Read ngakarimojong Ekal. 1 Bible Online

Ekal. 1 - ngakarimojong bible

Ekal. 1

¹Erae nu ŋakiro a ekalimonokinan, arae iŋes lokoku a Daudi a ŋolo arae erwosit alo Yerusalem.

²Abu ekalimonokinan ŋol tema, “Akoŋinait! Akoŋinait! Akoŋinait akiyar! Erae ibore daadaŋ ikoŋinait!

³Nyo eryamunete ŋituŋa aloticisyo a daadaŋ a ŋulu itiyaete ikes anakwap kec a na?

⁴Edaun anyamet, ido bu ace, nai erubakinit akwap eyai ŋikaru ka ŋikaru.

⁵Elomununui akoloŋ ka edoiyonori, ido kirimo atipei lowae ŋolo emaikina tolomunia.

⁶Ekusi ekuwuam lowae ŋolo alo Kwap, ido kirimo a nen lowae ŋolo alo Kuju, irimi ekuwuam ekusi alowae ke epei tari ŋoloce. Erubakini ekuwuam ekusi irimi itorenene nenipei sek.

⁷Eleleete ŋayona daadaŋ lowae ŋolo eyai anam, nai nyilelebuna anam; erubakinete ŋayona eleleete neni pei sek alelete.

⁸Erae ibore daadaŋ ŋini etuupan; ŋini emam ituŋanan erubakini irworo aŋuna a ibore a ŋin. Nyetemanari akoŋu etemokin akitere; kori nyilelebunun ŋakiro ŋuna epupi akit nakit.

⁹Ibore ŋinipei sek ayai ekiŋaren, iŋes pei erubakini eyai, ibore ŋinipei sek etiyao ekiŋaren, iŋes pei itiyao nabo; emam ibore ekitetena anakwap a ituŋanan.

¹⁰Eyai mono idiobore ŋini etemari ituŋanan ebe, ‘Kiŋolik! Erae ibore en ŋini ekitetena a?’ Ayai ibore ŋin ne koloŋ sek;

¹¹Nyeriŋa etamunitae ŋakiro ŋuna akoloŋ sek, tari ŋakiro ŋuna eyakaun momit, mam ŋini etamuni ikes alotuŋa a ŋulu epote ekaku kec.”

¹²Ayoŋ ekalimonokinan abu oruwor erwosit ŋolo apolokinit Isirael alo Yerusalem.

¹³Abu ayoŋ oŋirik akisyemeonor a aosou ibore daadaŋ ŋini itiyao anakwap a na; abu ayoŋ oyenu atemar etic ŋolo einakinit Akuj ŋituŋa akitiya anakwap a na, erae ŋolo nyeryamuniata ŋituŋa alakara.

¹⁴Abu ayoŋ eŋolik ŋiticisyo daadaŋ ŋulu itiyao anakwap a na, oyenu atemar, erae ibore daadaŋ ikoŋinait, erae ibore ŋin daadaŋ akirisit ekuwuam.

¹⁵Nyepedori ibore ŋini ilugilugitoe kitoonoi arikin tocorotot; nyemaikina kimarakinae ibore ŋini emam loboro ŋulu eya.

¹⁶Abu ayoŋ otam bon otema, “Adau ayoŋ aryamun aosou ŋina apolon nooi, ŋina iloit nooi ŋina a daadaŋ a ŋulu sek ekiŋaren epukato Yerusalem eriŋa ayoŋ nyipuka. Adau ayoŋ aryamun aosou ŋina alalan nooi ka ayenut.”

¹⁷Abu nai ayoŋ oŋirik ayenun atyeketait ŋina eyai kidiŋ ayenut ka abaŋao, aosou ka akikerepikinit, nai abu ayoŋ oyenu atemar ekwaan ŋun daŋ ka akirisit ekuwuam,

¹⁸anerae naosou ŋina alalan, iŋes pei elomunia aŋoit ŋina alalan; ŋulu iyasete aosou, iyasete akiyaloloŋ.