Read ngakarimojong Ŋakit. 23 Bible Online

Ŋakit. 23 - ngakarimojong bible

Ŋakit. 23

¹Ani iboikin iyoŋ akimuj ka ekepukan, kiŋolik mono ejok ibore ŋini iwuakinitae kiŋaren kon,

²ido emaikina kidaŋidaŋak akidarun apaki ŋinakimujet tari kikiburakinit iyoŋ nooi akimuj ŋin.

³Nyiitanit ŋamuja ŋuna imujete ŋikapolok, anerae ikiŋalaarete iyoŋ ŋamuja ŋun.

⁴Nyituupa bon aŋirikinit akiburuburakin aryamun ebari, toyakatar aosou ŋina itoodiunit atemar ititinyikinit iyoŋ.

⁵Epedori ebari kon apuripuryaar ite iyoŋ, epuripuryaar atipei esibit kepena ŋabebenuk ŋuna epororya ikwa egole.

⁶Nyimuji akimuj a ituŋanan a ŋini amwanan; nyiitanit akimuj a ituŋanan a ŋin,

⁷aŋuna eraakar iŋes ituŋanan ŋini erimaana, ŋini etamatamae a ŋinapaki etyae ŋolo egyelitor iŋes akimuj ŋin. Epedori iŋes alimokin iyoŋ ebe, “Kimuj ka tomat,” nai ŋuna etami iŋes alotau keŋ aŋuna kon, erae ŋuna aronok.

⁸Ilekuni iyoŋ tari akimuj ŋina edit ŋina idau iyoŋ akilikor, ido icanicani iyoŋ ŋakiro kon ŋuna ajokak aneni keŋ.

⁹Nyimina akirworo neni a ibaŋaanot, anerae ejamuwari iŋes ŋakiro kon ŋuna ka aosou.

¹⁰Nyilemanari amoru ŋina sek ipimitere ekukoru ka aŋorot, kori nyidemanari ŋikokyok emanikor kec,

¹¹anerae egogoŋ Ekapolon ŋolo erae ekeŋarakiniton kec; ikisitakini iyoŋ Ekapolon aŋuna kec.

¹²Inakin alotau kon akiwuap ŋakiro ŋuna ikitatamio, inakin akiirar ŋakiro ŋuna ka aosou.

¹³Nyiesik akida ŋidwe kon edyekarito, ani kida iyoŋ ikes, meere akiar iari iyoŋ ikes.

¹⁴Ani kida iyoŋ ikes, iuni iyoŋ akiyar kec anatwanare.

¹⁵Ikaakoku, ani kirae iyoŋ ŋini ios alotau kon, alakar ayoŋ daŋ alotau kaŋ;

¹⁶eyakaun alelyanu lotau kaŋ, erae kirworo iyoŋ ŋakiro ŋuna iyookino.

¹⁷Kiurya nyiburakis etau kon ŋuna itiyaete ŋikasecak, nai torubak a ŋinapaki itopoloorit Ekapolon.

¹⁸Kire jik eyai akiyar kon ŋina alokiŋaren erae ŋina ejok, emam ibore ikitojoŋoe iyoŋ ayakau ka akigeno.

¹⁹Ikaakoku, kiira ŋakiro ŋun ka toruwor ŋini ios, kiwuak ŋatameta kon lorot ŋolo iyookino.

²⁰Nyilot arukit ka ŋituŋa ŋulu amatak epiini, kori nyiloma lotuŋa ŋulu adakanak ŋulu enyamaka akiriŋ,

²¹anerae eruwor ŋikamerak ka ŋikadanak ŋituŋa ŋulu a ŋican; iruwori iyoŋ ituŋanan ŋini inapit ŋaraco erae kerae etic kon akimuj ka akiper bon.

²²Kiira ŋakiro a papa kon a ŋolo ikiuruuni iyoŋ, ido nyijamuwa toto kon apaki ŋina emojoŋia.

²³Togyelu ŋakiro ŋuna a kire, ido nyigyela; togyelu aosou ka ŋakiro ŋuna ikitatamio ta ayenut.

²⁴Eyai alelyanu ŋina apolon nooi neni a papa a ituŋanan a ŋini iyookino; elakar ituŋanan ŋini euruunit ikoku ŋini eos.

²⁵Emaikina papa kon ka toto kon elakara aŋuna kon, emaikina iŋes ŋina ikidouni elelyani aŋuna kon.

²⁶Ikaakoku, kiwuak etau kon neni kaŋ, emaikina iyoŋ kiŋolik ŋuna ewuapit ayoŋ.

²⁷Ikote ŋamalaae akipany ŋina ecukul nooi, ikote ŋakalomak akare ŋina edidiŋ neni itoryo elomaryo.

²⁸Eperi amalaat kidat lopite ŋolo idasya ekademanaran, ido iyasi amalaat ŋikilyok ŋulu nyikinyoma.

²⁹Ŋae mono eyakar asiliyorit? Ŋae mono eyakar akiyaloloŋ? Ŋae mono isyaanakini a ŋina paki ayaun ŋican? Ŋae mono iŋuruŋura a ŋinapaki? Ŋae mono eyakar ŋaruma ŋuna emam ŋakiro idicitere? Ŋae mono eyakar ŋakonyen ŋuna areŋak?

³⁰Erae ŋulu ewaryanakini etubonor emasete epiini erae ŋulu erubakinete emasete epiini ŋikabilae daadaŋ.

³¹Nyikiburak epiini iŋolikini ereŋ puu, ekulae alokopo ka ilikori emam ŋace.

³²Ekaku, ikiwani iyoŋ ikwa emun, ido eruwor nen akisorit ŋina ikwaan ka ŋina ka akipom.

³³Igeuni iyoŋ akitere ŋiboorei ŋulu egelaaka, ido eyakaun natameta kon ŋitorubei ŋulu ikisibilerete.

³⁴Ikokini iyoŋ ituŋanan ŋini edoiyorit kwap ŋakipi ŋuna ka anam, ikokini iyoŋ ituŋanan ŋini eperi ananaŋga a ŋina iwuakiwuaki ekuwuam alokidiama ameeli.

³⁵Itemari iyoŋ ebe, “Aponi ekedici ayoŋ, nai mam nyawanan ayoŋ; aponi ekebuŋae ayoŋ, abu nyakanomo ayoŋ. Ori mono emaikina ayoŋ okyenyunia? Acamit ayoŋ akimat ŋagwe ŋace.”