Read ngakarimojong Aos. 4 Bible Online

Aos. 4 - ngakarimojong bible

Aos. 4

¹Ejok amamukau ikoku, nai toyakar akiyookino; anerae ani keyakar ituŋanan atametait ŋina ka akiyookino, eyakar atametait ŋina ka akiyar a ŋikaru ka ŋikaru, erae ŋun ŋuna eyeni Akuj ka ŋuna eyenete ŋituŋa.

²Iwuapito ŋituŋa ŋakiro a ituŋanan a ŋini ajokan apaki ŋina erukitotor ka ikes, ido iburit ikes akiwuapit ŋun tari apaki ŋina elosyo ituŋanan ŋin aneni kec; erubakinete ŋun ŋikaru ka ŋikaru erae ŋuna itojokitae ka ŋuna elounak, erubakinete erae akilounet anakiloiloa a ŋina eya ŋainakineta ŋuna nyemunaara.

³Nai emam ajokis eyakaun lodwe ŋulu alalak nooi ŋul ŋulu a ŋituŋa a ŋulu nyenupito neni ka Akuj, emam ipei daŋ alodwe kec ŋini itiyakini ŋuna ajokak aŋuna keŋ, kori ebari alotic a ŋolo itiyae.

⁴Tari kebar ikes aloticisyo kec apaki ŋina euruwuana erae ikes ŋulu ebulit, ido elemarete ŋatyokisyo ikes ka anaryenyeo a ŋina a ŋican, edaunosi ikes

⁵Edaunosi ŋidwe kec eriŋa nyepolouno, ido eruwor ŋiboro ŋulu apotu ikes toryamut aloticisyo kec ŋikoŋinae eruwor ŋulu nyirikanakinitae ŋulu emam ituŋanan irumi, ŋulu emam ajokis eyakatar.

⁶Erae ŋidwe ŋulu euruunito ŋituŋa ŋulu nyecamakinitae akiryamakin, ŋisuudae ŋulu ka aronis a ŋikauruunak kec apaki ŋina iŋisya Akuj ŋidwe ŋul.

⁷Nai tari ketwakete ŋulu iyookino eriŋa nyemojoŋa, eyakaun nakieŋar ŋican.

⁸Nyitopolooritae ituŋanan emojoŋi aŋuna eboiyo apaki ŋina aoyan, kori aŋuna eboiyo ŋikaru ŋulu alalak;

⁹nai erae aosou ka akiyookino ikes epedorya ituŋanan akidol namojoŋu, erae akiboi anakiyar a ŋina nyitoronitae iŋes emojoŋia ituŋanan nooi.

¹⁰Ayakasi ŋituŋa ŋidi ŋulu apotu kiboiyoto elakara neni ka Akuj, ido amina Akuj ikes, ido ani eriŋa ikes iboiyete aneni a ŋikasecak, abu Akuj ya ikes nakuj eyarete.

¹¹Aponi ikes yaarae nakuj ikotere agogoŋu ŋina ka aronis nyilocok ayenut kec ŋina ka akiyookino, kori amodiyo nyemodiya akiyar kec.

¹²Epedorete ŋicocoi a ŋulu aronok akitoŋopiyar ŋakiro ŋuna ajokak, epedori akirimit alokibure a ŋolo aronon akilocokin ŋatameta a ituŋanan a ŋini ajokan.

¹³Aŋuna aponiata ŋulu iyookino toruwor ŋulu ajokak tari apaki ŋina auruwuana, apotu kisiyookis ŋuna etiyaete ŋikaru ŋulu alalak;

¹⁴anerae alakara Ekapolon aŋuna ka akiyar kec, aŋun, abu Ekapolon ya ikes atipei aneni a ŋulu aronok.

¹⁵Apotu ŋituŋa kiŋolikis ŋun, nai apotu nyeyenut, kori nyemisiyasi ŋakiro ŋun alotai kec, atemar eyai ajokis ŋina ka Akuj ka akisyon keŋ neni a ŋulu eseunit iŋes ka iyoki Akuj ŋituŋa keŋ ŋulu asegak.

¹⁶Epote ŋituŋa ŋulu iyookino ŋulu atwaka akitoroniyar ŋulu nyenupito neni ka Akuj ŋulu eyarete, epote ŋisorok ŋulu apotu atipei nakiyookino akitoroniyar ŋikasikou ka ŋakimak ŋulu amojoŋikis namamukau ka akiyookino.

¹⁷Iŋolyanakinete ŋulu nyiyookino ŋituŋa ŋulu iyookino etwakete, nai nyeyenete ŋuna itemokinit Ekapolon aŋuna a ŋituŋa a ŋul ka ŋuna abunio Ekapolon kiyokiyo ikes eiuna.

¹⁸Iŋolyanakinete ŋulu nyiyookino ŋulu iyookino etwakete, ido tojamuwasi, nai ebuni Ekapolon akyenar ikes ite erae ŋikoŋinae. Eruwor ikes ekaku ŋawat koŋin ŋuna nyitopolooritae eruwor ikes ŋulu ekyenare ŋikaru ka ŋikaru anakibois a ŋikatwak;

¹⁹anerae eridakini Ekapolon ikes kwap ililiŋete cek, elemari ikes aneni sek iboiyoto; eesikinio ikes isudedete emam ajokis eryamunete ikes aryeba, emam ituŋanan erubakini etamunit ikes.

²⁰Epote ikes ebulit apaki ŋina imarunere ŋasecisya kec, isitakinete ŋiticisyo kec ikes ŋulu pa ewuapitotor ikes ŋikisila, itiyakin ŋun iteete ikes.