Read ngakarimojong Aos. 19 Bible Online

Aos. 19 - ngakarimojong bible

Aos. 19

¹Apotu ŋulu nyiwuapito ŋakiro ŋuna ka Akuj torubakis erae ŋimoe tari nasalunet aŋuna aponiata nyitiditeunosi make aŋuna ka aŋoit kon, ekiŋaren sek, iyeni iyoŋ Akuj ŋuna itiyakinete ikes.

²Iyeni iyoŋ atemar tari kimyekis ikes ŋituŋa kon toloto ka kitorotokis atipei, ilocokinete ŋimoe kec ŋatameta kec, kiwuapakis ŋituŋa kon.

³Ani eriŋa ŋakiro ŋuna ka akigworo etiŋiyarito ikes, eriŋa iwololoete analyalin aŋikatwak kec, apotu totamut akitiya ŋakiro ŋuna ka abaŋao, kiwuapakis esibit ŋikasiwak ŋituŋa ŋulu aris ikes kimaima atemar toloto aneni kec ka apotu ikes kitorotokis ŋituŋa ŋul ka agogoŋu.

⁴Abu akisicanio ŋina amaikina ikes toryamut yau ikes nasalun, apotu kimuryakis ikes ŋuna aris ketakanut neni kec, ikotere ikes epedorete ayenun atemar ikisicanitae aŋuna itogogoŋitotor ŋakyes

⁵ka emaikina ŋituŋa kon toloto alorot kec emamukatar ŋican, nai ikes ŋilopeyek emaikina toryamut atwanare ŋina nyetakanuna neni kec ŋinapei.

⁶Abu akilocokinet kon Akuj totakanu losubuna daadaŋ atakanunete ŋun analimuneta kon, ikotere ŋituŋa kon epedorete ayakau erae ŋulu emam ibore ewani.

⁷Eteete ikes adis ŋina emukit alomar kec ka apotu tolomasi nakwap ŋina aonon ŋina sek aminasi ŋakipi ayakau, abu anam ŋina areŋan nyegolokin kiŋaren kec, abu neni alapat neni eleleba ŋinya totakanu alokidiŋ ŋakipi ŋuna emorokokoete;

⁸arae nen apotu ŋituŋa kon ŋulu iyokit iyoŋ anapedor kon kitoro erae ŋituŋa ŋulu ka akwap a apei, kedaut akiŋolikin ŋakujuwuanisya ŋuna a ŋaumonokineta.

⁹Apotu ŋituŋa kon totupakin ikwa ŋaŋolei elosete, apotu toporo ikwa ŋikaalei ido ikipurosi iyoŋ okoe Ekapolon iyoŋ ŋolo ibu tolaku ikes,

¹⁰anerae ariŋa ikes etamunito ŋuna apotu totakanut neni kec eriŋa ikes erae ŋipi, epite ŋolo abunio akwap akilo akitanun ŋibaren abu kitanu ŋilac ka akilo akitanun ŋikolya anaŋololin, abu kitolomu kiŋa ŋakidodoka ŋuna alalak.

¹¹Ekaku, apotu ŋituŋa kon kiŋolikis ekabila a ŋikeny ŋolo sek nyiŋolikinito, atakanunete ŋul apaki ŋina abunio ekibure inak ikes akiŋita akimuj ŋina ajokan.

¹²Aŋuna ka ainakin ikes akimuj, apotu ŋalurui potu alowae a ŋolo anam.

¹³Apotu ŋakisicaneta nyepotu neni a ŋikasecak pa itoodikinitae ikes anagiro a ŋina aryenyaanan, apotu ikes toryamut ŋican ŋulu amaikina toryamut aŋuna a ŋiticisyo kec a ŋulu aronok; anerae apotu ikes kitiyata ŋuna aronok nooi neni a ŋituŋa a ŋulu agelaaka.

¹⁴Apotu ŋice towout akijaun ŋigelaanotin apaki ŋina aponiata neni kec, nai apotu ikes kituruwosi ŋipeyok ŋipi, arae ŋipeyok ŋul ŋikeŋarakinitok kec.

¹⁵Meere ŋun bon, nai ebuni akisicanio ca daadaŋ neni a ŋituŋa a ŋulu pa apotu kijaut ŋigelaanotin, aŋuna aponiata ikes kijaut ŋigelaanotin alotooma aryenyeo.

¹⁶Apotu ŋituŋa ŋul kijaut sek ekiŋaren ŋigelaanotin kitiyata neni kec ŋasuban ŋuna ka alakara, ani ekaku, apotu kisicana ŋigelaanotin a ŋakisicaneta a ŋuna aronok nooi, apotu ikes kisicana ŋituŋa ŋulu sek ekiŋaren apotu tomora ka ikes ŋiboro daadaŋ eriyan.

¹⁷Aponi ŋituŋa ŋul kitumudukanae, aponi ikes kitumudukanae lopite ŋolo aponere kitumudukanae ŋulu ayakasi lopuke a ituŋanan a ŋini eyookino, apaki ŋina aponiata ŋul kiŋolikis atemar abu akiryonut neni ayakasi ikes. apotu ŋituŋa ŋul daadaŋ kikatakis a ŋinituŋanan akitor neni daadaŋ epedori akitor.

¹⁸Abu akilocokinet toyakaun loboro daadaŋ, apotu ŋakiboisyo toyakaun kaapei ka ŋunace, lopite ŋolo eyakatar ŋaunoi ŋuna alalak naduŋgu nai togelaana eruye a ŋinauno aŋuna ka ayaun ŋiruisyo ŋulu egelegelya kaapei nai torwo ŋinauno eruye keŋ bon. Apedoritae ŋun ayenun anakitere ŋuna apotu kitiyakin;

¹⁹anerae apotu ŋityaŋ elosete alokwap kilocokinos toruwor ŋisubuna ŋulu a ŋakipi ka apotu ŋityaŋ ŋulu sek elyato anakipi toruwor ŋulu elosete alokwap.

²⁰Abu tari akim toyakaunor apedor ŋina enepya anakipi, abu todaun ŋakipi kec apedor keŋ ŋina kituduŋeet akim.

²¹Abu todaun arira apedor ŋina enyamuwarya ibore, abu akiriŋ a ŋisubuna a ŋulu etwakeneneete torubak erikiriki aneni kec, apotu tari akimuj ŋina abuni anakuj nyetala lopite ŋolo etalaryata ŋakako.

²²Okoe Ekapolon, alotooma ŋiboro daadaŋ, idau iyoŋ akitopoloor ŋituŋa kon, ido nyejamakina iyoŋ akiŋarakin ikes anapakio a daadaŋ ka anakiboisyo a daadaŋ.