Read ngakarimojong Aos. 11 Bible Online

Aos. 11 - ngakarimojong bible

Aos. 11

¹Abu aosou kitabar Ŋisirael aloticisyo kec anapedor a ekadwaran a ŋolo asegan.

²Apotu ikes kitoro naloŋisat ŋina amam ŋituŋa alomito kigurokis ŋiemae kec nakiboisyo ŋuna amam ibore epudat.

³Apotu Ŋisirael towoikis ŋimoe kec ka apotu kitijioto tobwaŋa ŋimoe kec.

⁴Apaki ŋina anyamya akure Ŋisirael, apotu ikinyarata iyoŋ, apotu ŋakipi tolomut anataaba a ŋinasulut; abu aboŋokinet ŋina ka akure kec bu anamoru a ŋina agogoŋon.

⁵Aloboro a ŋulu pei aponere kisicanere ŋimoe kec, apotu Ŋisirael ŋikulepek toryamut akiŋarakinet anakiitanit kec.

⁶Akilo eitanit ŋolo ka aŋolol a ŋina elele jik, abu eitanit ŋol toruwor ŋolo egurur ka ŋolo amunaaritae a ŋaokot,

⁷apotu ŋun kitiyakin analimunet a ŋina ka akiar ŋiŋwea. Ibu iyoŋ Ekapolon inak ikes ŋakipi ŋuna alalak anapaki a ŋina ayeniata ikes atemar ikimasi,

⁸ibu iyoŋ anakitanyam ikes akure apaki ŋin kitoodiu epite ŋolo ibunio kisican ŋimoe kec.

⁹Ani apaki ŋina aupya ikes, tari daŋ ŋina araakar ŋol epite ŋolo isicania iyoŋ ikes anakisyon, apotu ikes toyenut epite ŋolo isicanere anatubokin a ŋina ka anyunyura ŋulu nyiwuapito ŋuna ka Akuj.

¹⁰Ibu iyoŋ kikatak ikes lopite ŋolo elimokinia ekauruunan ikoku toceite akitiya ŋuna aronok; nai ibu iyoŋ toripiripi ŋakiro a ŋulu nyiwuapito ŋuna ka Akuj lopite ŋolo etubonokinia erwosit ŋolo nyejamaana.

¹¹Aponi ikes kisicanae kaapei, keya nen, kori kemam a nen,

¹²anerae amaikina ikes kisicanae ŋakisicaneta ŋaarei, apotu ikes toumeno etamunete ŋuna apotu kitiyakin.

¹³Ani iirarete ikes atemar alotooma ŋakisicaneta kec a ŋikulepek, aryamut ŋulu iyookino ŋuna ajokak, apotu ikes toyenut ŋun erae ŋuna erae Ekapolon etiya.

¹⁴Tari daŋ ŋina aponiata ikes toŋero ŋun ejamuwarito Ekapolon ŋolo apotu ikes sek ekiŋaren toŋero anakiyar kec ka kisileereut ŋuna aŋeritotor, nai ani itiyakin ŋuna aronok neni kec, apotu ikes toumokis ekerito Ekapolon, ani apaki ŋina anyamya ikes akure, pa ekwaan ka epite ŋolo anyamitor ŋulu iyookino,

¹⁵Anaboŋokinet ŋuna ka abaŋao ka aronis ŋina a ŋatameta kec, a ŋuna apotu kitooliyosi ikes akilip neni a ŋimuno a ŋulu akonyak ka neni a ŋityaŋ a ŋulu koŋinae, ibu iyoŋ kiyakik ikes ŋisubuna ŋulu alalak ŋulu akonyak ikotere kisicana ikes,

¹⁶ikotere ikes eyenunete atemar ibore ŋinipei esecit ituŋanan iŋes pei isicanere iŋes.

¹⁷Arae napedor kon ŋina eyai agogoŋu daadaŋ iŋes isubunia iyoŋ akwap anibore a ŋini pa atakani epite ŋolokisitiyaet, iŋes pa abunio ikiŋopik iyoŋ aryamun ŋityaŋ ŋulu adedeŋak ka ŋiŋatunyo ŋulu nyekuryaka ŋulu alalak kiyakiya neni kec,

¹⁸kori aryamun ŋityaŋ ŋulu kitet ŋulu sek nyeyenio ŋulu adedeŋak ŋulu ileleba aŋoit, kori ŋulu ipurutaunit ekieŋanu ŋolo ka adedeŋu; kori ŋulu ieŋununeete apuru ŋina alalan kori ŋulu imilyaasi ŋakonyen nooi.

¹⁹Pa abu aronis ŋina etiyato ikes tomunya ca ŋituŋa bon, nai tari akiŋolikin ikes, ayauni akuryanu ŋina apolon.

²⁰Tari pa kerae ŋun bon, apedorete ŋituŋa aramakin kwap ieŋakini iŋes apei bon apaki ŋina icamitor iyoŋ ikes kiwuapa ŋuna iyookino ka apaki ŋina ielarya iyoŋ ikes ieŋakini iyoŋ anapedor kon. Nai itemok iyoŋ ŋiboro daadaŋ iyeni aoyau, etyae ka apotis.

²¹Itoodiununui iyoŋ a ŋinapaki apedor kon akitoodiunia agogoŋu kon ŋina apolon ka ŋae epedori awoikin agogoŋu ŋina ka apedor kon,

²²anerae ikwaan akwap daadaŋ alokiŋaren kon ka imoru ŋini ka asinyon ŋini epedori akiniar ŋakipimeta, ikwaan akilimasit apei ŋina a ŋakopi ŋina edoe kwap.

²³Nai isyoniyene iyoŋ daadaŋ, anerae ipedori iyoŋ akitiya ŋiboro daadaŋ ka nyimitakinit ŋasecisya a ŋituŋa, ikotere nai ikes ekiyete;

²⁴anerae imina iyoŋ ibore daadaŋ ŋini eyai nakwap, nyiŋerit iyoŋ ibore idio ŋini ibu iyoŋ kitiyau, anerae pa kitiyaunit iyoŋ ibore idio erae kiŋerit iyoŋ iŋes.

²⁵Kerae alipite epedoritor idiobore arubakin eyai erae pa kerae iyoŋ iturubakinit eyai?

²⁶Iyoŋ iturubak ŋiboro daadaŋ, anerae erae ŋulu kon, okoe Ekapolon, iyoŋ imina ibore daadaŋ ŋini eyari.