Read ngakarimojong Ŋakit. 13 Bible Online

Ŋakit. 13 - ngakarimojong bible

Ŋakit. 13

¹Emina ikoku ŋini aoson akiiranar ŋakiro ŋuna etemari papa keŋ toesik akitiya, nai nyemina eketuron acamunun aesikin ŋuna aronok ŋuna ebookoi toesik.

²Eryamuni ituŋanan ŋiboro ŋulu ajokak anajokis a ŋakiro a ŋuna irworo iŋes, nai erae akiitanit a ŋulu nyikinyomitae ŋinakitiyaet ŋuna nyiyookino.

³Ituŋanan ŋini ecoikinit ŋuna irworo iŋes eiunit akiyar keŋ, ituŋanan ŋini nyecoikinit ŋuna irworo iŋes, emunaari akiyar keŋ.

⁴Eyakatar ŋikalanyanotin ekibure ŋolo apolon nooi, nai mam ibore eryamununeete, eryamuni ituŋanan ŋini itiyae ka agogoŋu ibore daadaŋ ŋini iitanit.

⁵Eremokino ŋituŋa ŋulu iyookino akirworo alyokonu, nai ŋakiro ŋuna irworosi ŋulu aronok, erae ŋuna a ŋileec ka ŋuna nyejokak.

⁶Iyokiunit akiyookino ituŋanan ŋini iwuapit ŋuna ka akiyookino, nai elemari asecit ŋulu aronok.

⁷Itusubuna ŋituŋa ŋice ŋikabarak, tomam bo ibore eyakatar, itusubuna ŋice ŋikulyakanotin, toyakatar bo ebari ŋolo alalan nooi.

⁸Erae ebari ibore ŋini elakuni ituŋanan alocan, nai nyitubulito ŋican ŋul ŋikulyak.

⁹Ikwaan ŋulu iyookino ka akica ŋina ecai nooi, nai ikwaan ŋulu aronok ka akica a etaa ŋina irwapirwapi ecamit aduŋere.

¹⁰Nakituro iŋes elomunitotor ŋiburasyo, nai eryamun aosou aneni a ŋulu ecamunete ŋuna ebookoi kitiyata.

¹¹Ebari ŋolo eryamunio ka atipei, eŋopiyari atipei, nai ikes ŋulu iasete ebari kec iwadio, iwadio, iatakinete ebari kec tolalaar.

¹²Ani pa keryamu ituŋanan ibore ŋini sek egeno iŋes aryamun, epete ŋikarune lotau keŋ, nai ani keryamu ituŋanan ibore ŋini ecamit iŋes aryamun, ilelebikin alelyanu lotau keŋ.

¹³Ituŋanan ŋini ejamuwari ŋuna ebookoi kitiya, eyauni ŋican nakuwan keŋ, nai ituŋanan ŋini iwuapit ŋakiciketa, eryamuni akitalakaret.

¹⁴Erae akitatam a ŋikaosok eitanit ŋolo ka akiyar, einakinete ŋakiro a ŋikaosok ituŋanan akiŋer akitiya ŋuna eaunete atwanare.

¹⁵Ani keyakar ituŋanan ayenut ŋina ejok, itojokyo iŋes, nai ŋuna iwuapito ŋulu emamukatar anupit, erae ŋuna ka amunyaro kec.

¹⁶Itiyaete ŋikaosok ibore daadaŋ anapiiryanut, nai isileereunito ŋibaŋaanotin ŋuna itiyaete ikes a abaŋao kec.

¹⁷Eaununui ekiyakia ŋolo aronon ŋican, nai eaununui ekiyakia ŋolo ikinyoma ekisil.

¹⁸Akulyako ka amamukau ajokis alotuŋa a ŋuluce, erae ŋuna a ŋulu eŋerito akitatamo akitiya ŋuna ajokak. nai itopoloorete ŋituŋa ituŋanan ŋini ecamit akitatamo toesik akitiya ŋuna aronok.

¹⁹Erae alelyanu a etau akitiyakin ŋuna sek iitanit akitiyakin, nai erae asiilyo aneni a ŋibaŋaanotin aesikin akitiya aronis.

²⁰Ituŋanan ŋini erukito ka ŋikaosok, eruwor ŋini eos, nai ituŋanan ŋini erukito ka ŋibaŋaanotin, eryamuni ŋican.

²¹Iwuapito ŋican ŋikasecak, nai akitiya ŋinibore ejok, eauni eropit neni a ŋulu iyookino.

²²Eesyanakinete ŋituŋa ŋulu ajokak ŋiboro kec toryamut ŋipapae kec, nai idyasitae ebari a ŋikasecak erae ŋolo a ŋulu iyookino.

²³Epedori emanikor a ekulyakit akira ŋikinyom ŋulu alalak, nai isunyaryo atipei alopitesyo a ŋulu nyiyookino.

²⁴Ituŋanan ŋini nyisicani ikoku keŋ, nyemina ituŋanan ŋin ikoku keŋ, nai kemina ituŋanan ikoku keŋ, emaikina iŋes kisican ikoku ŋin erae kitiya ŋuna aronok.

²⁵Eyakatar ŋulu iyookino akimuj ŋina itemokino ŋina ecamito ikes, nai eororete ŋakookyes a ŋulu aronok.