Read ngakarimojong Ŋikiru. 94 Bible Online

Ŋikiru. 94 - ngakarimojong bible

Ŋikiru. 94

¹Okoe Ekapolon, iyoŋ Akuj ŋina enyaŋan, iyoŋ Akuj ŋina enyaŋan; kisileereu aŋoit kon.

²Tonyou kareca, okoe ekatubon a ŋakiro a ŋituŋa, kisican ŋiketurok lopite ŋolo emaikina kisicanere.

³Okoe Ekapolon, apaki ŋina etya ai erubakiniata ŋulu aronok? Apaki ŋina etya ai erubakiniata ikes elakara?

⁴Irworosi ikes ŋakiro ŋuna ka akituro; iturosi ŋulu itiyaete aronis daadaŋ.

⁵Okoe Ekapolon, amunyasi ŋiketurok ŋituŋa kon, isicanete ŋiketurok ŋituŋa ŋulu erae ŋulu kon.

⁶Earete ŋapuseru ka ŋituŋa ŋulu erae ŋigelae, earete ŋikokyok,

⁷ido ebasi, “Nyikite Ekapolon iwon; nyeyeni Akuj a Isirael ŋuna ikitiyae iwon.”

⁸Toyenutu nu, iyes ŋulu a ŋimasimas, iyes ŋibaŋaanotin, ori mono iosunioto iyes?

⁹Nyepupi mono Akuj ŋina abu kiwuak akit a? Nyite mono Akuj ŋina abu kiwuak akoŋu a?

¹⁰Nyepedori mono Akuj ŋina isicani ŋakwapin akisican ŋituŋa ŋul a? Nyeyakar mono Akuj ŋina itatami ŋituŋa aosou a?

¹¹Eyeni Ekapolon ŋatameta a ituŋanan; eyeni iŋes atemar erae ŋacaryo.

¹²Okoe Ekapolon, elakara nooi ŋituŋa ŋulu idai iyoŋ, ŋulu itatami iyoŋ alotooma ŋikisila kon.

¹³Iinanakini iyoŋ ikes akieŋar alocan alorwa a ŋulu a ŋican, akitodol ŋina imunyarya iyoŋ ŋulu aronok kitoloma kwap,

¹⁴anerae nyeŋeri Ekapolon ŋituŋa keŋ; nyimyekini iŋes jik ŋituŋa ŋulu erae ŋulu keŋ.

¹⁵Eyakaun nabo akitub ŋakiro anakiyookino aŋuna a ŋulu iyookino, ido iwuapete daadaŋ ŋulu iyookino alotai kec akiyookino ŋin.

¹⁶Ŋae abu towo aŋuna kaŋ akitoroniyar ŋulu aronok? Ŋae abu oriwo ka ayoŋ, kitoroniya ŋulu itiyaete aronis?

¹⁷Ani kerae nyekeŋarakinit Ekapolon ayoŋ, kalomarit ayoŋ atipei nakibois a ŋikatwak ŋina eta cek.

¹⁸Ŋinibore abunio ayoŋ otamakinia ebe, “Akaapiki ayoŋ atwanare,” ibu iyoŋ okoe Ekapolon, anamina kon a ŋina nyiryaŋiryaŋa ikiu ayoŋ.

¹⁹Ŋinibore abunio ayoŋ otamatama nooi alocan kaŋ, ibu iyoŋ ikisirworiu ayoŋ, ikiinak alelyanu.

²⁰Epedorete mono ŋikepukak ŋulu aronok akiri ka iyoŋ, ŋikepukak ŋulu nyiwuapito ŋikisila a?

²¹Etukonokin ikes iwapei imanito ŋulu iyookino, ido etubonokinete ŋulu nyesecito atwanare.

²²Nai Ekapolon iŋes aruwor aduketait kaŋ ŋina ajio, Akuj kaŋ iŋes aruwor neni aiunor ayoŋ.

²³Isicani Akuj ikes aŋuna a ŋasecisya kec, emunyari Akuj ikes aŋuna ka aronis kec; emunyari Ekapolon Akuj yok ikes.