Read ngakarimojong Aos. 12 Bible Online

Aos. 12 - ngakarimojong bible

Aos. 12

¹Eyai etau kon ŋolo nyedaunun neni a ibore a ŋini eyari a daadaŋ.

²Aŋun, itatami iyoŋ iwadio iwadio ŋulu eseceneneete neni kon, itatamununui iyoŋ ikes ka isicanene ikes a ŋakiro aŋuna aronok aŋuna itiyato ikes, ikotere ikes elacakinio anaronis, ido ikikinyoma iyoŋ okoe Ekapolon.

³Ŋituŋa ŋulu koloŋ eboiyete anakwap kon a ŋina asegan,

⁴ibu iyoŋ toremokin ikes aŋuna ka aronis aŋina etiyaete ikes, ibu iyoŋ toremokin ikes aŋuna a ŋiticisyo kec a ŋulu ka akikukuja ka amuronot ŋina pa aseg,

⁵ibu iyoŋ toremokin ikes aŋuna ka akiar kec ŋidwe emam akisyon ka aŋuna a ŋasuban kec a ŋuna anyamyata ŋituŋa ka amasyata ŋaokot a ŋituŋa, ibu iyoŋ toremokin ŋituŋa ŋul ŋulu keponi kitaleunoe iwuapito ŋidwe a ŋakujo,

⁶ŋikauruunak ŋulu apotu toara ŋituŋa ŋulu amam ŋini iŋarakini. Ibu iyoŋ tocamu amunyar ikes anapedor atapapa kosi,

⁷ikotere akwap ŋina ejok nooi aneni kon akilo ŋunace daadaŋ eruwor ŋina eryamunete ŋiketiyak ŋulu ka Akuj.

⁸Nai tari ŋituŋa ŋul, ibu iyoŋ nyimunya, anerae arae ikes daŋ ŋituŋa, ibu iyoŋ kiyakiya ŋikaturur kiŋarenikis ŋasigarya kon tomunyasi ŋimoe iwadio iwadio.

⁹Meere ŋun atemar pa ipedorit iyoŋ akipotokin alojie ŋimoe ŋul ŋulu pa ewuapito ŋakiro kon napedor ŋina a ŋituŋa a ŋulu eyookino, kori pa ipedorit iyoŋ amunyar ikes apeimunyaret isitiyae ŋityaŋ ŋulu adedeŋak, kori a ekileŋ kon a ŋolo ikimunyari atipei.

¹⁰Nai ibu iyoŋ totubonok ikes iwadio iwadio, ibu iyoŋ inak ikes apaki ikotere ekiyete, tari daŋ kiyeni iyoŋ atemar arae ikes ŋipapae a ŋituŋa a ŋulu aronok ka arae aronis kec ŋina auruunitere ikes ka pa apedorito ikes akilocokin ŋatameta kec;

¹¹anerae arae ikes ebuku ŋolo elamam ŋinapei anakisyakinet, ido pa arae aŋuna ikeritor iyoŋ ituŋanan idio iŋes ibunio iyoŋ kimyek ikes akisican aŋuna a ŋasecisya kec.

¹²ŋae epedori alimun ebe, “Nyo Akuj itiya iyoŋ?” Kori ŋae epedori akiloun ŋakiro ŋuna itubonokinia iyoŋ? Ŋae ikisitakini iyoŋ aŋuna ka amunyar ŋakwapin ŋuna ibu iyoŋ tosub? Kori ŋae ebuni akiwo alokiŋaren akitepeg iyoŋ aŋuna a ŋulu nyiyookino?

¹³Anerae emam Akuj ace mati iyoŋ bon, mam Akuj ace ŋina iyoki ŋituŋa daadaŋ, ŋina ilimokini iyoŋ atemar nyetubo iyoŋ ŋakiro iyookino.

¹⁴Emam tari erwosit kori ekepukan edio ŋolo ikitijikini iyoŋ aŋuna a ŋituŋa a ŋulu isican iyoŋ.

