Read ngakarimojong Eete a Ŋie. 8 Bible Online

Eete a Ŋie. 8 - ngakarimojong bible

Eete a Ŋie. 8

¹Okoe kerae ca torae iyoŋ lokaato kaŋ, ŋolo abu toto kaŋ kitanak, ido eryamunosi iwon kiŋa kakanu ayoŋ iyoŋ, emam ituŋanan epedori ajamuwar.

²Kapedo ayoŋ arikor iyoŋ okoya kai a toto kaŋ a ŋina eketatami ayoŋ. Akainakini ayoŋ iyoŋ tomat epiini ŋolo akukunyon ka ŋaraito ŋuna enyaritae Pomegranate ŋuna ecuunitae.

³Okoe kerae ca kiwuak iyoŋ akan kon ŋina alokedyeny namedo kaŋ, ka itotun ayoŋ a akan kon a ŋina aloteten!

⁴Ekemaimai ayoŋ iyes ŋapesur ŋuna a Yerusalem atemar, nyiteryeŋut ka nyitonyout amina akitodol ŋina edolio apaki keŋ.

⁵Ŋae mono ŋol ŋolo ebunit analoŋisat, ŋolo etiŋit akan a ŋinaminat keŋ? Abu ayoŋ eketekyenyu iyoŋ alokwap ekitoe ŋolo enyaritae Apol. Arae nen abunio toto kon toryabakinor akidoun iyoŋ, arae nen abunio ŋina aryeba akidoun, ikidounio iyoŋ;

⁶kiwuak lotau kon amina ayoŋ bon, nyitiŋ akan a apese a ace mati ŋina kaŋ bon; anerae egogoŋ amina ikwaan ka atwanare, ededeŋ ekibure ikwaan ka akipany, erirae amina ikoni arira ŋina ka akim, mam ibore imyekini lopite ŋolo nyimyekinia akim ibore.

⁷Nyituduŋeete tari ŋakipi ŋuna alalak amina, nyiwokorete tari ŋakalele amina. Ani keinaki ituŋanan idio ebari ŋolo ka akai keŋ daadaŋ aŋuna ka amina, eryamuni ituŋanan ŋin ajamuwaro.

⁸Eyakare isua nakaato kosi ŋina cici ŋina eriŋa nyiburuna. Anu itiyao isua aŋuna anakaato kosi, akoloŋit ŋina a erwor a nakaato kosi?

⁹Ani kiyokiunit iŋes akuwan keŋ lopite ŋolo iyokunitor arwatata etaun, itanapikinio isua iŋes ebokot ŋolo itiyaunitae a esilipa. Ani kemalaana iŋes ikwa epuke ŋolo epedori ŋinituŋanan alomarya, edukokinio isua ŋakito ŋuna a Cedar towaut iŋes.

¹⁰Arae ayoŋ ŋina eyokiunit akuwan kaŋ lopite ŋolo iyokiunitor arwatata etaun, Ewuasi ŋikisin kaŋ ikwa ŋaduketa ŋuna aoyak, anakonyen keŋ arae ayoŋ ituŋanan ŋini ayauni neni keŋ alakara.

¹¹Ayakar Solomon emanikor ŋolo ke epiini Baal-Amon, abu iŋes inak emanikor keŋ neni a ŋiketeok, amaikina ŋoloketen yau ŋisilipae aliput ŋulu agyelanarya ŋaraito a emanikor a ŋolo ainakinitae iŋes akitere.

¹²Erae emanikor kaŋ ŋolo ke epiini ŋolo kaŋ ka alope, nai okoe iyoŋ Solomon, toyakaunor iyoŋ ŋicekelya kon aliput, eyakaunotor ŋiketeok emanikor ŋulu kec ŋicekelya ŋamiae ŋaarei,

¹³iyoŋ ŋolo iboi alomanikorin epupete ŋarukitos kaŋ etoil kon, kimyekinae ayoŋ eira etoil kon.

¹⁴Tomotun atipei ŋolominat kaŋ, tomotun atipei ikwa agete, kori ikwa etili ŋolosorokit alokamukumukui a ŋulu a ŋikito a ŋulu akukunyok.