Read ngakarimojong Ŋakit. 28 Bible Online

Ŋakit. 28 - ngakarimojong bible

Ŋakit. 28

¹Eosunit ituŋanan ŋini aronon tari kemam ituŋanan iwarit akikamun iŋes, nai etitiny ituŋanan ŋini iyookino lopite ŋolo etitinyo eŋatuny.

²Ani kiguryasi ŋituŋa anakwap kec, elalak ŋikepukak anakwap kec, nai ani keyakar akwap ekepukan ŋolo aoson, eyakaun nakwap ŋin apuponor ŋinaruba.

³Ekepukan ŋolo itoroniyarit ŋikulyakanotin, ikwaan ka akiru ŋina iliiciyari akimuj todaun.

⁴Ŋituŋa ŋulu eŋerito akiwuap ŋikisila, elakara aŋuna a ŋituŋa a ŋulu aronok, nai ŋituŋa ŋulu iwuapito ŋikisila, eremokino ŋituŋa ŋulu aronok.

⁵Nyeyenete ŋituŋa ŋulu aronok akiyookino, nai eyenete nooi ŋituŋa ŋulu iwarito Ekapolon akiyookino.

⁶Ejok akulyako toyai irae ŋini iwuapit ŋuna ka akiyookino, akilo araakau ŋini nyejokak ŋipitesyo tobarite.

⁷Ituŋanan ŋini iwuapit ekisil, erae ŋini eyakar aosou, nai ituŋanan ŋini emina arukit ka ŋikanyamak, eyauni ŋileec neni a ŋikauruunak keŋ.

⁸Ituŋanan ŋini iasi egyelit a ŋiboro keŋ aryamunia epoida ŋolo alalan, eryamununui ituŋanan ŋin epoida ŋol aŋuna a ituŋanan a ŋini erimaana aneni a ŋikulyak.

⁹Ani keŋer ituŋanan akiwuap ŋuna ebasi ŋikisila, eruwor tari ŋakisilipasinei keŋ asiilyo aneni ka Akuj.

¹⁰Ituŋanan ŋini erikori ŋini iyookino akitiya aronis, elomari nakiro keŋ a ilope ŋuna aronok, nai eryamuni ŋini nyitoroniyaritae ŋiboro ŋulu alalak.

¹¹Etami ituŋanan ŋini abaran atemar erae iŋes ŋini eos, nai itoodiunit alopitesyo keŋ ituŋanan ŋini ekulyakana atemar eos iŋes.

¹²Ani keryamu ituŋanan ŋini iyookino apolou, eyakaun alelyanu ŋina apolon nooi lotuŋa, nai ani keryamu ituŋanan ŋini aronon apolou, eemete ŋituŋa akiŋop a iwace.

¹³Ani kimunon ituŋanan ŋasecisya keŋ, nyeryamuni akiyar ŋina ajokan, nai ituŋanan daadaŋ ŋini elimori, ido toki ŋasecisya keŋ, eryamuni akisyonio.

¹⁴Elakara a ŋinapaki ituŋanan ŋini itopoloorit Ekapolon, nai ituŋanan ŋini itogogoŋit akou keŋ, elomari locan.

¹⁵Ituŋanan ŋini aronon ŋini ipukat ŋikulyak, ikoni eŋatuny ŋolo irurumae, kori ityaŋ ŋini adedeŋan ŋini eresiyara.

¹⁶Ekepukan ŋolo eryenyaana, emamukar ayenut, nai ituŋanan ŋini nyecamit ibore ŋini edemunitae ŋinice, eyakaun nakiyar ŋina aoyan ŋina ka alelyanu.

¹⁷Ani keyakar ituŋanan ekaile ŋolo earitor iŋes ituŋanan ŋinice, emaikina ituŋanan ŋin torubak erae ŋini irimit akitodol neni etwania, emaikina nyiŋarak ituŋanan idio iŋes.

¹⁸Eiuna bon ituŋanan ŋini elosi anakiyookino, nai elomari locan ituŋanan ŋini iwuapit ŋipitesyo ŋulu aronok.

¹⁹Ituŋanan ŋini itae, eryamuni akimuj ŋina alalan, nai ituŋanan ŋini icanicani apaki keŋ anakirimit, eruwor ŋini ekulyakana nooi.

²⁰Ituŋanan ŋini eyakar anupit, eryamuni ŋarereŋisyo ŋuna alalak nooi, nai ituŋanan ŋini ibunya atemar kerae obar, nyebucar aryamun akisicanio.

²¹Nyejok akitoodiun atemar iriito iyoŋ ka ituŋanan ipei itubi ŋakiro torae bo epedori ituŋanan aruwor ŋini edyakarit tari kerae atap elemarit.

²²Ituŋanan ŋini eseguwana, iwarit atemar kerae obar atipei, ido nyeyeni iŋes atemar epedori tari akulyako daŋ akikirikiriun neni keŋ.

²³Ituŋanan ŋini elimokini ŋinice atemar toesik akitiya aronis, eruwor ekaku ŋini ejok, akilo ŋini emodiyarit ŋinice alorwori keŋ.

²⁴Ituŋanan ŋini ekokoe ŋiboro a papa keŋ, kori a toto keŋ, ido tema, “Nyerae ŋun asecit,” erae iŋes irukitos a ŋulu amunyarak.

²⁵Ŋikanyamak ikes isyanakinete egurigur, nai ituŋanan ŋini ikinyomi Ekapolon, einakinio akiyar ŋina ajokan.

²⁶Ituŋanan ŋini ikinyomit apiiryanut a ŋatameta keŋ, erae ibaŋaanot; nai iŋes ŋini iwuapit ŋuna ka aosou keŋ, eruwor ŋini eiuna bon.

²⁷Ituŋanan ŋini einanakini ŋikulyak ibore, mam nyeruwor ŋini ecanana, nai ŋini nyemisit akiŋarakin ŋikulyak eryamuni ŋican ŋulu alalak.

²⁸Ani keryamu ituŋanan ŋini aronon apolou, eemete ŋituŋa akiŋop a iwace, nai ani emunyar ŋituŋa ŋulu aronok, epitunete ŋulu iyookino.