Read ngakarimojong Ŋakit. 24 Bible Online

Ŋakit. 24 - ngakarimojong bible

Ŋakit. 24

¹Nyicamu eterekune eyakaun neni kon aŋuna a ŋulu aronok, kori ekibure ŋolo ka arukit ka ikes eyakaun neni kon,

²anerae erae ŋuna ka aryenyeo eyeete ikes anatameta kec, ido erae ŋuna ka akiteryamun ituŋanan idio ŋican irworosi ikes.

³Epedori ituŋanan adukokin akai alotooma aosou ka alotooma ayenut, epedori akai ŋin ayakaun;

⁴alotooma aosou epedorete ŋiboro akilelebun nagulei a akai a ŋin, epedorete ŋiboro ŋulu a egyelit a ŋolo alalan ka ŋulu ajokak apenare kai ŋin.

⁵Itiroko ŋikajiok ŋulu aosok akilo ŋikajiok ŋulu agogoŋok, itiroko ŋikajiok ŋulu eyakatar ayenut akilo ŋikajiok ŋulu agogoŋok;

⁶anerae alotooma aosou, ipedori ayenun epite ŋolo itijikinio ŋimoe, ido ani iyakar iyoŋ ŋikeŋarakinitok ayere ŋakiro, eyakaun akiloun.

⁷Erae aosou ibore ŋini etamete ŋibaŋaanotin atemar nyepatana aryamun, nyirworyanakinete ikes eyakae lotemu neni ianere ŋakiro ka akwap.

⁸Ituŋanan daadaŋ ŋini eye akitiya aronis, enyarao iŋes ŋini eye ayaun ŋican.

⁹Erae ŋuna eye ibaŋaanot ŋuna ka asecit, ido erae ŋini ejamuwarit ŋuluce ŋini esiilyana alotuŋa a daadaŋ.

¹⁰Ani kirae iyoŋ ŋini ipatak alorwa a ŋulu a ŋican, irae iyoŋ kire jik ituŋanan ŋini sek ipatak tari ka aŋorot.

¹¹Toiu ŋituŋa ŋulu erikoritae natwanare, kiriu ŋituŋa ŋulu iteriterosi elosete neni earere.

¹²Ani kitemasi iyes ebe, “Kiirasi, pa ayenio isua ŋakiro ŋun,” eyeni Akuj ŋuna iyakatar iyes lotai kus, eyeni Akuj ŋina iyokit akiyar kus ŋakiro ŋun, eropi iŋes ŋinituŋanan alopite a ŋolo itiyator ŋinituŋanan.

¹³Ikaakoku, kimuji ao, anerae erae akimuj ŋina ejok, ebob akimyet ŋina eliunitae anakap ka ao.

¹⁴Toyenu atemar erae aosou ibore ŋini abobon alotau kon ani kiryamu iyoŋ aosou, iyakaunor iyoŋ alokiŋaren akiyar ŋina ajokan, ido nyedaun akigeno aneni kon.

¹⁵Nyiperi aiwadio idarit akirem ere a ituŋanan a ŋini iyookino esibit irae iyoŋ ituŋanan ŋini nyiwuapit ekisil. Nyitiyak ŋadi ŋuna ka aryenyeo nakibois ŋina iboiyoto ŋituŋa ŋulu iyookino;

¹⁶anerae tari daŋ keryamut ŋituŋa ŋulu iyookino ŋican ŋarwa ŋakanikaarei, etenete nabo, nai ereunete ŋican ŋituŋa ŋulu aronok.

¹⁷Nyilelyan apaki ŋina ereunere ŋimoe kon, ido nyicamak etau kon elakar apaki ŋina eryamuniata ŋimoe kon ŋican.

¹⁸Ani kitiya iyoŋ ŋun, epedori Ekapolon akiŋolikin ŋakiro kon, ido ikiŋolik iyoŋ, tojoŋo aŋoikinit ŋimoe kon.

¹⁹Nyiyaloloŋ aŋuna a ituŋanan a ŋini itiyae aronis, kori nyicamu eterekune emini neni kon aŋuna a ituŋanan a ŋini aronon;

²⁰anerae emam akigeno eyakar ituŋanan ŋini itiyae aronis, ido nyeyarete ekaoyan ŋituŋa ŋulu aronok.

²¹Ikaakoku, kitopoloorite Ekapolon ka erwosit, nyicamu akimorikin ka ŋituŋa ŋulu eŋerito Ekapolon, kori erwosit;

²²anerae epedorete Ekapolon ka erwosit akisican ŋulu eŋerito ikes, ido ŋae eyeni ibore ŋini isicaniata ikes ŋulu eŋerito ikes?

²³Erae nu daŋ ŋakiro ŋuna a ŋikaosok, ŋuna itoodiunito amamukau ariit ka ituŋanan ipei itubi ŋakiro.

²⁴Ituŋanan daadaŋ ŋini etemari neni a ituŋanan a ŋini itiyat aronis ebe, “Emam aronis itiyat iyoŋ,” icenete ŋituŋa ituŋanan ŋini ka eŋerete ŋituŋa a ŋakwapin ituŋanan ŋin.

²⁵Nai ejokyata ŋakiro aneni a ŋulu isitakinete ituŋanan aŋuna ka asecit keŋ, eryamunete ŋituŋa ŋul ŋarereŋisyo ŋuna ajokak.

²⁶Aboŋokinet ŋina iyookino elimunitoe, ikwaan ejok ka neni ikinuya ituŋanan ekeli.

²⁷Kirikak mono etic kon ŋolo alokiŋa daadaŋ, kitemonok mono ŋimanikorin kon, ani nai irikakini, todukok akai kon.

²⁸Nyiruwor esuuda ŋolo irworo imanit ikidunyet kon emam ŋakiro iŋoitotor ka iŋes, nyirwor neni keŋ ŋakiro ŋuna erae alyokonu.

²⁹Nyitema ebe, “Etiyae ayoŋ neni a ŋuluce aronis ŋina etiyata ikes neni kaŋ; etiyae ayoŋ neni kec ŋuna aronok ŋuna etiyata ikes neni kaŋ.”

³⁰Abu ayoŋ etor diyete emanikor a ikalanyanot, diyete emanikor a epiini a ituŋanan a ŋini abaŋaana,

³¹abu ayoŋ eŋolik ŋikukwa elomunito alomanikor keŋ a daadaŋ, arapuwarit edowan emanikor keŋ daadaŋ, anyamuna awuas ŋina a emanikor keŋ.

³²Abu ayoŋ otamatama alotau kaŋ ŋuna abu eŋolik, ido abu oyenu ŋakiro nu alotooma ŋuna abu ayoŋ eŋolik.

³³Ani ketema ituŋanan ebe, “Enapakin mono apaki ŋina euruwuana, kori ajotoor mono apaki ŋina euruwuana, kori esieŋuni mono ŋakan obilak apaki ŋina euruwuana,

³⁴ebuni akulyako neni kon lopite ŋolo ebunio ekademanaran, ebuni akiitanit neni kon lopite ŋolo ebunio ekajion ŋolo eyakar ŋiboro ŋulujiet.”