Read ngakarimojong Ŋakit. 29 Bible Online

Ŋakit. 29 - ngakarimojong bible

Ŋakit. 29

¹Ituŋanan ŋini erubakinit isyaana tari kelimokin atemar toesik akisyaanu, ewana akoloŋit apei todaun tari epite ŋolokitaŋaleunet.

²Ani erae ituŋanan ŋini iyookino erae ekapolon, elelyanete ŋituŋa, nai ani erae ituŋanan ŋini aronon erae ekapolon, iyaloloŋete ŋituŋa.

³Italakari ikoku ŋini eos ikauruunan keŋ, nai ŋini emina arukit ka ŋamalaae, ebelari ebari keŋ.

⁴Ani kipuka erwosit akwap keŋ anakiyookino, itogogoŋi akwap keŋ, nai ani kemina iŋes ŋakaluŋuluŋui, ikurukuroori akwap keŋ todaun.

⁵Ituŋanan ŋini irworo ŋisoswae neni a ikidunyet keŋ, irworo ŋakiro ŋuna ikamunete ikidunyet keŋ.

⁶Ituŋanan ŋini aronon, ikamuni asecit keŋ pei, nai eeo ŋini iyookino ka elelyani.

⁷Eyeni ituŋanan ŋini iyookino ibore ŋini iitanito ŋikulyak nai nyeyeni ituŋanan ŋini aronon ibore ŋini iitanito ŋikulyak.

⁸Epedorete ŋituŋa ŋulu ejamuwarito ŋuluce ayaun egurigur lotaun, nai epedorete ŋituŋa ŋulu aosok alemar aryenyeo alotuŋa.

⁹Ani kelot loikiiko ituŋanan ŋini aoson ka ŋini ebaŋaana, egeuni ŋini ebaŋaana akiŋo ka akiyenyanar todaun epite ŋolo isilyata ikes.

¹⁰Nyecamito ŋituŋa ŋulu italit akiar ŋituŋa arukit ka ŋulu iyookino, iwarito ikes epite ŋolo earyata ŋulu iyookino.

¹¹Nyiwaiwait ibaŋaanot aŋoit keŋ, nai ililiŋiyanari ituŋanan ŋini aoson aŋoit keŋ.

¹²Ani kecamu ekepukan akiwuap ŋakiro ŋuna erae alyokonu, erokyata ŋikapolok daadaŋ ŋulu ipukatotor iŋes.

¹³Eyakatar ikulyakanot ka iryenyaanot ŋakiro nu: Ikiinakinit iwon daadaŋ Ekapolon ŋakonyen ŋuna kiteet.

¹⁴Ani ketuboki erwosit ŋikulyakanotin pa itoroniyarit, eyakaun apukan keŋ emam ŋace apaki ŋina aoyan.

¹⁵Epedori akida ituŋanan ka akitatam aesikin akitiya aronis ainakin ituŋanan aosou, nai ikoku ŋini imyekinitae itiyae ŋuna ecamit iŋes, eyauni ŋican neni a toto keŋ.

¹⁶Ani erae ituŋanan ŋini aronon ipukat ŋuluce, iyatasi ŋakiro ŋuna aronok, nai erubakinete ŋulu iyookino eyarete kiŋolikis ŋulu aronok emunyar.

¹⁷Todai ŋidwe kon edyakarete, iryamuni iyoŋ ekaku alakara aŋuna kec, eaunete ikes alelyanu lotau kon ekaku.

¹⁸Akwap ŋina nyiwuapitere ŋuna ebala Akuj kiwuapa, erae ŋina ileleba akiguro, nai elakara ŋituŋa ŋulu iwuapito ŋikisila ŋulu ka Akuj.

¹⁹Nyepedori akirworo bon akisirworiun eketiyan toesik akitiya aronis, anerae tari kiirasi daŋ, nyiwuapete ŋuna alimokin.

²⁰Ianyunit mono iyoŋ ituŋanan ŋini iburiburi akirworo atipei a? Eyakar ibaŋaanot akigeno ŋina iloit ŋina a ituŋanan a ŋini iburiburi akirworo atipei.

²¹Ipito ŋini einanakinio ŋinapei alokiditeu ibore daadaŋ ŋini ecamit iŋes, ituruwori ekaku ibore a ekapolon keŋ daadaŋ ŋini keŋ.

²²Epedori ituŋanan ŋini eŋoit sek akitoŋo tojikin, ido epedori ituŋanan ŋini epatana akiŋo akitiya ŋasecisya ŋuna alalak.

²³Epedori akituro a ituŋanan aun ŋileec neni keŋ ekaku, nai iŋes ŋini itiditeuna alotau keŋ, eryamuni akitopolooro.

²⁴Aruwor ŋini irukito ka ekokolan, erae aremokino akiyar kon a ilope, epupi iŋes akikoŋet, nai nyecamit alimor akikoŋet ŋin.

²⁵Erae akuryanu emoit a ituŋanan, nai ituŋanan ŋini ikinyomit neni a Ekapolon, iuryaryo erae ŋini eiuna.

²⁶Iwarito ŋituŋa ŋulu alalak ajokis aneni a ekepukan, nai erae neni a Ekapolon eryamunia ituŋanan akiyookino.

²⁷Erae ŋituŋa ŋulu nyiyookino asiilyo aneni a ŋulu iyookino, ido erae ŋulu iyookino asiilyo aneni a ŋulu aronok.