Read ngakarimojong Eete a Ŋie. 7 Bible Online

Eete a Ŋie. 7 - ngakarimojong bible

Eete a Ŋie. 7

¹Okoe nakoku a erwosit, ejokak nooi ŋakejen kon anamuk kon, ejokak nooi ŋamuroi kon esulut ikote ŋaculo ŋuna itiyaunitae anamoru a ŋuna amilimilak, ŋuna erae ituŋanan itiyaunit a ŋakan keŋ.

²Eluluŋ akapul kon ikwaan ka asaani ŋinaluluŋ ŋina nyedaunun epiini ŋolo akukunyon alotooma keŋ. Etukosi ŋaculo anacir kon ikwa ŋikinyom ŋulu ikwaan ka erau ŋulu iwuanakinitae ŋatur a ecomocomo nawaetin kec.

³Ikwaan ŋikisin kon ka ŋitak ŋiarei ikwaan ka ŋimuu a agete.

⁴Ecorot emosiriŋ kon ikwaan ka aduketait ŋina aoyan ŋina edukitoe a ŋikyal a ŋitome. Ejokak ŋakonyen kon ikwaan ka ŋataparin a etaun Esibon ŋuna eryamununiyata ŋituŋa ŋakipi alodiyete epuke ŋolo anyaritae Bas-Rabim. Ecorot ekume kon ikwaan ka aduketait ŋina aoyan ŋina a Lebanon, ŋina erounit Damasko.

⁵Ikisibusit iyoŋ akou kon, lopite ŋolo isibusitor emoru Karimel akwap, ikwaan ŋitim kon ka ausi ŋina kipurat-areŋan, ikitisibito iyoŋ nakoku a erwosit.

⁶Okoe ŋinaminat kaŋ, apese ŋina etalakaran, ibus iyoŋ nooi irae ŋina etalakaran.

⁷Irae iyoŋ ŋinadirya a akuwan ikwa ekiŋol, ikwaan ŋikisin kon ka enene a ŋaraito a ekiŋol.

⁸Abu ayoŋ olimu otema, “Adokari ayoŋ lokiŋol odeŋu ŋaraito keŋ.” Okoe kerae ca kikwaanikin ŋikisin kon ka enene a ŋaraito a epiini ka kikwaanikin abobou a ekuwuam a ŋolo elomunit anakituk kon ka eure a ŋaraito a ŋuna enyaritae Apol.

⁹Kikwaanikin abobou a akituk kon ka epiini ŋolo abobon, ŋolo elosi nakook iyapara toleleya alopon ka alokyal.

¹⁰Arae ayoŋ ŋina a ŋolominat kaŋ ka ekeitanit iŋes ayoŋ.

¹¹Bua ŋolominat kaŋ, bua oloto lorerya, ikotere opero lorerya.

¹²Ani eyakae iwon nen, ekyenyunio iwon eriŋa ataparacu, oloto eŋolikisi ŋimanikorin a epiini eŋolikisi kiminiaunito ŋatur alokito a epiini, kori keturounito ŋatur a ŋikito a epiini ka keturounito ŋikito ŋulu enyaritae Pomegranate. Nen, nai eketoodikinia ayoŋ iyoŋ atemar akamina ayoŋ iyoŋ.

¹³Ipedori iyoŋ akiŋuun a nen eure ŋolo abobon ŋolo a ŋikito a ŋulu ikiinakinete amina ka eyakasi diyete epuke yok ŋaraito daadaŋ ŋuna abobok, ŋuna kitet ka ŋuna ŋorok ŋuna abu ayoŋ eŋada aŋuna kon, ŋolominat kaŋ.