Read ngakarimojong Ekal. 2 Bible Online

Ekal. 2 - ngakarimojong bible

Ekal. 2

¹Abu ayoŋ ocamak nooi akitalakar bon ka eiitan ayenun atemar nyo erae alakar. Nai abu ayoŋ oyenu atemar erae ŋun daŋ ŋakoŋinae.

²Abu ayoŋ otema ŋuna ka akyena ebe, “Erae ŋimasimas” ka ŋuna ka alakara ebe, “Nyo aryamuni ayoŋ anakitalakanar?”

³Abu ayoŋ ekatak aryamun alakara anakimat epiini ka ainakin naboŋao, nai ariŋa ŋatameta kaŋ eketenito ayoŋ alotooma aosou. Atamakinit ayoŋ atemar erae ŋol epite ŋolo ajokan nooi ŋolo epedoryata ŋituŋa akiboiyo anakwap a na alotooma ŋirwa ŋulu ka akiyar kec ŋulu euruwuaka.

⁴Abu ayoŋ etiya ŋiticisyo ŋulu apolok; abu ayoŋ oduk ŋakais ka odup ŋikito a epiini lomanikorin aŋuna kaŋ;

⁵abu ayoŋ eta ŋimanikorin ka etemonok neni kiboiyet, ido abu odupanak ŋikito daadaŋ ŋulu egelegelya nen ŋulu erayete ŋaraito.

⁶Abu ayoŋ obok ŋataparin kaŋ ŋuna ebukonokinio ŋakipi kec lokito ŋulu elomunito erae amoni.

⁷Abu ayoŋ ogyelununu ŋipi ka ŋapi ka ayakar ayoŋ ŋipi ŋulu edounio alore kaŋ; ayakar daŋ ayoŋ ŋaatuk ŋuna alalak nooi ka ŋamesekin ŋuna alalak nooi, eloito ŋibaren kaŋ ŋul ŋulu a ice a daadaŋ a ŋini sek ekiŋaren keyai Yerusalem.

⁸Abu daŋ ayoŋ ocun aŋuna kaŋ esilipa, egolid ka ebari ŋolo a ŋirwosi a ŋice ta ŋolo a ŋakiboisyo a ŋace; abu ayoŋ oryamu ŋikilyok ka ŋaberu ŋulu arae ŋikaeok; abu ayoŋ oryamu ŋinibore daadaŋ ŋini etalakaran, abu ayoŋ oyakaunor ŋaberu ŋuna alalak ŋuna pa eiitit.

⁹Aŋun, abu ayoŋ orwoniar nooi akilo daadaŋ ŋulu sek ekiŋaren keyakasi Yerusalem; abu daŋ aosou kaŋ torubak eyai neni kaŋ.

¹⁰Ibore daadaŋ ŋini eburit ŋakonyen kaŋ kiŋolikis, abu ayoŋ nyaŋer akiŋolikin, abu ayoŋ nyemik etau kaŋ ŋinalakara daadaŋ, anerae abu ayoŋ oryamu alotau kaŋ alakara alotooma daadaŋ ŋuna aŋirikinit akitiya, ido arae ŋun eropit aŋuna a ŋiticisyo kaŋ a daadaŋ.

¹¹Abu nai ayoŋ otamatama ŋiticisyo daadaŋ ŋulu etiya ayoŋ a ŋakan kaŋ ka ŋuna daadaŋ abu ayoŋ oŋirik aryamun aloticisyo a ŋul. Abu ayoŋ oyenu atemar arae ŋun ŋakoŋinae, ekwaan ka akirisit ekuwuam, ido amamu ibore apedori ayoŋ aryamun anakwap a na.

¹²Aŋun abu ayoŋ ogeu atamatam atemar nyo mono apolou a aosou, a ŋimasimas ka abaŋao? Eya mono tokona ŋace ŋuna epedori ŋini elunyokin lokicoloŋ a erwosit aruwor ekepukan akitiya akilo ŋuna sek ekiŋaren itiyatae a?

