Read ngakarimojong Aos. 18 Bible Online

Aos. 18 - ngakarimojong bible

Aos. 18

¹Abu akica ŋina apolon nooi tocau aneni ayakasi ŋituŋa kon ŋuluseuna. Apotu ŋimoe kec kiirasi ŋitoilon a ŋituŋa kon, nai apotu nyiŋolikis ŋasima kec ka apotu kirworo atemar erae ŋituŋa kon ŋulu elakara, anerae emam ŋican apotu toryamut,

²apotu ikes tolakaros aŋuna aponiata ŋituŋa kon nyisicaniata ikes aŋuna sek etiyato ikes neni a ŋuluseuna kon, apotu ikes kiŋita ŋituŋa kon akisyon ikes aŋuna a ediŋet a ŋolo sek ayakatar ikes.

³Aŋun, ibu iyoŋ inak ŋituŋa kon ibore ŋini anoki ikwa akim, ikotere eruwor ibore ŋin ŋini iteni ŋituŋa kon alorot a ŋolo pa ayenete ikes ka ibu iyoŋ inak ikes akica ŋina ka akoloŋ ŋina pa apedorit akiwan ikes anawosit kec a ŋina apolon a ŋin.

⁴Nai amaikina ŋimoe kec nyeryamut akica ka amaikina toenae anakiryonut, anerae apotu ikes kiwuakis ŋituŋa kon nakiryonut, ŋituŋa kon ŋulu amaikina erae neni kec isitorunio akica ŋina a ŋikisila a ŋulu a ŋikaru ka ŋikaru pena neni a ŋituŋa a daadaŋ.

⁵Apaki ŋina aponiata Ŋijipitian akiar ŋiŋwea a ŋituŋa kon a ŋuluseuna, ido aponi apaki ŋin toesikinae ikoku ipei tolakunae; ibu iyoŋ anakisican Ŋijipitian tolema ŋidwe kec ŋulu alalak nooi, ibu iyoŋ tomunya a akalele a ŋina apolon nooi Ŋijipitian daadaŋ kaapei.

⁶Ayenete atapapaa kosi ŋakiro ŋuna itiyakin akoloŋit ŋin nakwaare, ikotere nai ikes elelyanete anayenut ŋuna ka aosou a ŋina a ŋakiro aŋuna ekoŋito ikes akitiya ka ekinyomito ikes.

⁷Edarito ŋituŋa kon alakuno ŋina a ŋulu iyookino ka amunyaro ŋina a ŋimoe kec.

⁸Ibu iyoŋ a apedor a ŋina ibunio kisicania ŋimoe kosi ikinyara isua neni kon ikitopoloo isua;

⁹anerae apotu anakimunono ŋidwe ŋuluseuna ŋulu a ŋituŋa kon a ŋulu ajokak ikiinakis iyoŋ ŋamuronisya ka anacamuna kaapei apotu tocamut akiwuap ŋikisila ŋulu ka Akuj, ikotere nai ŋuluseuna emorete kaapei ŋiboro ŋulu erae ŋipei, ŋarereŋisyo kaapei ka ŋatyokisyo. Tari apaki ŋin, aeosi ikes isitiyaete ŋieosyo ŋulukoloŋ atapapaa.

¹⁰Nai abu akigworo ŋina eŋopitotor ŋimoe a ŋituŋa kon igworosi toboŋu neni a ŋituŋa kon, ido abu akigworo aŋuna ka atwanare a ŋidwe kec todol nakibois daadaŋ.

¹¹Aponi epito kisicanae lopite ŋolopei esicanere ekapolon ka apotu ŋituŋa ŋulu pa arae ŋikepukak totwakiyasi ŋiboro kec lopite ŋolopei abunio erwosit totwaniyarya ŋiboro keŋ,

¹²ido apotu ŋituŋa ŋulu alalak totwaka alopite ke epei, alalak ŋawat a ŋikatwak, arae ŋuna pa emarun. Apotu ŋituŋa ŋulu ayarete nyepedosi akinuk ŋawat ŋun, anerae alotooma apaki apei bon aponi ŋidwe kec ŋuluminan tomunyarae.

