Read ngakarimojong Ŋikiru. 78 Bible Online

Ŋikiru. 78 - ngakarimojong bible

Ŋikiru. 78

¹Topupokisi, okoe ŋituŋa kaŋ, topupokisi ŋakiro ŋuna etatami ayoŋ, topupokisi ŋakiro ŋuna erworo ayoŋ.

²Erwori ayoŋ neni kus a ŋakitadapeta; alimori ayoŋ ŋakiro ŋuna ewuaitae ŋinapei koloŋ,

³ŋakiro ŋuna ikidau iwon akiirar ka ayenun, ŋakiro ŋuna adaut atapapaa yok alimokin iwon.

⁴Nyiwuayo iwon ŋakiro ŋun aneni a ŋidwe yok; elimokinio iwon ŋakiro ŋun neni a ŋanyameta a ŋuna eponito, ŋakiro ŋuna a ŋiticisyo a ŋulu apolok a ŋulu ke Ekapolon ka ŋuna ka apedor keŋ, ta ŋakiro ŋuna ka aumokin ŋuna abu iŋes kitiya.

⁵Abu iŋes kiwuak ŋakiciketa aŋuna aŋiletok a Yakob, abu iŋes kiwuak ŋikisila a Ŋisirael, ŋulu abu iŋes kicik atapapaa yok kitatama neni a ŋidwe kec;

⁶ikotere ŋanyameta ŋuna eponito eyenunete ikes, toyenut tari ŋidwe ŋulu idounio, ido ikes daŋ emaikina kitatama neni a ŋidwe kec.

⁷Aŋun, ikinyomete ikes neni ka Akuj, nyimuryakinete ikes ŋiticisyo ŋulu ka Akuj, nai iwuapete ŋakiciketa keŋ.

⁸Nyikwaanikinosi ikes ka atapapaa kec, anyamet ŋina a ŋasyanisya ka ŋikaŋerok, ŋulu pa etopoloorito Akuj alotai kec, ŋulu pa ekinyomito Akuj alotai kec.

⁹Apotu ŋikilyok ŋulu ke Epuraim ŋulu ayakatar ŋikaleŋeleŋe tobwaŋas akoloŋit ŋina ke ejie.

¹⁰Apotu ikes nyiricakis acamunet ŋina ka Akuj, apotu toŋero akiwuap ŋikisila ŋulu ka Akuj.

¹¹Apotu kimuryakis ikes ŋuna aris Akuj kitiya, apotu kimuryakis ikes ŋakiro ŋuna ka aumokin ŋuna abu Akuj kitoodik ikes.

¹²Abu Akuj kitiya ŋakujuwuanisya iteete atapapaa kec, anakwap a Ijipit, anakibois a ŋina a Soan.

¹³Abu Akuj totyak ŋakipi ka anam, kitoryo ikes kidiŋ nen todokasi; abu kitowo ŋakipi towua ikwa arwatata.

¹⁴Abu Akuj kiten ikes imukit ka adis naparan ka kiten ikes akuwar kya ka arira a akim.

¹⁵Abu Akuj kibel ŋatabab analoŋisat, inak ŋituŋa tomata ŋakipi ŋuna alalak ŋuna atya ŋuna ka akalele a ŋina apolon.

¹⁶Abu kitolomu akalele anataaba, kiteleleu ŋakipi lopite ŋolo eleleata ŋaŋololin.

¹⁷Nai apotu ikes torubakis eseceneneete neni ka Akuj, toŋero analoŋisat Akuj ŋina alokidiama nooi.

¹⁸Apotu ikes kiredakis akitem Akuj, iŋitasi ka agogoŋu akimuj ŋina eitanito ikes.

¹⁹Apotu ikes kirworo itoroniarito Akuj ebasi, “Epedori mono Akuj akitepetun akimuj analoŋisat a?

²⁰Ŋinibore aramya iŋes ataaba, apotu ŋakipi tolomut kiŋa, tolelyata ŋakalele nooi. Nai epedori mono iŋes ainakin iwon akimuj daŋ a? Epedori mono iŋes ainakin ŋituŋa keŋ akiriŋ a?”

²¹Ani iirari Ekapolon ŋakiro ŋuna erworosi ikes, abu toŋo nooi, abu toŋoik ŋiletok a Yakob ka abu anyunyura keŋ min neni a Ŋisirael, kiatakin, nooi,

²²anerae pa apotu ikes tonupa neni ka Akuj, kori kikinyoma atemar epedori Akuj alakun ikes.

