Read ngakarimojong Ŋakit. 31 Bible Online

Ŋakit. 31 - ngakarimojong bible

Ŋakit. 31

¹Erae nu ŋakiro ŋuna apolok nooi ŋuna abu toto a Lemuel kitatam Lemuel:

²Okoe ikaakoku ŋini irae aboŋokinet ŋina ka akilip kaŋ; okoe ikaakoku ŋini irae aboŋokinet ŋina ka akilip kaŋ!

³Nyiwuak agogoŋu kon naberu, nyiwuak ŋiboro kon naberu ŋuna amunyasi ŋirwosi.

⁴Kiira mono iyoŋ okoe Lemuel, nyemaikina ŋirwosi emasete epiini nyemaikina ŋikepukak iburit akimat ŋagwe ŋuna adwarak,

⁵anerae epedorete ikes amerakin kimuryakis ŋakiro ŋuna a ŋikisila, ido kimyekis akiŋaranakin ŋituŋa ŋulu emaikina kiŋarakinae.

⁶Inakisi ŋagwe neni a ŋulu iridete, inakisi epiini neni a ŋulu eryabasi,

⁷emaikina ikes tomata, ikotere kimuryak akulyako kec, emaikina ikes tomata, ikotere kimuryak aryeba kec.

⁸Kirwor aŋuna a ŋituŋa a ŋulu emamukatar epite ŋololimunet ŋakiro kec, kirwor ŋuna a ŋituŋa a daadaŋ a ŋulu a ŋican icamit ikes daŋ toryamut ibore ŋini emaikina toryamut ikwa ŋituŋa ŋuluce.

⁹Kirwor ŋakiro ileerete, totubu ŋakiro aloikiiko emam ŋini iriitotor kirwor aŋuna a ŋikulyak ka ŋulu a ŋican icamit ikes toryamut ibore ŋini emaikina toryamut ikwa ŋituŋa ŋuluce.

¹⁰Ŋae epedori aryamun aberu ŋina ajokan a ŋipitesyo? Ejok iŋes nooi akilo tari ŋamoru ŋuna amilimilak ŋuna enapitae.

¹¹Ikinyomit ekile keŋ iŋes nooi alotau keŋ, eryamununui ekile keŋ ŋiboro ŋulu epol egyelit aneni keŋ

¹²itiyae aberu ŋin ŋuna ajokak aŋuna a ekile keŋ, nyiteryamunit iŋes ekile keŋ ŋican, itiyae iŋes ŋun alorwa a daadaŋ a ŋulu ka akiyar keŋ.

¹³Iwarit aberu ŋin ŋajul a ŋamesekin ka ŋiusyo aŋuna ka adonyunio ŋilowi, edonyi ŋilowi ecamakinit emam akileleny ŋakan keŋ.

¹⁴Itiyae iŋes ka agogoŋu lopite ŋolo itiyaata ŋameeli ŋuna a ŋimucurus, eaununui iŋes akimuj a ekal keŋ aneni alwanan.

¹⁵Isyokanakini iŋes anyounun eriŋa akuwar kidorok akimuj aŋuna a ekal keŋ, ido kitemonok ŋiticisyo aŋuna a ŋaketiyak keŋ.

¹⁶Erotununui iŋes emanikor ŋolo ejok, ido togyelu, isitiyae iŋes ŋisiliŋa ŋulu itiyaunit akitudupya ŋituŋa ŋikito keŋ ŋulu a epiini.

¹⁷Erae iŋes aberu ŋina itiyae ka agogoŋu, egogoŋ ŋakan keŋ alotic ka itiyana iŋes.

¹⁸Epatana iŋes ayenun atemar eyai epoida loboro ŋulu egyelanari iŋes, nyeduŋenene etaa alokai, anerae itiyae iŋes todil akuwar.

¹⁹Etiŋit iŋes a ŋakan keŋ ŋiusyo, totiŋite daŋ a ŋakan keŋ emutu ŋolo edonyio.

²⁰Einanakini ŋiboro keŋ neni a ŋikulyak, iŋaranakini ŋulu iitanito akiŋarakino.

²¹Nyebulenene iŋes aŋuna a ekal keŋ apaki ŋina elilimunio akwap, anerae eyakatar ŋituŋa a ekal keŋ daadaŋ ŋilowi ŋulu a akaterot.

²²Edonyununui iŋes ŋanaŋgae ŋuna epesi lokitaada keŋ, enapit iŋes ŋilowi ŋulu amilimilak ŋulu kipura-areŋak.

²³Itopolooritae lokile keŋ aneni iboiyonokin ŋikilyok alopukei a etaun, itopolooritae lokile keŋ aneni iboiyonokin iŋes ka ŋikasikou ŋuluce ŋulu ka akwap keŋ.

²⁴Itiyaununui iŋes ŋilowi ŋulu amilimilak, ido togyelana, egyelanari iŋes ŋarokobae neni a ŋimucurus.

²⁵Erae iŋes ŋina egogoŋ ka itopolooritae, mam ŋuna itubulito iŋes anapakio a ŋuna eponito alokiŋaren.

²⁶Irworo iŋes ŋakiro ŋuna ka aosou, itatami iŋes ŋakiro ŋuna ka arimao.

²⁷Iyokiunit iŋes ŋituŋa a ekal keŋ ejok nyenyamenene iŋes akimuj ŋina eryamunitae aŋuna ka akalanyo.

²⁸Itoodiunito ŋidwe keŋ epite ŋolo egasyata toyai toto kec, Itoodiunit lokile keŋ daŋ ŋun, ido ipuri iŋes itojokit nooi ebala,

²⁹“Itiyaete ŋaberu ŋuna alalak ŋiticisyo ŋulu ajokak nooi, nai itiya iyoŋ ejok nooi akilo ikes daadaŋ.”

³⁰Epedori ajokis a ituŋanan amodiyar ka erae akibuses a ituŋanan akoŋinait, nai aberu ŋina itopoloorit Ekapolon, emaikina kipuroe itojokitae nooi.

³¹Emaikina inakinae iŋes akitalakaret aŋuna a etic keŋ a daadaŋ, emaikina iŋes toryamu akitopolooro aneni a ŋituŋa a daadaŋ.