¹³Tari ŋina aponiata ŋituŋa ŋul nyenupa ŋakiro daadaŋ aŋuna ka akiwuapit kec ŋakujo, apotu apaki ŋina amunyarere ŋikiyae kec tocamut atemar erae Isirael ikoku ŋini ka Akuj;

¹⁴anerae apaki ŋina eyapunor akililiŋ ŋina abu torapuwa ŋiboro daadaŋ ka ŋina abunio todol kidiŋ akuwar atipei,

¹⁵abu akirot kon ŋina ka apedor a daadaŋ bu anakuj alokicoloŋ kon a ŋolo ipukator iyoŋ, abu akirot ŋin bu nakwap ŋina amaikina tomunyarae ŋituŋa keŋ, abu bu lopite ŋolo ebunio ekajion etenit akitijikin.

¹⁶Abu bu eyakar ekileŋ ŋolo akwanan ŋolo ka alimunet kon a ŋina ka apedor, abu akirot ŋin bu yau atwanare neni a ŋiboro a daadaŋ, ani ewoi akirot ŋin alokwap, adolunit tari nakuj.

¹⁷Abu nai apaki ŋinapei bu atakanunet ŋina aŋakirujaeta aŋuna a ŋinyas a ŋulu apotu kitubulo ikes nooi, abu akuryanu ŋina ka atipei min neni kec.

¹⁸Apotu ŋituŋa topero irakara, ice ama ka ŋinice iwace, ido aponi kiteyenikinae ikes ŋakiro ŋuna atwakyata

¹⁹Ayenete ikes ŋakiro ŋuna alwaketa, anerae aris ŋakirujaeta kec ŋuna etubulok kelimokis ikes, ikotere nai ikes nyetwaka pa eyenete ŋakiro ŋuna eryamunitotor ŋican.

²⁰Apotu ŋakiro ŋuna ka atwanare a ŋin kitubulo tari ŋituŋa ŋulu eyookino, ido abu edeke bu analoŋisat neni a ŋituŋa a ŋulu alalak nooi, nai abu anyunyura ka Akuj ŋin nyeya apaki ŋina aoyan eriŋa eyai.

²¹Abu ekile ŋolo eyookino kirwor atipei aŋuna a ŋituŋa, abu kilip atipei ikwapei araakar ŋol etic keŋ aŋuna a ŋituŋa. Abu iŋes kilip ka kicuny ekinyate, abu nyeker ŋakiro ŋuna ka aŋoit kon ka abu kitasalu amunyaro, itoodiunit atemar erae iŋes eketiyan kon.

²²Abu iŋes kitasalu ŋakiro ŋuna ka anyunyura, meere ka agogoŋu keŋ, meere alotooma akitijiore, nai anakirot keŋ, abu iŋes kitojoŋo akisicanio anadyekitoi irworo ŋakiro ŋuna ikoŋitoe ka ŋuna a ŋacamuneta a ŋuna ibunio iyoŋ tocamunotor ka atapapaa kosi;

²³anerae apaki ŋina arisyo ketwaka ŋituŋa ketukokin ŋawat kec iwapei, abu ekile ŋolo eyookino ŋol kilip neni kon kitasalu anyunyura kon, tojoŋo atwanare abunit neni a ŋulu ariŋa eyarete.

²⁴Anapit iŋes ekaaso ŋolo esibusitae a ŋitorubei a ŋulu ka akwap a daadaŋ, ido anakitopoloorit atapapaa kosi, abu iŋes tonap anatorobu keŋ ŋamoru ŋuna arekinitae lolaino ŋiomwon, ŋuna eciekinitae ŋakiro atapapaa kosi ka anapit iŋes anakou keŋ ebokot ŋolo ka apolou kon a ŋina ailiilon.

²⁵Aloboro a ŋul, abu ekaaran toboŋo, abu toesik akiar. Arae ŋin akitoodiunet ŋina ka anyunyura kon ŋina adit, ŋina abu kitemokin.