Read ngakarimojong Aos. 1 Bible Online

Aos. 1 - ngakarimojong bible

Aos. 1

¹Iyes ŋikepukak ŋulu ka akwap, tominas akiyookino, totamete ŋuna a Ekapolon irae ŋulu ijokak nooi, kiwara Ekapolon a ŋitai kus anakiro a ŋuna a kire;

²anerae erae ŋituŋa ŋulu eryamunete iŋes ŋulu nyitemeneneete iŋes, itoodiunun Ekapolon neni a ŋulu nyeŋerito iŋes.

³Epedorete ŋatameta ŋuna nyiyookino akibatar ŋituŋa aneni ka Akuj, ido ani itemyo apedor keŋ, isileereuni ŋibaŋaanotin;

⁴anerae nyelomari aosou lotau ŋolo amodiyanan, kori nyeyakaun neni a ituŋanan a ŋini erae epito ŋolo ka asecit.

⁵Epedori ituŋanan ŋini iyookino ka ŋini ajokan a ŋipitesyo akiem anamodiyo, eesikini alokaku ŋulu etamete ŋuna ka abaŋao, irumete iŋes ŋileec epote neni keŋ ŋulu nyiyookino.

⁶Eyai aosou neni a ituŋanan a ŋini erimaana, nyimyekini iŋes ŋikeyanyak erubakinito eyakatar ekaile ŋolo a ŋakiro kec, anerae Akuj erae esuuda a ŋakiro aŋuna eya lotai kec, Akuj iŋes ite ŋuna a ŋitai kec ka epupi ŋuna irworosi ikes;

⁷anerae eyai etau ŋolo ke Ekapolon nakwap daadaŋ, iŋes ŋolo erae ibore daadaŋ ŋini keŋ, iŋes eyeni ŋuna irworoe.

⁸Aŋun, ŋituŋa ŋulu irworosi ŋuna nyiyookino nyebucanar ŋakiro kec nyiirara Akuj, ido nyebucar ikes isicanio ŋulu nyiyookino.

⁹Iŋitiŋitiunio ŋakiro anatukon a ŋulu eŋerito Akuj, elimokinio ŋakiro kec neni a Ekapolon, ikotere kisicanae ikes aŋuna a ŋiticisyo kec a ŋulu pa ewuapitotor ŋikisila,

¹⁰anerae epupete ŋaki a ŋini alilyan ŋakiro daadaŋ nyebucar aneni keŋ ŋakiro a ŋulu iŋuruŋurasi.

¹¹Toceite nai nyiloma nakiŋuruŋura ŋina erae akoŋinait, kiurya aŋajep kon nyirwor alyokonu, anerae mam akirot ŋina imunonitae ŋina nyileereuni, ido ituŋanan ŋini irworo alyokonu, idupori akiyar keŋ.

¹²Nyinyarau atwanare nakiyar kon anadyakanareta a akiyar kon; kori nyiyau amunyaro nakiyar kon aloticisyo a ŋakan kon;

¹³anerae nyesubuna Akuj atwanare, ido nyelakara Akuj etwani ibore ŋini eyari.

¹⁴Abu iŋes tosub ibore daadaŋ, ikotere erubakinete eyakasi jik; ŋikabilae a ŋinibore daadaŋ a ŋulu abu iŋes tosub kiwuak nakwap erae ŋulu eyakatar ibore daadaŋ emam ibore ikiari aneni kec, emamukatar atwanare apedor anakwap ŋina aaret.

¹⁵Erae akiyookino ŋina a ŋikaru ka ŋikaru

¹⁶Nai anyaraut ŋulu nyenupito Akuj atwanare aloticisyo kec ka anakiro kec; etamete atemar erae atwanare ibore ŋini ekoneono, ainakinosi ikes jik neni ka erikarosi; acamunosi ikes ka atwanare, anerae neni ecamito ikes ayakau nen.