Read ngakarimojong Ŋakit. 25 Bible Online

Ŋakit. 25 - ngakarimojong bible

Ŋakit. 25

¹Erae nu ŋakitadapeta a Solomon ŋace ŋuna apotu ŋikapolok ŋulu epukatotor erwosit Esekia ŋolo a Yudaya kigira.

²Erae akililiŋiyanar ŋakiro akitopoloorit Akuj, nai erae akirworo a ŋirwosi ŋakiro ŋina itopolooritere ikes.

³Nyepedori ituŋanan ayenun ŋuna etami erwosit, etami iŋes akilo ŋituŋa ŋuluce, elwaka ŋatameta keŋ ikoni neni elwania kidiama, elwaka ŋatameta keŋ ikoni neni elwania kwap ŋakipi ŋuna ka anam.

⁴Ani kelemar ibore ŋini aronon daadaŋ alosilipa, itiyauni eketyakan ŋasuwa eborosit ŋolo ajokan alosilipa.

⁵Ani kelemar ŋituŋa ŋulu aronok aneni a erwosit, ipukae erwosit ejok anakiyookino.

⁶Nyitopoloor bon alokiŋaren erwosit, kori nyimina alosenen akiwo neni ewoeniata ŋikapolok;

⁷anerae ejok ikilimokinio ebe, “Bua laalo,” akilo iyoŋ akisiyotor iwace alodiyete ŋikapolok.

⁸Nyikirikirak alimor aloikiiko ŋakiro ŋuna ibu iyoŋ kiŋolik, anerae anukiro itiyakini iyoŋ erae kirwor ikidunyet kon ikisalu iyoŋ?

⁹Ani keyakasi ŋakiro ŋuna ipeganakinotor iyoŋ ka ikidunyet kon, emaikina kirikakis ŋun iyes ŋuluarei, ido kililiŋiyasi.

¹⁰Ani pa kitiya ituŋanan ŋun, epedori ituŋanan ŋini ikipupi iyes ipeganakinosi akisurum iyoŋ ŋileec, ido ilaerikini iyoŋ jik akitiya ŋun a ŋinapaki.

¹¹Akirot ŋina elimunitoe epupo ejok, ikwaan ka egolid ŋolo iluŋiluŋitae ŋolo inaminamitae losilipa.

¹²Ani kikilimok ituŋanan ŋini aoson ŋakiro, ido kiira kiwuap, ejok nen nooi, ikoni neni ejokya inapit anakit ibore ŋini itiyaunitae a egolid.

¹³Ekiyakia ŋolo ikinyoma, erae ituŋanan ŋini ejok aneni a ŋini iyakit iŋes, ikwaan iŋes ejok ka alilimu ŋina elilimio akwap itiyao naparan.

¹⁴Ituŋanan ŋini iturokin aŋuna ka ainakinet a ŋina eriŋa iŋes nyeryamuna, ikwaan iŋes ka ŋidouwon ŋulu irimitor ekuwuam tomam akiru apei daŋ ilimi.

¹⁵Epedoryo akisirworiun ekepukan erae kerae iŋes ituŋanan ŋini idaŋidaŋi ŋakiro, ido ituŋanan ŋini irworo epatana, epedori akiperikin ŋakiro tari ŋuna epegae anadedeŋu.

¹⁶Ani kiryamu iyoŋ akimyet ka ao, kimuj ŋina ikitemokin iyoŋ, ani kimuj iyoŋ ŋina alalan nooi, ilekuni.

¹⁷Nyiropi a ŋinakoloŋit kai a ikidunyet kon, acepaki eŋoi ikidunyet kon ikiremokin iyoŋ.

¹⁸Esuuda ŋolo irworo alyokonu neni a ikidunyet keŋ, ikoni iŋes erono abiro ŋinajiet, kori ekileŋ ŋolojiet, kori ekaleŋeleŋet ŋolo akwanan ŋolojiet.

¹⁹Akikinyomit anapakio a ŋuna a ŋican ituŋanan ŋini nyepedori akiŋarakin; ikwaan ka anyakaikin ibore a ekelae a ŋolo epipil, kori ikwaan ka arotokin a akeju a ŋina aŋwalan bon.

²⁰Ituŋanan ŋini iruko neni a ituŋanan a ŋini iyaloloŋi, ikwaan ka ekitoe ŋolo aryeban iwuakinio najeme. Epedori akiyaloloŋ akipyedar etau a ituŋanan lopite ŋolo irikaryata ŋakimom ŋilowi, kori esipiran akitoe.

²¹Ani kenyamit akoro ŋimoe kon, inak ikes akimuj kimuja, ani kenyamit akure, inak ikes ŋakipi tomata;

²²anerae anikitiya iyoŋ ikwaŋina, isurumi iyoŋ ikes ŋileec, ido ikiropi iyoŋ Ekapolon.

²³Eaununui ekuwuam ŋolo ekutuni alo Kuju akiru, nai eaununui aŋajep ŋina irworor ŋuluce anyorididi.

²⁴Ejok akiper kiŋa nenilapat, akilo akiper tooma akai kaapei ka aberu ŋina iburana.

²⁵Ŋakiro ŋuna ajokak ŋuna iakuunitae anakwap ka ace, ejokak nooi ikote akimat ŋakipi ŋuna alilimok ci ikinyamit akure.

²⁶Ituŋanan ŋini iyookino sek, ido kimyek akiyookino kiwuap ŋuna itiyaete ŋulu aronok, ikwaan iŋes ka elelya ŋolo keruwor ecoto bon, kori ka eitanit ŋolo eitunit ŋakipi ŋuna abosak.

²⁷Nyejok akinyam akimyet ka ao ŋina alalan, kori akiwarit akitopolooro torae bo sek ŋini ipol.

²⁸Ituŋanan ŋini nyiyokiuno bon, ikwaan ka etaun ŋolo keukonor arwatata ŋina sek eiunit iŋes.