²³Kikote neni daŋ, abu Akuj kisirwor kidiama, toŋaa ŋipukei ŋulu alokidiama,

²⁴abu Akuj tobuku kwap akimuj ŋina enyaritae Manna aŋuna a ŋituŋa kimuja, abu inak ikes akimuj ŋina anakuj.

²⁵Apotu ŋituŋa kimuja akimuj ŋina imujete ŋimalaikan; abu Akuj kiyakik ikes akimuj ŋina alalan.

²⁶Abu kimyek ekuwuam ŋolo alo Kide tokut anakuj, ido anapedor keŋ, abu kitukut ekuwuam ŋolo alo Kwap,

²⁷Abu Akuj tobuk kwap akiriŋ etya apuwa neni a ŋituŋa, tobukun ŋalurui ŋuna alalak nooi ŋuna atya asinyon ŋina anawae anam.

²⁸Abu Akuj tomeu ŋalurui ŋun todoto neni alomito ŋituŋa, pena lowaetin a ŋiemae kec daadaŋ.

²⁹Apotu ikes kimuja kimwoko nooi, anerae abu Akuj inak ikes akimuj ŋina eitanito.

³⁰Nai ani eriŋa ebobokinit ikes akimuj ŋin, eriŋa akimuj ŋin eyai nakitukwa kec,

³¹abu anyunyura ka Akuj min neni kec, abu Akuj toar ŋulu agogoŋ alokidiŋ kec, kitiditeu ekimar a ŋisorok a Ŋisirael.

³²Tari ŋina abunio Akuj kitiya ŋun daadaŋ, apotu ŋituŋa torubakis eseceneneete; tari ŋina abunio Akuj kitiya ŋaumonokineta keŋ, apotu ŋituŋa nyenupa neni ka Akuj.

³³Aŋun, abu Akuj kitasalu ŋirwa kec tojoŋoi atamunit, ido yau ŋinyas alorwa a ŋulu ka akiyar kec.

³⁴Apaki daadaŋ ŋina earya Akuj ŋice kec, aminasi ŋuluce aponenen neni ka Akuj akiŋaranakino, aminasi akienen ŋasecisya kec, potu kilipa Akuj iitanito nooi.

³⁵Atamununeete ikes atemar erae Akuj akaiunan kec, atamununeete ikes atemar erae Akuj ŋina alokidiama nooi akalakunan kec.

³⁶Nai erworosi ikes alyokonu neni ka Akuj, amam ŋakiro ŋuna ka akiyookino anakiro kec;

³⁷amam pa etopoloorito ikes Akuj alotai kec, amam pa ericito Acamunet kec ka Akuj.

³⁸Nai arae Akuj ŋina esyonon; abu kisyoni aronis kec, ido abu nyemunya ikes; abu a ŋinapaki kililiŋia aŋoit keŋ, ido abu nyenyunyurikin ŋituŋa keŋ.

³⁹Abu totamu atemar erae ikes ŋituŋa koŋin, ikwaan ikes ka ekieŋanu, ŋolo nyeboŋuni nabo.

⁴⁰Apotu ikes toŋero Akuj ŋapakio ŋuna alalak analoŋisat, apotu kitoŋoa Akuj ŋapakio ŋuna alalak analoŋisat.

⁴¹Apotu ikes toboŋonokis akitem Akuj, kitoŋoa Akuj ŋina Asegan, ŋina a Ŋisirael.

⁴²Apotu ikes nyerubakis etamunito apedor ŋina ka Akuj, kori akoloŋit ŋina alakunia Akuj ikes alomoe kec,

⁴³akoloŋit ŋina abunio kitiyaa ŋakujuwuanisya keŋ ŋuna apolok alo Ijipit ka ŋaumonokineta keŋ anakibois a ŋina a Soan.

⁴⁴Abu Akuj kituruwo ŋakipi aŋaŋololin a Ŋijipitian ŋaokot, nyepedosi ikes akimat ŋakipi aŋaŋololin kec.

⁴⁵Abu Akuj kiyakik ikes ŋicuc ŋulu alalak nooi, ŋulu apotu kisicana ikes nooi, abu Akuj kiyakik ikes ŋakidodoka ŋuna apotu kinyasa akwap a Ŋijipitian.

⁴⁶Abu Akuj kisirika ekutelek ŋikinyom kec, kisirika emaase ŋaraito ŋuna etato ikes.

⁴⁷Abu Akuj kinyasu ŋikito kec ŋulu ke epiini a ŋakako, kinyasu ŋikia kec ke ekuno.

⁴⁸Abu Akuj tomunya ŋaatuk kec a ŋakako, tomunya ŋamesekin kec a akireta.

