Read ngakarimojong Ŋakit. 7 Bible Online

Ŋakit. 7 - ngakarimojong bible

Ŋakit. 7

¹Ikaakoku kiwuap ŋakiro kaŋ, kiwuak ŋakiciketa kaŋ lotau kon.

²Kiwuap ŋakiciketa kaŋ, ikotere iyari, kiwuap ŋuna eketatam ayoŋ iyoŋ lopite ŋolo iyokiunitor iyoŋ akoŋu kon nyewana.

³Kiwuap ŋakiro kaŋ ŋapakio daadaŋ, kigirak ŋun lotau kon.

⁴Kiwuak aosou lotau kon erae nakaato kon, kiwuak ayenut lotau kon erae ekone kon ŋolominat.

⁵Ikiuryarete ikes iyoŋ anamalaae, ikiuryarete ikes iyoŋ anakalomak a ŋuna itoboboto ŋakiro a ŋun.

⁶Apeikoloŋit ayai ayoŋ kai kaŋ, abu oripiya kiŋa alodirisa,

⁷abu eŋolik ŋisorok ŋulu emam ŋakiro eyenete, abu ayoŋ eŋolik alokidiŋ ŋisorok ŋul esorokit epei ŋolo pa ayeni ŋuna etiyae.

⁸Alosi iŋes alorot a ŋolo a etaun, alokoona a ŋolo ayai diyete akai ŋina eboiyo aberu ace, alosi iŋes lowae ŋolo ayai akai a aberu a ŋin,

⁹arae ŋisaae ŋul ŋulu ke eboŋ ŋulu edoiyorya akoloŋ ŋisaae ŋulu ka akuwar ŋulu iryonunia akwap.

¹⁰Abu nai aberu bu akisiryam iŋes, anapit aberu ŋin ŋilowi lopite ŋolo enapyata ŋamalaae ka aye alotau keŋ amodiyar esorokit ŋol.

¹¹Arae iŋes aberu ŋina atitiny ŋina pa erumito ŋileec; erimit iŋes jik pa eboiyonokin lore keŋ,

¹²ayai iŋes apaki ace lorot ŋolo ke etaun ka apaki ace nalapatu ŋina eboiyoto ŋituŋa alotaun, amina iŋes awoenen alokoonae a erot idarit ŋinimodiyara.

¹³Abu aberu ŋin totunakin esorokit ŋol tonu, kitek aberu ŋin esorokit ŋolo a ŋakonyen a ŋuna ikisuparete tema neni keŋ,

¹⁴“Ikiyakar ayoŋ kai kaŋ amuronot ŋina a ekisil, esiyookini ayoŋ nakoloŋit na ŋuna adau akikoŋ.

¹⁵Aŋun, abu tokona ayoŋ ne akisiryam iyoŋ, ekewarit ayoŋ iyoŋ ekeitanit nooi, ido adau aryamun iyoŋ!

¹⁶Apesit ayoŋ ekitaada kaŋ ejok nooi, a ŋanaŋgae a ŋuna amilimilak a ŋuna eaunitae alo Ijipit.

¹⁷Etukukuny ayoŋ ekitaada kaŋ a eminae a ŋolo akukunyon ka akimyet a ŋina akukunyon ta a ekitoe a ŋolo enyaritae einamon.

¹⁸Bua orukosi opero kaapei ikiminin akitodol taparacu; bua etalakasi ŋawat yok ikiminin.

¹⁹Emam lokile kaŋ alore; elosit iŋes neni alwanan.

²⁰Abu iŋes ya ekikapu keŋ kilelebik ŋisiliŋa, nyeboŋuni iŋes lore atipei akitodol ŋina edolyoto ŋisabito ŋiarei.”

²¹Abu nai aberu ŋin kimaimaa esorokit ŋol a ŋakiro keŋ a ŋuna abobok a ŋun, kisupa iŋes a erwor keŋ a ŋolo abobon a ŋol.

²²Abu esorokit ŋol kiwuapak aberu ŋin atipei, abu iŋes kiwuapak aberu ŋin esibit emoŋ ŋolo erikoryo akiŋol, kori esibit atili ŋina ecak atacit ŋina elokitere auno,

²³ŋina ikamuni iŋes togumere a ekaleŋeleŋet lotau. Alosi esorokit ŋol nen esibit ikenyit ŋini ikomae neni eyai atawuatat, pa ayeni iŋes atemar emunaari aberu ŋin akiyar keŋ.

²⁴Nai tokona ŋidwe kaŋ, kiirasi ŋakiro kaŋ, topupokisi ejok ŋakiro ŋuna erworo ayoŋ.

²⁵Nyicamakis ŋitai kus ikibatarete iyes nyiwuapa ŋuna a aberu a ŋin; nyioliyosi nyiwuapakis ŋuna etiyae aberu ŋin.

²⁶Elalak ŋikilyok ŋulu eturuwo aberu ŋin ŋicaryo, aridaiya iŋes ŋikilyok ŋulu alalak ŋulu nyimarun.

²⁷Erae akai keŋ erot ŋolo elosere nakibois a ŋikatwak, erae erot ŋolo euruwuana atuboror natwanare.