Read ngakarimojong Ŋikiru. 96 Bible Online

Ŋikiru. 96 - ngakarimojong bible

Ŋikiru. 96

¹Toeikisi neni ke Ekapolon eete ŋolokitete; toeikisi neni ke Ekapolon iyes ŋituŋa daadaŋ.

²Toeikisi neni ke Ekapolon, kipuro ekiro keŋ; kiserata ŋuna ka aiuno keŋ a ŋinakoloŋit.

³Kiserata apolou keŋ neni a ŋituŋa, kiserata ŋiticisyo keŋ ŋulu ka aumokin neni a ŋituŋa daadaŋ,

⁴anerae epol nooi Ekapolon, ido emaikina kipuroe iŋes nooi, emaikina kitopolooroe iŋes nooi akilo ŋakujo daadaŋ.

⁵Erae ŋakujo daadaŋ ŋuna eyakatar ŋituŋa ŋacaryo, nai Ekapolon iŋes abu tosub kidiama.

⁶Erae iŋes ŋolo itopolooritae ka eiliili apolou keŋ nooi; eyakasi nakibois keŋ ŋina asegan agogoŋu ka akibuses.

⁷Kipuro Ekapolon, iyes ŋituŋa daadaŋ ŋulu ka akwap; kipuro iŋes aŋuna ka apolou ka aŋuna ka agogoŋu keŋ.

⁸Kipuro iŋes aŋuna ka apolou a ŋina emaikina ipurore ekiro keŋ; yautu ŋainakineta, ido potu Kai keŋ.

⁹Kilipa neni ke Ekapolon alotooma akitopoloorit iŋes anasegis keŋ, tomarana alokiŋaren Ekapolon, iyes ŋituŋa daadaŋ anakwap.

¹⁰Tolimokisi ŋakwapin daadaŋ ebe, “Erae Ekapolon Erwosit! esubunitae akwap egogoŋ nooi, emam ŋini epedori akisiyotokin; etubokini Ekapolon ŋituŋa alotooma akiyookino.”

¹¹Emaikina ŋisubuna ŋulu anakuj tolelyana, emaikina ŋisubuna ŋulu alokwap tolakaros; emaikina anam kiruruma ka ibore daadaŋ ŋini eyai tooma keŋ.

¹²Emaikina ŋimanikorin tolakaros ka ibore daadaŋ ŋini eyai tooma kec. Eeikinete nai ŋikito a ŋamon a alelyanu

¹³alokiŋaren Ekapolon, anerae ebuni iŋes atubokin ŋituŋa. Etubokini iŋes akwap anakiyookino ka etubokini iŋes ŋituŋa alotooma ŋuna a kire.