŋuna ka akituro kec neni a ŋituŋa.

¹⁰Aŋun, ewuapakis ŋituŋa ŋakiro kec, epuro ikes, ido mam aronis iteete ikes aneni kec.

¹¹Iŋitasi ŋulu aronok ebe, “Alipite eyenunia Akuj? Nyeyenuni Akuj ŋina eyai kidiama nooi ŋakiro yok.”

¹²Epite ŋol iŋes irworotor ŋulu aronok, eyakatar ikes ŋiboro ŋulu alalak, ido eryamununeete ŋice a ŋinakoloŋit.

¹³Eyokit mono ayoŋ akuwan kaŋ anakitiya aronis koŋin a? Aŋerit mono ayoŋ akisec koŋin a?

¹⁴Okoe Akuj, idau iyoŋ akiteryamun ayoŋ ŋican apaaran jwii, idau iyoŋ akisican ayoŋ a ŋinataparacu.

¹⁵Kerae otemarite ayoŋ, “Arubakini ayoŋ atamatamae ŋakiro ŋun,” pa karae ayoŋ ŋolo eyookino alokidiŋ ŋituŋa kon Akuj.

¹⁶Nai ŋinibore abunio ayoŋ otamatama epite ŋoloyenunet ŋakiro a ŋituŋa a ŋul, apotu toruwor aneni kaŋ ŋuna pa apatana ayenun,

¹⁷akitodol ŋina abunio ayoŋ olot nakibois ŋina asegan ŋina alo Kai ka Akuj. Abu nai oyenu ŋakiro ŋuna itiyakin neni a ŋituŋa a ŋulu aronok.

¹⁸Kire, iwuak iyoŋ ikes nakiboisyo ŋuna ecurut; imyek iyoŋ ikes elomarete nakinyasuno.

¹⁹Emunyaryo ikes atipei, emunyaryo ikes toŋopiyasi jik.

²⁰Ikwaan tokona ikes ka akiruja ŋina eŋopiyari ekyenyuni ituŋanan; ŋinibore inyounio iyoŋ Ekapolon, eŋopiyarete ikes.

²¹Ŋinibore aryebar ayoŋ alotau kaŋ, ŋinibore araakar ayoŋ ŋolo ejaluworo alotau kaŋ,

²²arae ayoŋ ebaŋ ka amam ibore ayeni; ekoni ayoŋ alokiŋaren kon etyaŋ ŋolo ebaŋaana.

²³Kikote neni daŋ, arubak ayoŋ ikirukit ka iyoŋ ŋapakio daadaŋ ka ikiuryarit iyoŋ ayoŋ.

²⁴Ikitenit iyoŋ ayoŋ a ŋakitatameta kon, ekaku, ikijaari iyoŋ ayoŋ tooma napolou.

²⁵Ŋae mono ikeŋarakinan kaŋ ice eyai nakuj, meere iyoŋ bon a? Aŋuna ikirukitor ayoŋ ka iyoŋ, mam ibore ice eitanit ayoŋ anakwap.

²⁶Epedori akuwan kaŋ ke etau kaŋ anyamun, nai Akuj erae agogoŋu kaŋ, iŋes bon eitanit ayoŋ ŋikaru ka ŋikaru.

²⁷Kire jik, edaunosi ŋulu ikiŋerito iyoŋ, imunyari iyoŋ ŋulu nyiwuapito ŋakiro kon.

²⁸Nai ani eruwor ayoŋ, ejok akikinyomit Akuj, akituruwor Ekapolon ŋolo etiron ekaiunan kaŋ ka alimor ŋiticisyo keŋ daadaŋ.