Read ngakarimojong Aos. 3 Bible Online

Aos. 3 - ngakarimojong bible

Aos. 3

¹Eyai akiyar a ŋulu iyookino napedor ŋina ka Akuj, emam akisicanio ebuni neni kec

²Ŋinibore aponiata Ŋibaŋaanotin tojoŋoto akitere ikes, apotu totamakis atemar atwaka, ido apotu totamakis ŋakiro ŋuna ka aŋopiyar kec atemar alomasi ikes locan,

³ka alosit a ŋulu iyookino aneni yok, erae amunyaro kec; nai eyakasi ŋulu iyookino nakinapakina.

⁴Tari sek ketamakinito ŋituŋa ŋuluce atemar aponi kisicanae ikes, eyakatar ŋulu iyookino akigeno ŋina ka akiyar a ŋina a ŋikaru ka ŋikaru.

⁵Tari daŋ ŋina aponere kisicanae ikes iwadio, eryamunete ikes ŋarereŋisyo ŋuna ka alakara, anerae abu Akuj kikatak ikes toryamu erae ŋulu emaikina toruwor ŋulu keŋ ka alope.

⁶Abu Akuj akikatakin ikes lopite ŋolo ikatakinere egolid alokitet erae kejok, abu tocamu ikwaan ka ainakinet ŋina ka amuronot a ŋina epeyo.

⁷Apaki ŋina ebunio Akuj neni kec eruwor ikes ŋulu ikiloreete iŋolikini, eemete ikes ikwa ŋikatyenyityeny ŋulu eporete anatukot a ŋakasirim.

⁸Eruwor ikes ŋikepukak a ŋakwapin ka ŋikapolok a ŋituŋa, ipukae Ekapolon ikes ŋikaru ka ŋikaru.

⁹Eyenunete ŋulu ikinyomito Ekapolon ŋuna a kire, erubakinete ŋulu ikinyomito Ekapolon erukito ka Ekapolon anamina, anerae eyai ajokis ka akisyon ŋina ke Ekapolon neni a ŋituŋa keŋ a ŋulu asegak, iyoki Ekapolon ŋituŋa keŋ ŋuluseuna.

¹⁰Nai isicanio ŋulu nyenupito neni ka Akuj lopite ŋolo iduporitor ikes epeget kec, isicanio ŋulu ejamuwarito ŋulu iyookino ka toŋerito anaremokino Ekapolon.

¹¹Kire jik, eryamunete ŋulu apotu toŋero aosou ka ŋakitatameta ŋuna ajokak ŋican. Erae akigeno kec akoŋinait, emam ibore eryamunete ikes aloticisyo kec, erae ŋiticisyo kec ŋicaryo.

¹²Erae ŋaberu kec ŋabaŋaanotin ka erae ŋidwe kec ŋulu aronok;

¹³ilamam ŋiletok kec. kire jik, erereŋ aberu ŋina nyidoe, ŋina emam aronis itiyae, ŋina eŋerit arukit ka ŋulu asecak, eryamuni iŋes ikoku apaki ŋina ebunio Akuj akisyeme ŋitai a ŋituŋa.

¹⁴Erereŋ daŋ ekile ŋolo ekolupana, ŋolo nyitiyat ŋakiro ŋadi ŋuna nyecamito ŋikisila akitiya, ŋolo pa abu toyakaunor ŋatameta ŋuna aronok ŋuna ka aremokin Ekapolon; einakinio iŋes ŋuna ajokak ŋuna emam ituŋanan einakinitae, einakinio iŋes ŋun aŋuna ka akikinyomit keŋ Ekapolon, einakinio iŋes akibois ŋina ka alakara a ŋina apolon alo Kai ka Akuj.

¹⁵Ejok nooi ainakinet ŋina a ŋiticisyo a ŋulu ajokak, erae aosou ŋataagor a akiyar a ŋina erubakini.

¹⁶Nai nyepolounete ŋidwe a ŋikalomak ka ŋakalomak, ka etwakete ŋidwe ŋulu euruunio pa ecamakinitae ŋikauruunak kec kiryamakinos.

¹⁷Tari kiboiyoto ikes ekaoyan, emam ibore ŋini ajokan ŋini elimitere ikes, ido emam ituŋanan ŋini ekeri ikes apaki ŋina emojoŋiata.

¹⁸Ani ketwaka ikes eriŋa edisyak, emam akigeno eyakaunotor ka emam ituŋanan isirworiuni ikes akoloŋit ŋina ka atubokino;

¹⁹anerae erae asalunet a anyamet a ŋina nyiyookino ŋina a ŋinyas.