Read ngakarimojong Ŋikiru. 92 Bible Online

Ŋikiru. 92 - ngakarimojong bible

Ŋikiru. 92

¹Ejok alakar neni ke Ekapolon, ejok aeikin ŋieosyo neni kon, okoe Akuj ŋina alokidiama nooi;

²ejok akisera amina kon ŋina nyiryaŋiryaŋa a ŋina taparacu, ejok akisera arimao kon a ŋinakoloŋit nakwaare,

³ejok aeo neni kon isitiyao apilu ka aduŋgu, ejok aeo neni kon eramyo agita,

⁴anerae ikitalakarit iyoŋ ayoŋ a ŋiticisyo kon, okoe Ekapolon; aeo ayoŋ alelyani aŋuna a ŋiticisyo a ŋulu itiya iyoŋ.

⁵Okoe Ekapolon, erae ŋiticisyo kon ŋulu ka aumokin! Eumokina nooi epite ŋolo itamya iyoŋ!

⁶Erae nu ŋuna nyepedori ituŋanan ŋini imasimasit ayenun, nyepedori ŋini abaŋaanan ayenun,

⁷tari kelalata ŋulu aronok ikwa ŋinya ka kelalata ŋulu itiyaete aronis daadaŋ, emunyari Akuj ikes nyetakanut nabo jik.

⁸Nai, ikitopolooritae iyoŋ okoe Ekapolon ŋikaru ka ŋikaru.

⁹Okoe Ekapolon ikiyeni isua atemar emunyaryo ŋimoe kon, ielaryo daadaŋ ŋulu itiyaete aronis.

¹⁰Nai ikituruwori iyoŋ ayoŋ ŋolo agogoŋ ikwa emaanik ŋolo adedeŋan; ikiterereŋi iyoŋ ayoŋ, ikiinak alakara.

¹¹Eŋolikini ayoŋ akilouno a ŋimoe kaŋ; eirari ayoŋ akigworo a ŋimoe kaŋ a ŋulu itiyaete aronis.

¹²Epitunete ŋulu iyookino lopite ŋolo episyata ŋikito a ŋiŋolya epoloete emam ŋace lopite ŋolo epolooto ŋikito a Cedar ŋulu eya Lebanon.

¹³Ikwaanikin ikes ibusak eya Kai ke Ekapolon ka ŋikito ŋulu edupitae diyete Akai a Ekapolon, ŋulu ibusak analapatui aŋuna alo Kai ka Akuj yok.

¹⁴Ŋikito ŋulu erubakinete erayete tari kemojoŋ ka ŋikito ŋulu erubakinete elibak ka egogoŋ,

¹⁵itoodiunito ŋun atemar iyookino Ekapolon ka atemar erae iŋes ekaiunan kaŋ, iyookino iŋes aneni kaŋ.