Read ngakarimojong Ekal. 11 Bible Online

Ekal. 11 - ngakarimojong bible

Ekal. 11

¹Togyelanasi ŋikinyom kus a ŋisiliŋa a ŋulu erae meere ŋulu anakwap kus, anerae iryamunete iyes ŋisiliŋa ŋulu alalak alotooma apaki ŋina euruwuana.

²Totyakatyakata ibore ŋini iyakatar iyes kijokonokis ŋituŋa ŋikanikaarei, kori ŋikanikauni, anerae nyiyenete iyes ŋican ŋulu ipedorete iyes aryamun anakwap a na.

³Ani eruwor edou ŋakipi bon, ebukun ŋakipi ŋun kwap erae akiru. Ewae daadaŋ ŋolo imasar ekitoe, kerae lowae ŋolo alo Kwap, kori ŋolo alo Kuju, neni daadaŋ eukokin iŋes, eperi a nen.

⁴Ituŋanan daadaŋ ŋini idarit ekuwuam tojoŋo akikut, ido kita, mam akimuj itauni; ituŋanan daadaŋ ŋini iteonori ŋidouwon, mam akimuj elemuni alomanikor keŋ.

⁵Lopite ŋolopei nyiyeniata iyes epite ŋolo eyeunere ikoku anakook a toto keŋ, nyiyenete daŋ iyes ŋiticisyo ŋulu ka Akuj a ŋina erae ekasuban a ŋinibore.

⁶Kita ŋikinyom kon taparacu, ido nyijamak akitare ŋikinyom kon tari ŋisaae ŋulu ka ataboŋo, anerae nyiyeni iyoŋ atemar a lu elomunete ejok tokoko ejok, kerae ŋulu ka taparacu, kori ŋulu ka ataboŋo, kori elomunete daadaŋ ejok tokoko ejok ikwaan.

⁷Ejok akica nooi, erae akiŋolikin akica ŋina ka akoloŋ ibore ŋini ejok nooi.

⁸Emaikina ŋituŋa elakara ŋikaru daadaŋ ŋulu iboiyoto ikes anakwap a na, nai emaikina ikes etamunito atemar elalak nooi ŋikaru ŋulu eyakaun ituŋanan ekaku ka akiyar a na, ŋuna daadaŋ epote erae ŋakoŋinae.

⁹Emaikina iyes ŋisorok tolelyana eriŋa irae ŋisorok. Kitiyata daadaŋ ŋuna icamito iyes akitiya ka kiwuapa ŋuna ecamito ŋitai kus. Nai totamunito atemar ikitubokini iyes Akuj anakiro a daadaŋ a ŋuna itiyaete iyes.

¹⁰Aŋun, nyicamakis ibore idio ikisiyaloloŋi iyes, kori eyauni aryeba nawat kus, anerae erae asoroko ka agogoŋu ŋinakitiyaet ŋakadaunak atipei.