Read ngakarimojong Ŋikiru. 90 Bible Online

Ŋikiru. 90 - ngakarimojong bible

Ŋikiru. 90

¹Ekapolon, irae iyoŋ neni iboiyere isua ŋinapei ananyameta a daadaŋ.

²Eriŋa ŋimoru nyitiyauna, kori eriŋa ŋalup ka akwap nyetakanuna ikwapei eyakatar, irae iyoŋ Akuj ŋina a jik.

³Ikinyakanari iyoŋ isua, ikituruwo nabo ŋalup, ibala, “Toboŋosi nalup, iyes ŋituŋa.”

⁴Ŋikaru aliput aneni kon, ikote akoloŋinit ŋina bien, kori abaet ŋina ka akuwar.

⁵Ikilemanari iyoŋ isua atipei, ikikwaan isua ka akiruja, kori ŋinya ŋulu elibak taparacu ani esoŋakini akoloŋ torinyiyosi;

⁶ŋisaae ŋulu ka ataparacu, elibak ikes ka etiitiyete nooi; ani ŋisaae ŋulu esoŋakinia akoloŋ, torinyiyosi ka tookiyosi.

⁷Ikimunyanari iyoŋ isua anaŋoit kon; ikitubulit isua anyunyura kon.

⁸Ileerete aneni kon ŋasecisya kosi, ite iyoŋ tari ŋasecisya kosi ŋuna ikitiyae isua anakimunono.

⁹Ikiya isua ŋirwa daadaŋ ŋulu ka akiyar kosi nanyunyura kon; edaunun ŋirwa ŋulu ka akiyar kosi atipei ikwa ekuwuam ŋolo ieŋunio kiŋa.

¹⁰Ikiyari isua akitodol ŋikaru ŋatomonikanikaarei, kori ŋatomonikanikauni erae kikigogoŋ; tari alokaru a ŋul daŋ, ikiryamunit isua ŋican ka ikiyaloloŋi nooi; edaunun ŋikaru ŋul atipei, ido oŋopiyasi isua jik.

¹¹Ŋae mono tokona eyeni apedor ŋina ka aŋoit kon? Anerae ededeŋ anyunyura kon ikwaan ka ekabule ŋolo ebuni aneni kon.

¹²Aŋun, kitatamae isua oyenete atemar euruwuana akiyar kosi, ikotere ikiyakaunor aosou kon anakiyar kosi.

¹³Okoe Ekapolon, tojoŋo anyunyura! Apaki ŋina etya ai iyai iyoŋ inyunyura? Kisyoni ŋiketiyak kon.

¹⁴Kilelebikinae isua a ŋinataparacu amina ŋina nyiryaŋiryaŋa; ikotere isua oeoto ka olelyana ŋirwa daadaŋ ŋulu ka akiyar kosi.

¹⁵Inakinae isua tokona alakara ŋina alalan, alakara ŋinapei etya akiyaloloŋ ŋina ibu iyoŋ ikiinak isua alokaru a daadaŋ a ŋulu ikiyakar isua locan.

¹⁶Kitoodik ŋiketiyak kon ŋiticisyo kon ka kitaanyuwa ŋiletok kec apedor kon ŋina ailiilon.

¹⁷Toyai neni yok ajokis ŋina ke Ekapolon a Akuj yok ka ikitabar iwon a etic a ŋolo a ŋakan yok; okoe Akuj, kitabarae isua a etic a ŋolo a ŋakan kosi.