Read ngakarimojong Ŋakit. 20 Bible Online

Ŋakit. 20 - ngakarimojong bible

Ŋakit. 20

¹Ituruwori akimat epiini ŋolo alalan ituŋanan ibaŋaanot, ituruwori akimat ŋagwe ŋuna alalak nooi ituŋanan ikacalan, ituŋanan daadaŋ ŋini itali akimat epiini, kori ŋagwe, erae ŋini nyeos.

²Ikoni anyunyura a erwosit neni irurumaa eŋatuny, ituŋanan daadaŋ ŋini einakini erwosit akiŋo, etwaniyari akiyar keŋ.

³Erae ibore ŋini ajokan aneni a ituŋanan akiŋer ejie, nai ikirikirakinete ŋibaŋaanotin akiburakin.

⁴Nyitaete ŋikalanyanotin tari apaki ŋina emaikina kitaere, aŋun, ani elosete akilem, toŋopik ibore iŋolikinete.

⁵Ikote ŋatameta aneni a ituŋanan ŋakipi ŋuna eyakasi neni ecukul nooi ŋuna ekuruworo aokun, nai epedori ituŋanan ŋini epiiryana aokun ŋakipi ŋun a nen.

⁶Iseraete ŋikalalak atemar ikiyakar amina, nai ŋae epedori aryamun ituŋanan ŋini kire ikinyoma?

⁷Iboi ituŋanan ŋini iyookino anakiyar a ŋina emam ŋuna itoroniyaritere, ido eryamunete ŋidwe a ituŋanan a ŋin ŋarereŋisyo ekaku a ikauruunan kec.

⁸Ani kiboikin erwosit lokicoloŋ keŋ ŋolo ipukator ecamit akitub ŋakiro, epedori ayenun ŋakiro ŋuna aronok anakitere epite ŋolo eyakatar ŋituŋa.

⁹Ŋae epedori alimun ebe, “Adau ayoŋ alemar aronis alotau kaŋ; emam asecit eyai neni kaŋ?”

¹⁰Eremokino Ekapolon ituŋanan ŋini isitiyae akipimet ŋina nyiyookino, kori ioket ŋini nyiyookino, erae aneni a Ekapolon ŋiboro ŋul asiilyo.

¹¹Epedorete ŋidwe daŋ aruwor ŋulu eyenen anakiro a ŋuna itiyaete ikes, erae kerae ŋuna itiyaete ikes ŋuna ajokak ka ŋuna iyookino.

¹²Adau Ekapolon ainakin ituŋanan, ŋaki ŋuna epupyo ŋakiro ka ŋakonyen ŋuna iteo ŋinibore.

¹³Nyimina ajot, iruwor iyoŋ ŋini a ŋican; torubak ikenyi itiyae, iryamuni iyoŋ akimuj ŋina alalan.

¹⁴Eminasi ŋikagyelak akiŋuruŋura ebasi “Elal etyae a ŋisiliŋa, elal etyae a ŋisiliŋa!” Nai ani erotokini kegyel ibore, kiturokin aŋuna aŋisiliŋa a ŋulu apiyanun kipigau iŋes ibore.

¹⁵Ani kiyeni iyoŋ ŋakiro ŋuna irworo, iyakar iyoŋ ibore ŋini ajokan nooi ŋini iloit tari egolid ka ŋamoru ŋuna epol egyelit.

¹⁶Ani kebaŋaaniar ituŋanan kiik awoikin akitac edeni a ituŋanan a ŋini erae igelaanot, emaikina tolemarae ibore a ituŋanan a ŋin kiŋadae tari ŋina etacere ibore ŋini edeniyoritae.

¹⁷Ebob akimuj ŋina imuji ituŋanan anamodyanakin ŋuluce, nai ekaku enyami ituŋanan ŋin ŋalup.

¹⁸Kiŋit ŋituŋa ŋuluce ikilimokis iyoŋ epite itiyaa ŋuna iye iyoŋ akitiyakin, tolot lojie iwuapit ŋuna ikilimokin atemar kiwuap.

¹⁹Epedori asyomar ŋuluce akisileereun ŋakiro ŋuna imunono, aŋun, nyimina arukit ka ituŋanan ŋini itobobot akituk.

²⁰Ani kicen iyoŋ papa kon, kori toto kon, elomari akiyar kon locan, lopite ŋolo elemarere etaa ŋolo ecai aneni iryono cuc.

²¹Ebari ŋolo eryamunio ka atipei anakisyakinet, eruwor ekaku ŋolo nyiterereŋitoe.

²²Nyitema ebe, “Etiyae ayoŋ aronis neni a ŋini etiya aronis neni kaŋ;” kikinyom Ekapolon, ikiŋarakini iŋes iyoŋ.

²³Eremokino Ekapolon ituŋanan ŋini isitiyae akipimet ŋina nyiyookino. nyejokak aneni a Ekapolon ŋituŋa ŋulu isitiyaete ŋakipimeta ŋuna nyiyookino.

²⁴Ekapolon iŋes iyokit ituŋanan aneni itori, alipite nai epedorya ituŋanan ayenun erot keŋ a ilope?

²⁵Totamatama mono ejok eriŋa iyoŋ nyiikina ainakin Akuj ibore, acepaki itemari iyoŋ ekaku ebe, “Kerae bo nyeikinit daŋ.”

²⁶Epatana erwosit ŋolo eos ayenun ituŋanan ŋini itiyat ŋuna aronok, ido isicani erwosit ituŋanan ŋin emam akisyon.

²⁷Erae etau etaa ŋolo a Ekapolon anakiyar a ituŋanan, isitiyae Ekapolon etau a ituŋanan ayenununia ŋuna eya neni a ituŋanan.

²⁸Epedorete amina ka akikinyoma akiturubakin erwosit ipukat emam ŋace, iturubakini akiyookino iŋes eyai lokicoloŋ emam ŋican.

²⁹Agogoŋu iŋes erae ajokis a ŋisorok, ŋakorwo ikes einakinete ŋituŋa ŋulu apoloor aruwor ŋulu ekeritae.

³⁰Ani kidici ituŋanan toryamu ŋaruma ka ŋajemei, epedori aesikin akitiya aronis, ani kedai ituŋanan, epedori akikoŋor ŋuna aronok ŋuna eya lotau keŋ.