Read ngakarimojong Ŋikiru. 97 Bible Online

Ŋikiru. 97 - ngakarimojong bible

Ŋikiru. 97

¹Erae Ekapolon Erwosit! Emaikina ŋituŋa tolelyana; emaikina ŋituŋa ŋulu iboiyete alodiyete ŋanamyo tolakar.

²Eyakasi nawaetin keŋ ŋidouwon ka akiryonut ŋina iryono cuc ipukat iŋes alotooma akiyookino ka ŋuna a kire.

³Iŋarenikinit akim iŋes, enyamuwanari ŋimoe keŋ alowaetin a daadaŋ.

⁴Itacauni akimilyaa keŋ akwap; iŋolikini akwap akimilyaa ŋin, ido tomaranik.

⁵Etalarete ŋimoru alokiŋaren Ekapolon, etalarete ikes ikwa amanok alokiŋaren Ekapolon ŋolo ka akwap a daadaŋ.

⁶Iseraete ŋimalaikan ŋuna ka akiyookino keŋ; iteete ŋituŋa daadaŋ apolou keŋ.

⁷Isurumitae daadaŋ ŋileec ŋulu ilipete neni a ŋakujo, ikes ŋulu iturosi aŋuna a ŋakujo aŋunacaryo a ŋun; iyes ŋakujo daadaŋ toryediko, kilipa neni ka Akuj!

⁸Eirasi ŋituŋa a Sion ŋakiro ŋun, ido elakara, elakara daŋ ŋituŋa ŋulu alotaunio a Yudaya, Okoe Ekapolon elakara ikes aŋuna a ŋatubokineta kon;

⁹anerae iyoŋ, okoe Ekapolon irae ŋolo alokidiama nooi, ipukat iyoŋ akwap daadaŋ; ikitopolooritae iyoŋ nooi akilo ŋakujo daadaŋ.

¹⁰Emina Ekapolon ŋulu eŋerito aronis, iyokit iŋes akiyar a ŋikanupak keŋ; eiununui iŋes ikes anapedor a ŋulu aronok.

¹¹ebuneeneajokis neni a ŋulu iyookino, ebuneenealelyanu neni a ŋulu iyookino alotai.

¹²Tolelyana neni ke Ekapolon, iyes ŋulu iyookino, kipuro iŋes itamunito ekiro keŋ ŋolo asegan.