Read ngakarimojong Ŋakit. 5 Bible Online

Ŋakit. 5 - ngakarimojong bible

Ŋakit. 5

¹Ikaakoku, topupok ŋakiro ŋuna ka aosou kaŋ ejok, toŋak ŋaki kon nakiro ŋuna ayeni ayoŋ,

²ikotere iyoŋ imukyaaniar anakiwuapit, ŋipitesyo ŋulu ajokak ka itoodiunete ŋakiro ŋuna irworo iyoŋ atemar ios iyoŋ.

³Ebobok nooi ikote ao ŋakiro ŋuna elimuni aberu ŋina emalaana, edelet ŋakiro keŋ akilo tari akimyet;

⁴nai ekaku, eroniar iŋes aneni kon ikokini aronis keŋ neni edwarya ecucuka, ikokini aronis keŋ neni ikicumia ekileŋ ŋolo ekwaka ŋiwaetin daadaŋ.

⁵Ikirikori iŋes iyoŋ kwap nakibois a ŋikatwak, elosi iŋes iwuapit erot ŋolo elosi nakibois a ŋikatwak.

⁶Nyetamakini iŋes akiwuap erot ŋolo ka akiyar eoliyorit iŋes alorot a ŋolo ka akiyar, nai nyeyeni atemar aoliyo.

⁷Ikaakoku, kiira nai ŋakiro kaŋ, nyimyek akiwuap ŋakiro ŋuna akalimok ayoŋ iyoŋ.

⁸Nyirukito ka aberu ŋina ikoni nen, nyiapiyanari lopuke a akai a aberu a ŋin.

⁹Ani kilot iyoŋ neni keŋ, ipotori iyoŋ neni a ŋice apolou ŋina sek iyakar, itwani iyoŋ anapedor a ŋulu emam akisyon eriŋa isorokana.

¹⁰Irumete ŋigelaanotin ebari kon, eayo ibore ŋini itiyau iyoŋ kai a igelaanot,

¹¹iumeni iyoŋ edoli ŋirwa ŋulu ka atwanare kon, apaki ŋin ŋina einiyaria akuwan kon.

¹²Itemari iyoŋ, “Okoe, aŋerit ca paaran ayoŋ akiwuap ŋuna ajokak, ajamuwarit etau kaŋ akisirworiuno!

¹³Abu ayoŋ oŋer akiirar ŋuna eketatamete ŋiketatamak kaŋ, kori abu ayoŋ nyaŋak akit kaŋ nakiro ŋuna akalimonokinio.

¹⁴Adolu tokona ayoŋ napaki ŋina ka akinyasuno kaŋ alokidiŋ ŋituŋa ŋulu alalak.”

¹⁵Torae ŋini ikinyoma aneni ka aberu kon, tomina iŋes bon.

¹⁶Ŋidwe ŋulu iuri iyoŋ anaberu a ŋuna nyerae ŋuna kon, mam ŋakiro ŋuna ajokak ŋuna itiyakinete neni kon.

¹⁷Emaikina ŋidwe kon topolout ikiŋarakis iyoŋ, meere ŋulu emoryo ka ŋituŋa ŋulu erae ŋigelaanotin.

¹⁸Aŋun tolakara aŋuna ka aberu kon, tolelyani aŋuna ka aberu a ŋina iisi iyoŋ eriŋa isorokana,

¹⁹a ŋina amalimali apaki ŋin ikwa atili ŋina atuman, a ŋina eapara alopitesyo ikwa akuri. Elipi itonirarito iyoŋ ŋikisin keŋ ŋisaae daadaŋ, elipi ikisupa iyoŋ amina keŋ a ŋinakoloŋit.

²⁰Ikaakoku, anijokis iryamuni iyoŋ anakisuparo a aberu a ŋina nyerae ŋina kon? Anijokis iryamuni iyoŋ anaminakin akaloman?

²¹Ite Ekapolon ŋakiro daadaŋ ŋuna itiyaete ŋituŋa, neni daadaŋ itorete ikes, eripiripi Ekapolon.

²²Ikamununeete ŋasecisya a ŋulu aronok ŋituŋa ŋul, iduponor ikes aloticisyo a ŋulu ka asecit kec.

²³Etwakete ikes, anerae nyiyokuuno ikes make, ido aŋuna ka abaŋao kec a ŋina apolon, aoliyosi ikes.