Read ngakarimojong Ŋikiru. 86 Bible Online

Ŋikiru. 86 - ngakarimojong bible

Ŋikiru. 86

¹Okoe Ekapolon, topupokinae ayoŋ, ido toboŋokinoe ayoŋ, anerae arae ayoŋ ŋolo a ŋican ka ayakar akiitanit,

²Toiunae ayoŋ, anerae ainakina ayoŋ neni kon. toiunae ayoŋ eketiyan kon ŋolo ekekinyomit iyoŋ. Irae iyoŋ Akuj kaŋ,

³okoe Ekapolon, kisyoni ayoŋ, anerae akanyarit ayoŋ iyoŋ apaaran jwii.

⁴Yau alelyan neni ke eketiyan kon, anerae neni kon, okoe Ekapolon elipi ayoŋ.

⁵Irimaana ka isyoniono iyoŋ, okoe Ekapolon, elal amina kon ŋina nyiryaŋiryaŋa aŋuna a daadaŋ a ŋulu ilipete neni kon.

⁶Okoe Ekapolon, Kiira akilip kaŋ; topupok akigworo kaŋ aŋuna ka akiŋarakino.

⁷Akanyaraenene ayoŋ iyoŋ akoloŋit ŋina ayakar locan, anerae ikiboŋokini iyoŋ ayoŋ.

⁸Okoe Ekapolon, emam anakujo akuj ŋina ikwaan ka iyoŋ; mam ŋiticisyo ikwaan ka ŋulu kon.

⁹Ibu iyoŋ tosub ŋituŋa daadaŋ, aŋun epote ikes akilip neni kon, okoe Ekapolon; epote ikes akitopoloor ekiro kon;

¹⁰anerae ipol iyoŋ nooi ka itiyae ŋiticisyo ŋulu ka aumokin; iyoŋ bon irae Akuj.

¹¹Okoe Ekapolon, kitatamae ayoŋ ŋuna icamit iyoŋ ayoŋ etiya, ikotere arubakini ayoŋ ewuapit ŋakiro kon ŋuna a kire; inakinae ayoŋ akitopoloorit ekiro kon a etau kaŋ a daadaŋ,

¹²Ekepuri ayoŋ iyoŋ, okoe Ekapolon Akuj kaŋ, a etau kaŋ a daadaŋ; etopoloori ayoŋ ekiro kon ŋikaru ka ŋikaru,

¹³anerae epol nooi aŋuna kaŋ amina kon ŋina nyiryaŋiryaŋa; idau iyoŋ alakun ayoŋ anakibois a ŋikatwak.

¹⁴Okoe Akuj, akalosikinito ayoŋ ŋiketurok; iwarit ajore a ŋikaryenyaanak akiar ayoŋ; erae ikes ŋituŋa ŋulu nyikimisito iyoŋ.

¹⁵Nai iyoŋ, okoe Ekapolon, irae ŋolo esyonon ka Akuj ŋina arimaanan, ŋina nyiŋoi atipei, ŋina elal amina ŋina nyiryaŋiryaŋa ka akikinyoma.

¹⁶Kiŋolikinae ayoŋ, ido torimakinae ayoŋ; inakinae ayoŋ ŋolo arae eketiyan kon agogoŋu kon, toiunae ayoŋ ŋolo arae lokoku a aketiyan kon.

¹⁷Kitoodikinae ayoŋ ajokis kon, ikotere ŋimoe kaŋ iŋolikinete, ido kiruma ŋileec, anerae iyoŋ, okoe Ekapolon, ikiŋarak ayoŋ ka isirworiu ayoŋ.