⁴⁹Abu Akuj kisican ikes anaŋoit keŋ a ŋina aryenyaanan, tonyunyurikin ikes, toŋoik ikes aŋuna ka aronis kec ka todedeŋik ikes, kikwaanikin aŋoit keŋ, anyunyura keŋ ka adedeŋu keŋ ka ajore a ŋimalaikan a ŋulu enyasak.

⁵⁰Abu Akuj kitemok epite ŋolo itoŋoya ikes, abu nyimyek ikes, nai abu tomunya ikes a ŋidekesyo.

⁵¹Abu Akuj toar ŋikiyae daadaŋ alo Ijipit, toar ŋikiyae alokalya a daadaŋ alo Ijipit.

⁵²Nai abu yau ŋituŋa keŋ kiŋa alo Ijipit ikwa ŋamesekin; abu kiyok ikes analoŋisat ikwa esipan a ŋamesekin.

⁵³Abu Akuj kiten ikes ejok, aŋun, apotu ikes nyekuryaketa; nai abu anam kitamat ŋimoe kec.

⁵⁴Abu Akuj yau ŋituŋa keŋ ŋul nakwap keŋ ŋina asegan, nakwap ŋina a ŋikamukumukui, ŋina aris iŋes ketyaka aŋuna kec.

⁵⁵Abu Akuj kirita ŋituŋa ŋulu ka akwap a ŋin alokiŋaren ŋituŋa keŋ, ido tokorak akwap kec neni a ŋikabilae a Ŋisirael toruwor ŋina kec; kisiboik ŋikabilae a Ŋisirael lorerya a ŋituŋa a ŋul.

⁵⁶Nai apotu ikes kitemo Akuj, toŋero Akuj ŋina alokidiama nooi; apotu nyiwuapa ŋakiciketa keŋ.

⁵⁷Apotu ikes nyitopoloosi Akuj ka nyenupa neni ka Akuj ikwapei atapapaa kec, apotu ikes toruwor ŋulu pa ekinyomit Akuj kikokis akau a ŋikaleŋeleŋe ŋina emagul.

⁵⁸Apotu ikes kitoŋoa Akuj aŋuna a ŋakiboisyo kec aŋuna elipyata neni a ŋakujo, apotu ikes kitoŋoa Akuj aŋuna a ŋitorubei a ŋakujo kec.

⁵⁹Ani iŋolikini Akuj ŋakiro kec, abu toŋo nooi; toŋer Ŋisirael jik.

⁶⁰Abu kimyek eema keŋ ŋolo ayai Silo, eema ŋolo sek ayakar iŋes kaapei ka ŋituŋa.

⁶¹Abu kimyek Asaduku ŋina ka Acamunet keŋ eayete ŋimoe, kimyek emacar ŋolo ka apolou keŋ emini napedor a ŋimoe.

⁶²Abu kipotok ŋituŋa keŋ neni a ŋimoe kec; abu iŋes toŋoit nooi ŋituŋa keŋ.

⁶³Aponi tomunyarae ŋisorok a ŋituŋa keŋ alojie, todaunos ŋikilyok ŋulu iisete ŋasorok a ŋituŋa keŋ;

⁶⁴aponi ŋisacaradotin kec toarae, todaun ŋapuseru kec apaki ŋinakigworyet.

⁶⁵Tonyou nai Ekapolon esibit ŋinibore kejotoo, tonyou lopite ŋolo enyounio ekajion ŋolo itaŋasete ŋagwe.

⁶⁶Abu Akuj tobwaŋ ŋimoe keŋ toboŋosi, abu kiteryamu ikes ŋileec ŋulu nyedaun.

⁶⁷Abu nai Akuj toŋer ŋiletok a Yosepu, abu nyeseu ekabila ŋolo a Epuraim;

⁶⁸nai abu toseu ekabila a Yuda, toseu emoru Sion ŋolo abu iŋes tominak nooi.

⁶⁹Abu Akuj todukok nen Akai keŋ, ikwaan ke ere keŋ ŋolo anakuj; abu kitogogoŋ Akuj keŋ lopite ŋolo abunio tosubunia akwap erae ŋina egogoŋ ŋikaru ka ŋikaru.

⁷⁰Abu Akuj toseu Daudi eketiyan keŋ yau iŋes anadakar a ŋamesekin;

⁷¹yau iŋes anaraakau ekeyokon ŋolo a ŋamesekin, kituruwo iŋes ekeyokon ŋolo a ŋituŋa keŋ a ŋulu a Isirael.

⁷²Abu Daudi topolok ŋituŋa ŋul, ke etau a ŋolo arimaanan, torik ikes alotooma apiiryanut.