Read ngakarimojong Aos. 14 Bible Online

Aos. 14 - ngakarimojong bible

Aos. 14

¹Alopite a ŋolopei, epedori ituŋanan ŋini itemonokin alosit ananam a ŋina imorokokoete ŋakipi, akilip neni ka akitoe a ŋina eyabuk akilo tari ameeli ŋina iwokit iŋes.

²Arae aŋuna a ekibure a ŋolo ka aryamunia ŋisiliŋa iŋes etiyaunia ituŋanan ameeli, ido abu ituŋanan anaosou kitiyau ameeli;

³Nai erae akiyokit kon, okoe papa iŋes emyat ameeli alorot keŋ, anerae iwuak iyoŋ nanam neni itori iŋes; iwuak iyoŋ neni itori iŋes emam ŋace anakipi aŋuna imorokokoete,

⁴itoodiunit atemar ipedori iyoŋ aiun aneni aronon a daadaŋ, ikotere nai tari ituŋanan ŋini emam aosou elosi ananam.

⁵Erae acamit kon atemar ibore ŋini itiyaunit iyoŋ anaosou kon, emaikina kisitiyae emam atyonis; a ŋun, ikinyomito ŋituŋa akiyar kec tari keyakasi natuba ŋina edit, ido tari kitoro ikes narimamae ka nakito, edolete emam ŋace nakwap ŋina elosete.

⁶Tari anakisyakinet, apaki ŋina atwakyata ŋiketurok ŋulu aoyak, apotu ŋituŋa kiwuakis akigeno kec ŋinayaret neni ka akitoe, ido anakitenit a ŋina ka apedor kon, abu akitoe ŋin kiŋarak ŋituŋa ŋulu apotu toruwor ekinyomit ŋolo ka anyamet a ŋinakitete.

⁷Toyai arereŋu nakitoe ŋin ŋina abu kiteyar ŋulu eyookino.

⁸Nai ilamam akuj ŋina itiyaunitae ka ŋini kitiyauni akuj ŋin daŋ ilalam aŋuna etiyaunia akuj ŋin ka ilalam ibore ŋini eŋopiyari ŋin, anerae aponi tonyarae iŋes akuj.

⁹Ikwaŋinapei eremokino Akuj ŋulu eŋerito iŋes ka epite ŋolo eŋeritotor ikes Akuj;

¹⁰anerae isicanio aronis ŋina keponi kitiyae ka ŋini kitiyae.

¹¹Aŋun, eyakaun atubokino tari neni aŋakujo a ŋuna ilipete ŋituŋa neni kec, anerae tari kerae ikes ŋiboro ŋice ŋulu abu Akuj tosub, apotu ikes toruwor ŋulu ka asiilyo, apotu toruwor ŋaloca ŋuna isurumete ŋitai a ŋituŋa ka ŋaunoi ŋuna irumenenete ŋakejen a ŋibaŋaanotin.

¹²Esyakini atametait ŋina ka amalao anakitiyaun ŋakujo ka ŋinapei etiyaunere ŋakujo, kisyakini atuna ayakaun nakiyar a ituŋanan;

¹³anerae anakisyakinet amam ŋakujo ka nyerubakinete ikes eyakasi ŋikaru ka ŋikaru.

¹⁴Arae nakituro a ituŋanan iŋes alomuniata ŋakujo nakwap, aŋun, adaun ayeun akiburuburaar ikes atipei tosalut.

¹⁵Aŋuna abunio aŋoit ŋina ka atipei torirau aneni apapa toŋo nooi, abu kitiyau etorube ŋolo ekwaan ka ikoku keŋ ŋini aponi yaarae aneni keŋ atipei, abu nai iŋes kisyak akilip neni a etorube a ituŋanan a ŋini atwan ka abu tolimok ŋiletok keŋ akitiya ŋitalyo ka ŋasuban neni a etorube aŋol.

¹⁶Apotu nai ŋitalyo ŋulu nyiwuapitere ŋakiro ka Akuj ŋul toruwor ŋulu etopolooritae ka etogogoŋitoe alotooma apaki ŋina auruwuana ka aponi kiwuapae erae ŋikisila, ido analimunet a ŋina a ŋapukasinei apotu ŋituŋa kilipa neni a ŋitorubei a ŋulu ecietae.

