Read ngakarimojong Ŋikiru. 79 Bible Online

Ŋikiru. 79 - ngakarimojong bible

Ŋikiru. 79

¹Okoe Akuj, apotu ŋituŋa a ŋakwapin akirem akwap kon, amunaasi ikes Akai kon ŋina asegan, abwaŋabwaŋaasi ikes Yerusalem aruwor ŋamoru ŋuna etukosi.

²Eturuwosi ikes ŋawat a ŋituŋa kon akimuj a ŋataruk, eturuwosi akimuj a ŋityaŋ a ŋulu ka ariet.

³Abukosi ikes ŋaokot a ŋituŋa kon, aleleiyasi alo Yerusalem daadaŋ, adaun ituŋanan enuki ŋituŋa kon ŋulu aari.

⁴Ikiruwor isua ŋulu ikibolyatar ŋikidunyet kosi, ikiruwor isua ŋulu ikijamuwarito ka ŋulu ikikyenatar ŋikidunyet kosi.

⁵Apaki ŋina etya ai okoe Ekapolon irubakinia iyoŋ ikiŋoikinit isua? Irubakini mono iyoŋ ikiŋoikinit isua ŋikaru ka ŋikaru a? Erubakini mono alilit kon enepi ikwa akim a?

⁶Kitoodik anyunyura kon nakwapin ŋuna ikiŋerito iyoŋ, kitoodik anyunyura kon napukasinei ŋuna nyilipete neni kon,

⁷anerae aara ikes ŋituŋa kon, eturuwosi ikes akwap kon acaryoit.

⁸Nyimarak neni kosi asecit atapapaa kosi; ikilipi ikisyon iyoŋ isua atipei, anerae adaun aneni kosi akigeno daadaŋ.

⁹Kiŋarakinae isua, okoe Akuj akaiunan kosi, ikotere itopolooryo ekiro kon, tolakunae isua ka kisyoni ŋasecisya kosi; ikotere itopolooryo ekiro kon.

¹⁰Kaanukiro imyekinia iyoŋ ŋituŋa a ŋakwapin iŋitasi ebe, “Ai mono eyai Akuj kec?” Kitoodik ŋakwapin iteo isua atemar inyaŋa iyoŋ ŋiketiyak kon ŋulu aponi toarae.

¹¹Kiira aumen a ŋulu eyakasi lojera, ido anapedor kon a ŋina apolon nooi, tolacak ŋulu etubokinitae atwanare.

¹²Toboŋok akisican ŋikidunyet kosi ŋarwa ŋakanikaarei, aŋuna a ŋiyany a ŋulu ikiyenyata ikes iyoŋ Ekapolon.

¹³Aŋun nai, ikiponi isua ŋituŋa kon, ŋamesekin ŋuna ka adakari kon, akipur iyoŋ ŋikaru ka ŋikaru; ameun ananyamet ka apei tari nanyamet ŋinace, ikirubakini isua ikipuro iyoŋ.