Read ngakarimojong Ŋakit. 26 Bible Online

Ŋakit. 26 - ngakarimojong bible

Ŋakit. 26

¹Nyejok ainakin apolou neni a ibaŋaanot, ikwaan nen ka elwac ŋolo ka akamu, kori akiru ŋina eyakaunun ŋapakio ŋuna elemere.

²Ani kikilam iyoŋ ituŋanan tomam ŋuna itiyat iyoŋ, mam ŋuna aronok itiyakin neni kon, ikokinete ŋilam ŋul aneni kon atasurui ŋulu eporete nyieŋununeete, kori ŋikeny ŋulu irimito.

³Erae adaset ŋinakibuŋaet aŋole ka erae arukan ŋina eenere esigirya, ido erae ebela ŋolokibuŋaet ŋibaŋaanotin nakausinei.

⁴Nyiboŋonokini ŋakiro ŋuna iŋitasi ŋibaŋaanotin alotooma abaŋao kec. ani kiboŋonok iruwor iyoŋ daŋ ibaŋaanot ikwa ikes.

⁵Toboŋok ŋibaŋaanotin ŋakiro alopite a ŋolo ka abaŋao kec, ikotere nai ikes eyenunete atemar nyeosok ikes lopite ŋolo etamiata ikes.

⁶Akiyakiyar ibaŋaanot akiya ŋakiro, ikwaan ka atubor akeju a ŋinice, kori ka akiwarit aryamun ŋican.

⁷Akitadapet ŋina irworo ibaŋaanot, ikwaan ka akeju ŋina eŋwalit ŋina nyicakenene akwap.

⁸Akitopoloor ibaŋaanot, ikwaan ka akiwuakin amoru nadoe.

⁹Akitadapet ŋina irworo ibaŋaanot, ikwaan ka ikameran ŋini edakit ŋikukwa ŋulu eitaaka anakan.

¹⁰Ituŋanan ŋini einakini elejilej neni a ibaŋaanot, kori a ikameran a ŋini elosi alorot neni ecamit, ikwaan ka ituŋanan ŋini egumugumui ŋituŋa a ŋikaleŋeleŋe car.

¹¹Lopite ŋolo eboŋonokinio iiŋok akinyam ŋalyakan keŋ, eboŋonokini ibaŋaanot daŋ akitiya abaŋao keŋ.

¹²Iŋolikinit mono iyoŋ ituŋanan ŋini itooso anakonyen a? Ejok ibaŋaanot nooi akilo ituŋanan ŋin.

¹³Ebala ituŋanan ŋini ekalanyana ebe, “Eyai ibore ŋini aaran lorot, eyakasi ŋikaarak lorotin ŋulu a etaun.”

¹⁴Lopite ŋolo erubakinitor epuke eyai lopetae, ikalanyanot daŋ, erubakinit eperi alokitaada keŋ.

¹⁵Ewanawanae ikalanyanot akan keŋ icidi ŋiboro ŋulukimujet, ido eyakar iŋes ŋileleny akiwuakin akimuj nakituk keŋ.

¹⁶Itooso ibaŋaanot anakonyen keŋ, etami atemar iloit iŋes ŋituŋa ŋikanikaarei ŋulu elimunete ŋakiro pa imunonito.

¹⁷Ituŋanan ŋini iŋuconokin lobura a ŋituŋa a ŋuluce, ikwaan iŋes ka ituŋanan ŋini eryamuni iiŋok alorot, ido kikamu ŋaki a iiŋok.

¹⁸Lopite ŋolo epedorya ituŋanan ŋini a ŋikerep akicumucum ŋituŋa ŋuluce a ŋimacarin a ŋulu eriraete, kori a ŋikaleŋeleŋe,

¹⁹ikoni nenipei nen ituŋanan ŋini emodyanakini ikidunyet keŋ ebala, “Arae ro abolya.”

²⁰Ani kemam ŋakito anakim, eduŋe akim, ani kemam akiŋaiŋaar ŋituŋa ŋuluce, edaun ebura.

²¹Lopite ŋolo itenepunia itotole ŋatotol, kori akitoe ŋakito, ikoni nenipei nen ituŋanan ŋini eburan ŋini isinepi jik ejie.

²²Ebobok ŋakiro ŋuna iŋaiŋaunitae esyomare ŋinice elomete ikes naki erae ŋuna ejokak iirari.

²³Ituŋanan ŋini itojoka irworo nai toyakar ŋiman lotau keŋ, ikwaan ka eraŋgi ŋolo ebusan ŋolo iwosakinitae namot.

²⁴Ituŋanan ŋini a ŋisoswae, epedori akirap aronis keŋ alorwa keŋ, nai tooma lotau keŋ, ileleba ŋiman.

²⁵Ani kirwor emoit kon neni kon itojoka nooi, nyinup ŋakiro keŋ, anerae ileleba lotau keŋ ŋiman ŋulu eŋoitor iŋes nooi.

²⁶Epedori emoit kon akimunon ŋuna ikimanitor, nai isileereunio aloikiiko ŋakiro ŋuna aronok ŋuna ikimanitor iŋes iyoŋ.

²⁷Ani kebok ituŋanan akipany kimyek eorori, epedori iŋes pei akimasakin nakipany ŋin, epedori amoru akikokorikin neni a ituŋanan erae kijuka ituŋanan amoru.

²⁸Ituŋanan ŋini irworo alyokonu, epedori akiman ŋini elimokini iŋes atemar nyirwor alyokonu, ido ituŋanan ŋini nyirworo ŋuna a kire, eauni amunyaro.