Read ngakarimojong Ŋakit. 27 Bible Online

Ŋakit. 27 - ngakarimojong bible

Ŋakit. 27

¹Nyiturokin aŋuna a moi taparacu, anerae nyiyeni iyoŋ ŋuna eyakaun moi taparacu.

²Kimyek ŋituŋa ŋulu ce ikitojoka iyoŋ, meere iyoŋ ilope atemar ijok iyoŋ, kimyek ituŋanan ice ŋinigelaanot tolimu ŋun, meere iyoŋ ilope akirworo ŋun.

³Erae ŋamoru ibore ŋini epot ka erae asinyon ibore ŋini eposik, nai etyoko nooi ŋakiro ŋuna ikitoŋoya ibaŋaanot akilo apotis a ŋamoru, kori aposikik a asinyon.

⁴Eryenyana anyunyara, ikimunyari aŋoit, nai ŋae epedori awoikin arakao?

⁵Ejok alimokin atemar toesik akitiya ŋun ka ŋun, akilo atemar ikiminae, nai kimunonitetei.

⁶Ani kiryamu iyoŋ arumait aŋuna ikiramia lokone kon, ejok akilo neni ikinuya emoit ikimodiyarit akiar.

⁷Ani imwonit ituŋanan, eŋeri tari akinyam ao, nai ani enyamit ituŋanan akoro, eboboor tari akimuj ŋina sek edwar.

⁸Ituŋanan ŋini eoliyori alore keŋ, ikwaan ka ikenyit ŋini eoliyori alokai keŋ.

⁹Epedorete akimyet ŋina akukunyon ka ekinyate abobokin ituŋanan iŋuuni, nai epedorete ŋican akipyedar etau a ituŋanan.

¹⁰Nyimyeanakini ituŋanan ŋini erae ikone kon, kori ikone a ikauruunan kon; nyilot kai a iyenet kon erae kelwana apaki ŋina iryamunia iyoŋ ŋican. Ejok alosit neni a ikidunyet kon akilo alosit neni alwanan neni a iyenet kon.

¹¹Ikaakoku, torae ŋini ios, ido yau alelyanu lotau kaŋ; ikotere nai ayoŋ apedori aboŋokin ŋakiro ŋuna irworotor ŋituŋa eketoroniyarito ayoŋ.

¹²Epatana ŋikaosok ayenun atyonis ebunit, ido toŋopa, nai erubakinete ŋibaŋaanotin itiyaete pa eyenete atyonis ŋina ebunit, ido elomarete locan.

¹³Ani kebaŋaaniar ituŋanan kiik awoikin akitac edeni a ituŋanan a ŋini erae igelaanot, emaikina tolemarae ibore a ituŋanan a ŋin kiŋadae tari ŋina etacere ibore ŋini edeniyoritae.

¹⁴Ani kisyokak ituŋanan akiterereŋ ikidunyet keŋ iserae nooi, erae ibore ŋin alotuŋa akicen ituŋanan ŋinice.

¹⁵Ikoni aberu ŋina iburae a ŋinapaki akiru ŋina icipicipi a ŋinapaki;

¹⁶etyono akisililiŋ iŋes ikoni neni etyonio akiretakin ekuwuam, kori ikoni neni etyonio akiwoun ibore ŋini aliwan kilelebikin nakan.

¹⁷Ipenio asuwat a asuwat, ituŋanan epedori akitatam ituŋanan ŋinice.

¹⁸Ituŋanan ŋini edupi ŋiboboryo, enyami ŋaraito a ŋiboboryo a ŋul, ituŋanan ŋini iyokit ekapolon keŋ ejok, einakinio apolou.

¹⁹Lopite ŋolo epedorya ituŋanan akiŋolikin ereet keŋ anakipi, epedori ituŋanan akiŋolikin ŋinice alotau keŋ.

²⁰Nyimwokeneneete akibois a ŋikatwak ka atwanare. Ikoni nenipei nen ekibure ŋolo eyakar ituŋanan.

²¹Lokitet iŋes eliunere esilipa ka egolid ŋolo ajokan, nai itojokio ituŋanan anakiro a ŋuna ajokak a ŋuna ipuritere iŋes.

²²Tari kibuŋae ibaŋaanot kirakar, mam ituŋanan epedori akibuŋaar abaŋao todaun aneni keŋ.

²³Emaikina ituŋanan eyeni ejok epite ŋolo eyakatar ŋamesekin keŋ, kidarite ejok ŋibaren kon;

²⁴anerae nyerae ebari ŋolo a ŋikaru ka ŋikaru, ido nyerubakini ebokot ŋolo ikitopolooritere iyoŋ eyai ŋanyameta ka ŋanyameta.

²⁵Ani keoko ŋinya todaun, ido tolibut ŋice, toŋerunae alokamukumukui,

²⁶iryamuni iyoŋ ŋajul a ŋikaalei ŋuna idonyuni ŋilowi, iryamuni iyoŋ ŋamee ŋuna igyelunia emanikor,

²⁷iryamuni iyoŋ ŋakile a ŋamee ŋuna itemokino aŋuna a ekal kon ka aŋuna a ŋaketiyak kon.