¹³Abu nai ayoŋ oyenu atemar ejok nooi aosou akilo abaŋao, ikwaan ka neni ejokia nooi akica akilo akiryonut.

¹⁴Epedorete ŋikaosok akiŋolikin neni elosete ikes, nai nyepedorete ŋibaŋaanotin akiŋolikin neni elosete ikes. Nai abu ayoŋ otamak atemar eryamunete ŋikaosok ka ŋibaŋaanotin ŋican kaapei.

¹⁵Abu nai ayoŋ otam bon otema, “Ŋuna itiyasi neni a ebaŋaanot, epedorete akitiyakin neni kaŋ daŋ; nyo nai aryamuni ayoŋ anaraakau ŋolo aos?” Abu ayoŋ otamak atemar erae ŋun daŋ ŋakoŋinae.

¹⁶Erae ŋun aŋuna nyerubakinere jik etamunitae ekaoson, kori imuryakin ŋuluarei ŋul daadaŋ. Lopite ŋolopei etwania ebaŋaanot, etwani ekaoson daŋ.

¹⁷Aŋun, abu akiyar eketilil ayoŋ, anerae ŋuna itiyao anakwap a na, erae ŋuna apotu eketeryamut ayoŋ ŋican aŋuna eraakatar ikes ŋakoŋinae ŋuna ikwaan ka akirisit ekuwuam.

¹⁸Abu etic kaŋ daadaŋ ŋolo etiyat ayoŋ anakwap a na eketilil ayoŋ, anerae abu ayoŋ oyenu atemar emaikina ayoŋ emyek iŋes kitiyata ŋulu epote ekaku kaŋ.

¹⁹Ŋae eyeni ŋul, keruwor ŋikaosok, kori ŋibaŋaanotin? Nai epolokinete ŋul ibore daadaŋ ŋini abu ayoŋ etiya anagogoŋu kaŋ ka anakwap kaŋ a na. Erae ŋun daŋ ŋakoŋinae.

²⁰Aŋun, abu ayoŋ ogeu akiyaloloŋ aŋuna ka akiyar kaŋ, anerae abu ayoŋ edaŋakin loticisyo daadaŋ ŋulu abu ayoŋ etiya ka agogoŋu ka anakwap a na.

²¹Epedori ituŋanan aŋirikin akitiya etic isitiyae aosou keŋ, ayenut keŋ ka apiiryanut keŋ, nai emaikina iŋes kimyek ibore daadaŋ ŋini adau iŋes akitiyaun toruwor ŋini a ituŋanan a ice a ŋini pa etiyaunit ibore ŋin. Erae ŋun daŋ ŋakoŋinae ka erae aronis ŋina apolon nooi.

²²Aliropit mono eryamuni ituŋanan aŋuna a etic a daadaŋ a ŋolo eŋirikinit iŋes akitiya elelakinit anakwap a na?

²³Eyai aryebo ka akiyaloloŋ lorwa daadaŋ ŋulu eyaria ituŋanan; nyieŋununeete ŋatameta keŋ tari nakwaare. Erae ŋun daŋ ŋakoŋinae.

²⁴Emam ibore idio daŋ ŋini ejok nooi aneni a ituŋanan mati akimuj ka akimat ta aryamun alelyanu alotic a ŋolo itiyae iŋes. Ŋun daŋ, ayeni ayoŋ atemar erae napedor ŋina ka Akuj itiyaere,

²⁵anerae ani pa keyai apedori ŋina ka Akuj nen, ŋae epedori akimuj, kori aryamun alelyanu?

²⁶Iyookino ŋun, anerae einanakini Akuj aosou, ayenut ka alakara neni a ŋini elakara Akuj aŋuna keŋ. Nai einanakini Akuj ikasecan etic ŋolo ka akiriraunun ka akiŋadanakin ŋiboro aŋuna a ituŋanan a ŋini elakara Akuj aŋuna keŋ. Erae ŋun daŋ ŋakoŋinae ŋuna ikwaan ka akirisit ekuwuam.