¹⁷Ani apaki ŋina pa apedoritotor ŋituŋa akitopoloor ŋikepukak kec aŋuna alwaketa aneni kec, apotu ikes totamakis neni ikote ŋikepukak kec anakiboisyo aŋuna eboiyoto, ido apotu kitiyaut ŋitorubei a ŋikepukak kec a ŋulu etopoloorito ikes, ikotere nai ikes epedorete anainakina kec akitopoloor ekepukan kec ŋolo nyeyai kaapei ka ikes.

¹⁸Abu nai ekibure ŋolo a ŋiketiyak ŋiboro torirau kitiyaut ŋitorubei a ŋirwosi, tari ŋulu pa ayenete erwosit, abu ekibure ŋolo ka akilip neni a erwosit kiyatakin aŋuna a ŋitorubei.

¹⁹Ekecian ŋiboro ŋolo acamit akitalakar ekepukan keŋ, abu kikatak nooi akicieun etorube ŋolo ebusan nooi,

²⁰ido abu akibuses a ŋitorubei keŋ kisupa ŋituŋa ŋulu alalak nooi, apotu nai ŋituŋa kituruwosi atipei ŋolo sek etopoloorito ikwapei ituŋanan ŋolo ilipete ikes neni keŋ.

²¹Abu nai etorube ŋol toruwor akisurumet ŋina pa atakani ŋina ikamari ŋituŋa, anerae apotu ŋituŋa ŋulu ayakasi natyokisyo, kori ŋulu arae ŋirwosi epukato, inakinos neni a ŋitorubei a ŋulu etiyaunitae a ŋamoru, kori a ŋakito, kitopoloosi ŋirorwa kec ŋulu pa amaikina kitopolooroe.

²²Apotu nai ikes toruworos ŋulu pa adyakarito koŋin anayenut Akuj, nai tari ŋina eboiyoto ikes anatyokisyo aŋuna apolok ka amamukau ayenut Akuj, apotu ikes tonyarata ŋatyokisyo ŋuna apolok ŋun ekisil.

²³Tari ŋina aaryata ikes ŋidwe alotalyo kec, kori anasuban kec aŋuna itiyao anakimunono neni a ŋiboorei a ŋulu nyiteo, kori anakitiya anakimatimataarit ŋitalyo ŋulugelae,

²⁴apotu ikes nyerubakis iwuapito ŋuna ka akiyar kec, kori ŋuna a ŋikiitasinei kec erae ŋuna iyookino, nai apotu toaras make pa ikinyomasi, kori toŋoonakin make aŋuna ke elomi kec.

²⁵Apotu ŋun daadaŋ yaut anyunyura ŋina aaret ŋinice, ŋinakokoet, ŋinamodyanakinet, ŋinakaatuna, ŋina emam akiyookino, ŋina ka ediŋet, ŋina erworore alyokonu,

²⁶ŋinakiburaet anakiro aŋuna iyookino, ŋinakisimuryanakinet ŋakiro ŋuna ajokak, ŋinamunaaret ŋitai ŋulu iyookino, ŋinaryamunet ekibure ŋolo ka amalao, ŋinakitidiŋakinet ŋulu sek iitakina, ŋina ka elomi ka ŋina ka amalao

²⁷Akilip neni a ŋakujo a ŋuna nyemaikina tolimunoe ŋirorwa kec, iŋes erae akisyakinet aryamun ŋakiro ŋun ka asalunet ŋina ka aronis a daadaŋ.

²⁸Ŋituŋa ŋulu ilipete neni aŋakujo, kelimonokinete anainakina, kori kedwarete analyokonu, kori kiboiyete pa iyookino, kori keinakina nooi akirworo emam ŋileec,

²⁹aŋuna ikinyomitotor ikes neni a ŋakujo a ŋuna nyeyarete ka aŋuna ikoŋioto ikes ŋuna ka alyokonu, etamete atemar emam ŋican epote neni kec,

³⁰epote neni kec ŋakisicaneta alotooma ŋakiro nu ŋaarei: aŋuna aponiata ikes totama ŋuna nyiyookino aŋuna ka Akuj ainakina neni a ŋakujo ka aŋuna aponiata anamodiyo kec kikoŋo ŋuna pa eyookino anajamuwarit kec ŋuna ka asegis.

³¹Meere apedor a ŋiboro a ŋulu ikoŋete ŋituŋa neni kec, iŋes iwuapyo aŋuna a ŋituŋa a ŋulu nyiyookino a ŋulu ebilibiliyete ŋikisila, nai isicanio ŋinituŋanan aŋuna a ŋasecisya kec.