Read ngakarimojong Eete a Ŋie. 2 Bible Online

Eete a Ŋie. 2 - ngakarimojong bible

Eete a Ŋie. 2

¹Ikwaan akibuses kaŋ ka ŋina a ŋatur a ŋuna eyakasi nadipo ŋina enyaritae Saran, ikwaan ŋin ka aturot a ecomocomo a ŋolo eyai nakadipaalae.

²Ikwaŋina ibusya aturot a ecomocomo alokidiŋ ŋikukwa, ibus ŋinaminat kaŋ alokidiŋ ŋapesur.

³Ikwaŋina ibusya ekitoe ŋolo enyaritae Apol alokidiŋ ŋikito ŋulu ka amoni, ibus ŋolominat kaŋ alokidiŋ ŋisorok, akabobokinito ayoŋ ŋaraito keŋ.

⁴Abu iŋes okoya ayoŋ kai ŋina aya ŋasuban, akayai iŋes ayoŋ nen aŋuna akaminar iŋes ayoŋ.

⁵Kitogogoŋoi ayoŋ a ŋaboboryo a ŋuna erukitoe esibit ŋamugati, kisikwarunae ayoŋ a ŋaraito a ŋuna enyaritae Apol, anerae ekesiinaya ayoŋ amina iyoŋ.

⁶Okoe kerae ca kiwuak iyoŋ akan kon ŋina alokedyeny namedo kaŋ ka itotun ayoŋ ka akan kon a ŋina aloteten.

⁷Ekoŋi ayoŋ alimit ŋagetei ka ŋatili ŋuna ka ariet atemar, okoe iyes ŋapesur ŋuna iya Yerusalem, nyiteryeŋut ka nyitonyout amina akitodol ŋina edolio apaki keŋ.

⁸Apupi ayoŋ etoil a ŋolominat kaŋ, emotuno iŋes edoki ŋimoru, ekeri iŋes neni kaŋ etiyaununun alokamukumukui.

⁹Ikwaan ŋolominat kaŋ ka agete, kori etili ŋolosorokit. Kiŋolikisi ewoi iŋes kaama alodiyete arwatata kosi, iŋoliunit tooma alodirisa, eripuunit iŋes anibore a ŋini eyai lodirisa.

¹⁰Irworo ŋolominat kaŋ neni kaŋ ebala, “Tonyou ŋinaminat kaŋ, ŋina ebusan kaŋ, bua apena.

¹¹Kiira alunyar akiporo, ekwaa akiru ka adaun.

¹²Aturout ŋatur anariet, erae tokona na apaki ŋina eore, epupyo tokona iwon ŋitoilon a ŋakuryo erwosi anakwap yok.

¹³Esyakis ŋiboboryo akiminiaun ŋaraito, aturout ŋikito a epiini, akukunyu eure a ŋatur kec. Tonyou ŋinaminat kaŋ, ŋina ebusan bua apena.

¹⁴Okoe ŋolominat kaŋ, ani iyai iyoŋ naŋici a ŋatabab ka nagoloi a ŋatabab, kimyekinae ayoŋ eŋolik ereet kon, kimyekinae ayoŋ eira etoil kon, anerae akabobokinit ayoŋ akiirar etoil kon ka akajoikinit ayoŋ akiŋolikin ereet kon.

¹⁵Kikamutu ŋikweei, kikamutu ŋikweei ŋulucicik, ŋulu enyasut ŋimanikorin a epiini, anerae aturout ŋimanikorin yok ŋulu a epiini.”

¹⁶Erae ŋolominat kaŋ ŋolo kaŋ ka arae ayoŋ ŋina keŋ; iyoki iŋes ŋamesekin keŋ lonya ŋulu eya neni eya ŋicomocomo,

¹⁷akitodol ŋina iwalarya akwap toŋopiya akiryonut. Toboŋu ŋolominat kaŋ, tomotun ikwa agete, tomotun ikwa etili ŋolosorokit alomoru a Beser.