Read ngakarimojong Aos. 2 Bible Online

Aos. 2 - ngakarimojong bible

Aos. 2

¹Irworosi ikes ŋakiro ŋuna a ŋipegeta ebasi make, “Euruwuana akiyar yok ka erae ŋina ka akiyaloloŋ, emam ibore eiuni akiyar apaki ŋina esalunia, emam ituŋanan ŋinapei ayenun atemar aboŋu anakibois a ŋikatwak.

²Ikidounio ca iwon pa eyeunitae sek atemar ikidoun, ido ekaku ka akiyar a na, ikiyakaun iwon esibit ŋulu sek pa ikiyari, anerae erae ekieŋanu ŋolo a ŋikumes yok apuru koŋin, erae ŋipegeta yok erwor ŋolo ebunit anakieŋa a ŋitai yok.

³Ani edaun ekieŋanu, eruwor ŋawat yok ŋalup ka eruwor etau ŋolo ikiteyari iwon ekuwuam koŋin,

⁴Imuryakin ŋirorwa yok ekaku a ŋapakio a ŋace, emam ituŋanan etamuni ŋuna aponi iwon kitiyae; eŋopiyari akiyar yok lopite ŋolo eŋopiyarya erigirig a ŋidouwon ielielaar akiyar yok lopite ŋolo ielielaaror ekuno ŋolo irisito ŋikoi ŋulu ka akoloŋ, ido kitoŋopiya amwanis.

⁵Ikwaan ŋirwa ŋulu ka akiyar yok ka etolim, emam nabo jik ayarun anatwanare yok, anerae ani kikigolokin iyoŋ nen, emam nabo aboŋun.

⁶“Aŋun, potu enumunuma ka alelyana ŋiboro ŋulu ajokak ŋulu eya nakwap ka acamit a ŋina ka asoroko yok, esitiyata nooi ibore daadaŋ ŋini esubunit Akuj.

⁷Omata nooi epiini ŋolo epol egyelit ka oninas ŋamyeta ŋuna epol egyelit, nyemaikina apaki ŋina ieteunio akwap ŋina eturounio akwap elunyar emam ŋuna kitiyae iwon.

⁸Ewuala anakyes yok ŋatur eriŋa nyeiniyara.

⁹Nyemaikina idio aneni yok tobucar akinumunum ŋiboro ŋulu ajokak ŋulu erae ŋulu yok apaki na emyekisi alotooma ŋinakibois daadaŋ ŋakiro ŋuna itoodiunito alelyanu ŋina kikiyakar iwon, anerae erae ŋiboro lu ŋulu yok anapaki yok ka erae ŋulu ikikorakinitae iwon.

¹⁰Esicana ituŋanan ŋinikulyakit ŋini iyookino nyikiesik akisican apuserut, kori nyikisyon ituŋanan ŋini a ŋakorwo aŋuna emojoŋitor.

¹¹Emyekisi agogoŋu yok toruwor ekisil yok ŋolo ka akiyookino, anerae ibore ŋini epalag, itoodiunit araakau keŋ ibore koŋin.

¹²“Opero aiwadio odaputu ŋituŋa ŋulu iyookino, anerae ikiretakinito ikes iwon akitiya ŋuna ecamitae iwon akitiya, eŋirito ikes ŋuna itiyao iwon; ikisitanakinete ikes iwon anasecit a ŋina ikibilitor iwon ekisil, ikisitanakinete ikes iwon anasecit a ŋina a epite a ŋolo ikitatamitere iwon.

¹³Itusubuna ikes ŋituŋa ŋulu eryamunito aosou ŋina ka Akuj, ido irworosi atemar erae ikes ŋidwe ŋulu ke Ekapolon.

¹⁴Aruwor ikes aneni kosi ŋiketepegak epite ŋolo ikitamia isua;

¹⁵akiŋolikin isua ikes bon, toryamunae isua ŋican, anerae nyikwaan ŋipitesyo ŋulu ka akiyar kec ka ŋulu a ŋituŋa a ŋuluce, egelaaka ŋakiro ŋuna iwuapito ikes.

¹⁶Etamete ikes atemar ikirae isua ŋisegaanotin, ido nyecamito akiwuap ŋuna itiyao isua aŋuna itoroniaritotor; irworosi ikes atemar ani etwani ŋini iyookino, elosi nalakara, irworosi ikes anakikinyoma atemar erae Akuj papa kec.

¹⁷Edarutu tokona keruwor ŋakiro kec ŋuna a kire, edarutu eŋolikisi ŋuna itiyakin nakiyar kec kedaut atwakare;

¹⁸anerae ani kerae ŋituŋa ŋulu iyookino ŋidwe ŋulu ka Akuj, iŋarakini Akuj ikes, elakuni Akuj ikes anapedor a ŋimoe kec.

¹⁹Ekatasi ikes anakiyany ka anakisican, ikotere oyenutu epite ŋolo eraakatar ikes ŋulu iapara alopitesyo kec, esicana ikes oyenutu akidaŋidaŋ kec.

²⁰Esoloto ikes ikotere etwakete anatwanare a ŋina a ŋileec, anerae anakiro aŋuna irworosi ikes, itusubuna ikes ŋulu eiuni Akuj.”

²¹Arae ŋol epite atamyata ikes epegasi, nai apotu ikes kibataros, anerae abu aronis kec kitoŋopik ikes ŋuna a kire

²²ido apotu nyeyenut ŋakiro ŋuna imunono ŋuna eyeunit Akuj akitiyakin, apotu tari nyeyakaunotor akigeno eropit ŋolo ka araakau ŋulu asegak, apotu tari nyeyenut epite ŋolo eryamuniata ainakinet ŋina ka akiyar a ŋina nyitoroniyaritae.

²³Abu Akuj tosub ŋituŋa erae ŋulu pa amaikina totwaka, abu iŋes ikisub iwon ikiyakar ŋasima keŋ a alope ŋuna ŋikaru ka ŋikaru,

²⁴nai aŋuna ka arakao a Satan, abu atwanare tolomu nakwap, ido ŋituŋa ŋulu ejalakinito akiyar kec neni a Satan, eryamunito ŋican aneni a Satan.