¹⁵Irae iyoŋ ŋina iyookino ka ipukat iyoŋ ŋiboro daadaŋ anakiyookino nyisitiya iyoŋ apedor kon akisicania ituŋanan idio ŋini pa amaikina kisicanae;

¹⁶anerae agogoŋu kon iŋes erae akisyakinet ŋina ka akiyookino, ido apolokinit kon ibore daadaŋ, iŋes ikisimyekinit iyoŋ ibore daadaŋ.

¹⁷Itoodiununui iyoŋ agogoŋu kon apaki ŋina etemaryata ŋituŋa emam agogoŋu iyakar iyoŋ, ido isicani iyoŋ ŋini eyeni atemar iyakar iyoŋ agogoŋu, ido tojamuwa agogoŋu kon.

¹⁸Tari kirae iyoŋ ŋina epol agogoŋu akilo daadaŋ, itubi iyoŋ ŋakiro anakisyon ka anadaŋit a ŋina apolon nooi, ikipukat iyoŋ isua; anerae iyakar iyoŋ apedor aseun akitiya ŋuna icamit akitiya.

¹⁹Anakiro aŋuna itiya iyoŋ, idau iyoŋ akitatam ŋituŋa kon atemar emaikina ŋulu iyookino erimaaka ka ilelebik neni a ŋidwe kon akigeno ŋina ajokan, anerae icamak iyoŋ ikes tokiwa ŋasecisya.

²⁰Ani nai ŋina ibunio iyoŋ kitiya ka aosou nyikirikirak akisican ŋimoe a ŋituŋa kon tari apaki ŋina amaikina totwaka, ibu iyoŋ inak ikes apaki ŋina ejoŋoto akitiya ŋuna aronok.

²¹Etya nai tokona ai epite ŋolo isicania iyoŋ ŋituŋa kon itiŋit erono, ŋituŋa kon ŋulu ibu iyoŋ kikoŋ neni atapapaa kec ka tocamunos anakiro aŋuna aya ŋakienakineta ŋuna ajokak.

²²Aŋun, ani apaki ŋina ikisicania iyoŋ isua, ibu iyoŋ kisican ŋimoe kosi ŋarwa ŋatomon akilo isua, ikotere nai ani ikitubi isua ŋakiro a ŋuluce, opedosi atamunit ajokis kon ka ani ikitubokinio isua, eitana atemar kerae ikisyoni.

²³Aŋun, ŋituŋa ŋulu apotu kiboiyoto pa iyookino ka anakiyar a ŋina ka abaŋao, ibu iyoŋ kisican alotooma asiilyo kec pei.

²⁴Apotu ikes tooliyosi nooi anakiro aŋuna a kire tocamut akilip neni a ŋituŋa ikwapei ŋakujo, arae ŋityaŋ ŋul ŋulu apotu tari ŋimoe a ŋituŋa a ŋul tojamuwasi. Aponi ŋituŋa ŋul tomodikinae ikwa ŋiŋwea.

²⁵Aŋun, ikwapei ayakatar ikes isibito ŋidwe ŋulu nyepedorete ayenun ŋuna ajokak ka ŋuna aronok, ibu iyoŋ kiyaku atubokinet kon ŋina abu kitusub ikes ŋibaŋaanotin.

²⁶Nai ikes ŋulu aŋero akiwuap ŋakiro tari kisicani iwadio, eryamunete akisicanio ŋina apolon aneni ka Akuj.

²⁷Ani eyakaun ikes locan, apotu toruwor ŋulu aŋoito neni a ŋityaŋ a ŋulu sek atamakinito ikes atemar erae ŋakujo ka arae aŋuna a ŋakujo a ŋun esicanitere ikes. Apotu ŋituŋa ŋul kiŋolikis ka tocamut Akuj erae ŋina a kire torae bo sek aŋerito ayenun. Aŋun, abu atubokino ŋina apolon bu neni kec.