Read ngakarimojong Ŋakit. 21 Bible Online

Ŋakit. 21 - ngakarimojong bible

Ŋakit. 21

¹Erae Ekapolon itenit ŋatameta a erwosit, itenit iŋes ŋatameta a erwosit lopite ŋolo itenikinia ayonae ŋakipi toleleiya neni ecamit iŋes.

²Ejokak ŋiticisyo daadaŋ anakonyen a ituŋanan a ŋini itiyae ŋiticisyo, nai Ekapolon iŋes ite ŋuna eya lotau a ituŋanan.

³Akitiya ŋuna iyookino ka ŋuna ajokak, erae akitiya ŋuna ecamit Ekapolon ainanakin ŋina epol nooi akilo amuronot neni a Ekapolon.

⁴Akitopolooro bon ka akituro, ŋakiro ŋuna itiyaete ŋituŋa ŋulu aronok, erae asecit.

⁵Ayere ejok akitiyakin ibore, ikiinakini ebari, nai ituŋanan daadaŋ ŋini iburiburi akitiyakin ibore, eyakaun ekaku akiitanit.

⁶Ebari ŋolo eryamuni ituŋanan anakirworo alyokonu, eŋopiyari apaki ŋina euruwuana. nai isyauni mono ebari ŋol arikor iyoŋ napipilu ŋina ka atwanare.

⁷Emunyari aryenyeo a ŋulu aronok ŋulu aronok, anerae eŋerito ikes akiwuap ŋuna iyookino.

⁸Nyileerete ŋakiro ŋuna iwuapito ŋituŋa ŋulu iilit aŋuna ka asecit, nai ejokak nooi ŋipitesyo a ŋituŋa a ŋulu iyookino.

⁹Ejok akiper kiŋa akai nenilapat, akilo akiper tooma akai kaapei ka aberu ŋina iburana.

¹⁰Iitanito ŋitai a ŋulu aronok akitiya aronis, emam akisyon eryamunito ŋikidunget kec aneni kec.

¹¹Ani isicanio ituŋanan ŋini sek ejamuwarit ŋuluce, eosyokioto ŋibaŋaanotin ejoŋoete akitiya ŋuna ka abaŋao, ani kitatami ituŋanan ŋini sek eos, iatakin aosou aneni keŋ.

¹²Eyeni Akuj ŋina iyookino ŋakiro ŋuna itiyasi anakais a ŋulu aronok, ido inyipori Akuj ŋulu aronok tomunyaros.

¹³Ani kiŋer iyoŋ akiirar ŋakiro ŋuna ilipatar ŋikulyak ibore aneni kon, iruwor iyoŋ ŋini ilipanar, ido emam ituŋanan ecamuni akiirar ŋakiro ŋuna ilipar iyoŋ.

¹⁴Isililiŋiyari ainakinet ŋina inunakinio ituŋanan aŋoit ŋina sek eŋoitor ituŋanan, ido eyauni akaluŋuluŋut ŋina inunakinio ituŋanan ekisil neni a ituŋanan a ŋini sek enyunyura nooi eŋoit.

¹⁵Ani itiyao ŋakiro ŋuna iyookino, eryamunete ŋituŋa ŋulu iyookino alelyanu, nai ekadakini ŋulu itiyaete aronis.

¹⁶Ituŋanan daadaŋ ŋini eesikini akiwuap ŋuna ka ayenut ŋuna ajokak, elosi akieŋun aneni eyakasi ŋikatwak.

¹⁷Ituŋanan daadaŋ ŋini emina akileile ŋamuja, eruwor ikulyakit, ituŋanan daadaŋ ŋini emina epiini ka ŋamuja ŋuna epol egyelit, nyebari.

¹⁸Eryamunete ŋituŋa ŋulu aronok ŋican ŋulu sek ecamito ikes akiteryamun ŋulu iyookino, ido eryamunete ŋulu emamukatar anupit ŋican ŋulu sek ecamito ikes akiteryamun ŋulu iyookino.

¹⁹Ejok akiboi analoŋisat, akilo akiboi ka aberu ŋina eburan ŋina eyakar egurigur.

²⁰Erubakini ebari eyai nakais a ŋituŋa a ŋulu aosok, nai irikanarete atipei ŋibaŋaanotin ibore ŋini eryamunete.

²¹Ituŋanan daadaŋ ŋini iwuapit ŋuna ka akiyookino ka arimao, iboi eyari ekaoyan ka itopolooryo.

²²Epedori ekaoson epei akikamar etaun ŋolo eyakasi ŋikajiok ŋulu agogoŋok epedori iŋes abwaŋabwaŋakin kwap ŋaduketa kec ŋuna sek ikinyomito ikes.

²³Akiyokiunit akituk ka aŋajep kon erwor car, erae akimyekinit alomar locan.

²⁴Ituŋanan ŋini eturon, ŋini isupana, ŋini enyaritae ebe, “Eketuron,” erae ŋini itiyae ituro ka isupa.

²⁵Akiitanit ŋina apolon nooi ŋina eyakar ikalanyanot, erae ibore ŋini isiyaloloŋiyori iŋes totwan, anerae nyecamito ŋakan a ikalanyanot akitiya.

²⁶Apaaran jwii eyakar ikalanyanot ekibure ŋolo ka aryamun ibore idio, nai einanakinete ŋulu iyookino, nyewounitotor ibore ŋini eyakatar ikes.

²⁷Erae amuronot a ŋulu aronok ibore ŋini erae asiilyo, etya nai asiilyo ŋin ai erae keyaunitae amuronot ŋin aŋuna ka akitiyaa aronis!

²⁸Itemokino esuuda ŋolo alyokonon totwan, nai ituŋanan ŋini epupi ŋakiro ejok, isuudae ŋakiro ŋuna iyookino.

²⁹Itusubunun aloreetin ŋituŋa ŋulu aronok erae ŋulu eyenete ŋinibore ejok, nai ŋituŋa ŋulu iyookino, etamakinete mono ejok ŋuna kiwuapa.

³⁰Emam ibore itiyakini ituŋanan aŋuna ka aosou keŋ, ayenut keŋ ka ayere keŋ ŋuna kitiya, erae pa kecamakinit Ekapolon.

³¹Epedori ituŋanan akoloŋit ŋina ke ejie akitemokin aŋole keŋ, nai Ekapolon einakini ituŋanan ŋin akiloun ŋimoe keŋ.