Read ngakarimojong Ekal. 7 Bible Online

Ekal. 7 - ngakarimojong bible

Ekal. 7

¹Iloit ekiro ŋolo ajokan akimyet ŋina a egyelit a ŋolo apolon ka iloit akoloŋit ŋina itwana ŋina ikidounere

²Ejok alosit kai ŋina igworore akilo alosit kai ŋina itiyaere ŋasuban, anerae erae atwanare ŋina a ŋituŋa a daadaŋ emaikina ŋituŋa ŋulu eriŋa eyarete kirica ŋakiro ŋun alotai kec.

³Ejok akiyaloloŋ akilo akyena, epedori akiyaloloŋ akitisiliyor ereet a ituŋanan, nai ikituruwori ŋini epatana ayenun ŋakiro.

⁴Ituŋanan ŋini etamatamae ŋinapaki ŋuna ka alakara bon, erae ibaŋaanot. Etamatamae ituŋanan ŋini aoson tari ŋuna ka atwanare.

⁵Ejok akiirar ŋakiro ŋuna ikilimokinete ŋikaosok atemar kimyek akilo akipup eete a ŋibaŋaanotin.

⁶Ikwaan ekyeniye a ŋibaŋaanotin ka eruye a ŋinya a ŋulu enomi akim. Erae ŋun daŋ ŋakoŋinae.

⁷Kire jik, kelomakis ŋikaosok amodyanakin ŋuluce, eruwor ŋibaŋaanotin, epedori ituŋanan aruwor icaryoit anaryamun ŋakaluŋuluŋui.

⁸Ejok asalunet a ŋinibore akilo akisyakinet keŋ. Ejokak ŋulu idaŋidaŋete ŋakiro alotai kec akilo ŋulu iturosi alotai kec.

⁹Nyemaikina ituŋanan tema, “Epatana akiŋo, anerae erae neni a ŋibaŋaanotin idasitor aŋoit.”

¹⁰Nyemaikina ituŋanan tema, “Kaanukiro mono ajoketa ŋirwa ŋulu paaran akilo ŋirwa lu?” Meere ituŋanan ŋini eos iŋita ŋakiro ŋuna ikote ŋun.

¹¹Ejok aosou nooi ikwaan ka neni ikikorakinere ebari. Erae aosou ibore ŋini emaikina ŋituŋa ŋulu eyarete toyakatar.

¹²Erae aosou ibore ŋini ikiuni lopite ŋolo epedoryata ŋisiliŋa aiun, nai ajokis ŋina ka aosou iŋes na, iyokuuni aosou ituŋanan ŋini eos.

¹³Totamatamata mono iyes ŋuna a ibore a daadaŋ a ŋini adau Akuj asubun. Ŋae epedori arikin ibore ŋini esubunitae emagul?

¹⁴Ani ejok ibore daadaŋ aŋuna kus, emaikina iyes ilakara, nai ani epote ŋican, emaikina iyes totamut, Akuj iŋes eyaununui apaki ŋina ka alakara ka ŋina a ŋican. Aŋun, nyepedorete ŋisubuna ŋulu eyarete ayenun ibore idio ŋini itiyakin neni kec ekaku.

¹⁵Anakwap kaŋ a ŋina erae akoŋinait a na, adau ayoŋ akiŋolikin ibore daadaŋ, eŋolik ayoŋ ŋituŋa ŋulu iyookino etwakete, nai torubakinito ŋice eyarete tari daŋ kitiyaete ikes aronis.

¹⁶Aŋun, nyiruwor ŋini iyookino adepar, kori ŋini ios adepar. Kaanukiro icamitor iyoŋ amunaar bon?

¹⁷Nyiruwor ŋini irono adepar, kori nyiruwor ibaŋaanot. Kaanukiro icamitor iyoŋ atwanare eriŋa nyedolo apaki kon?

¹⁸Nyiryamu idio a ŋul ŋini epol adepar. Epedorete ŋituŋa ŋulu itopoloorito Akuj akiŋer aryamun idio a ŋul ŋini epol adepar.

¹⁹Einakini aosou agogoŋu neni a ŋini eos, ido iloi ŋin tari ŋikepukak ŋitomon ŋulu eya lotaun.

²⁰Kire jik emam ituŋanan anakwap ipei daŋ ŋini iyookino, ŋini itiyae ŋuna iyookino, ido nyesecenene.

²¹Nyejok ikibobokinit iyes akiirar ŋakiro daadaŋ ŋuna irworosi ŋituŋa, acepaki ipedorete iyes tari akiirar ŋiketiyak kus ikicenete iyes,

²²anerae iyenete iyes alotai kus atemar idaut iyes anapakio a ŋuna alalak akicen ŋituŋa ŋuluce.

²³Abu ayoŋ anaosou kaŋ ekatak ŋakiro ŋun daadaŋ otema, “Acamit ayoŋ jik aruwor ŋini aos,” nai apotu ŋun nyepedorosi aneni kaŋ.

²⁴Alipite epedorya ituŋanan ayenun ibore ŋini erae akiyar. Erae akiyar ibore ŋini iduloro ŋini nyepatana aŋuna yok, erae ibore ŋini egogoŋ nooi ŋini nyepatana iwon ayenun.

²⁵Abu nai ayoŋ ewuak ŋatameta kaŋ ayenun, aripiripuun ka akiwarun aosou ta ŋaboŋonokineta ŋuna a ŋakiŋiseta kaŋ. Abu daŋ ayoŋ oyenu atemar erae aronis abaŋao ŋimasimas.

²⁶Abu ayoŋ oryamu ibore ŋini erono nooi akilo atwanare, iŋes aberu ŋina erae aloketait ŋina erae etau keŋ ŋaunoi ta ŋatibae, aberu ŋina erae ŋakan keŋ ŋiriko. Ituŋanan ŋini elakara Akuj aŋuna keŋ, iŋes bon epedori abucar anaberu a ŋin, nai epedori aberu ŋin amodiun neni keŋ ituŋanan ŋini erae ikasecan.

²⁷Abala Ekalimonokinan ebe, “Kiirasi, ŋakiro ŋuna adau ayoŋ aryamun ikes nu: Ejok akimorikin ibore ipei neni a ŋinice, ido toryamu ekimar kec daadaŋ.

²⁸Ani eriŋa ayoŋ ewarit aryamun ŋaboŋonokineta a ŋakiŋiseta kaŋ, ido toriŋa nyeryamuna, abu ayoŋ oryamun ekile epei ŋolo eyookino alokilyok a ŋulu arae aliput, nai nyeryamuna ayoŋ aberu ŋina iyookino anaberu a ŋuna arae aliput.

²⁹Ŋuna bon abu ayoŋ oryamu ikes nu: Abu Akuj tosub ŋituŋa erae ŋulu iyookino, nai emyekis ŋituŋa akiyookino, aloto ayere akitiya ŋuna ka alakara ŋuna ecamito ikes akitiya.”